1 Somsomkon taku amod un tagop Ama takuʼn Apudyus kan chitaku, ti imbilangla chitakuʼn aalakla ked tuttuwa hachi. Ngim cha achipun mamati, achipuncha bigbigon un chitaku aalak Apudyus, ti achipuncha bigbigon si Apudyus un Ama. 2 Bubuɏunkuʼn ay-ayatok, aalak Apudyus chitaku si sala, ngim chaampun taku patunged maawatan chi mambyalilan taku si umaliʼn eɏgew. Ngim ammu takuʼn si mangulilan Kristu kasin, miyisu taku kan siya ti itullong takuʼn ustu-ustu kopyala. 3 Ked cha losan un mallamlama un miyisucha kan Kristu, masapuɏʼn mampeɏkas chi biyegcha un isun Kristu.

4 Lu silu makabyasuɏ, siluplingla lintog Apudyus, ti ha byasuɏ sumupling si lintog. 5 Ammuyu un ummali si Kristu utla pita taplu kaalola cha byasbyasuɏ taku ti siya lappun pulus byasuɏla. 6 Ked lu silu iinggew kan Kristu, achipunla ituɏutuɏuy pin-a makabyasuɏ, ngim ha mangituɏutuɏuy makabyasuɏ, achipun lamati kan Kristu ya lappun pulus ammula mipanggop kan siya.

7 Chikayuʼn imbilangkuʼn aalakku, allechenyu taplu achi kayu maallilaw. Lalintog chi tagu un mangwa si ustu, un isun Kristu un lalintog. 8 Ngim ha mangituɏutuɏuy makabyasuɏ, litimpuyug kan Satalas un siya diablo, ti ha diablo, sigud un lakabyasuɏ malipud si chamchamu. Ked hachi gapun chi ummaliyan chi Alak Apudyus utla pita, taplu yam-alola cha losan un pin-an chi diablo koon. 9 Ked ha taguʼn lambyalin alak Apudyus, achipunla ituɏutuɏuy makabyasuɏ ti awed kan siya somsomok Apudyus. Ked gapu ta ilalak Apudyus siya, achipun makwa un ituɏutuɏuyla makabyasuɏ. 10 Ha mangilasilan taku kan cha aalak Apudyus ya cha aalak chi diablo, kamatla: Ha taguʼn achipun mangwa si bibiɏu ya achipunla ay-ayaton chi susuludla, chakampun un alak Apudyus.

11 Allaya chingchingngeɏyu malipud si chamchamu: Masapuɏʼn man-asiayat taku. 12 Ya masapuɏʼn achi taku tuɏachon chi ugalin Cain, ti si Cain tiluttuwala si Satalas ot pilatoyla suludlaʼn Abel. Palaggey patoyon chi suludla? Gapu ta pasig lawwing cha angwat Cain, ngim ha angwat suludla, pasig lalintog.* 3:12 Genesis 4:1-8 13 Ked susulud, achi kayu masmaschaaw lu lalawwingon chikayu kan cha achipun mamati. 14 Intalu, ti ammu taku un achipun taku misila kan Apudyus un isun chi sin-eɏgew un lisila taku siya, ngim si sala alla biyeg taku un mallalayun. Ammu taku un tuttuwa hachi, ti ay-ayaton taku cha susulud takuʼn mamati. Ha lappun ayatla si asintatagula, isun chi lalattoy. 15 Ti ha tagu un lalawwingola suludla, isun chi kapapatoy. Ked ammuyu un ha kapapatoy, lappun kan siya biyeg un mallalayun.

16 Kamatla mangagammuwan taku si tuttuwaʼn ayat, inchuyan Jesu Kristu biyegla para kan chitaku. Ked chitaku bo, masapuɏʼn makasagala taku un mangichuya si biyeg taku para kan cha susulud taku. 17 Lu awed osà tagu un alla mabyelinla ked itullongla osaʼn suludlaʼn kakkaasi, ngim achipunla kacheguwan, himma ilolaʼn mangibyega un ay-ayatola si Apudyus? 18 Chikayuʼn imbilangkuʼn aalakku, ha man-aayat taku kan cha susulud taku, chakampun otyan un ugud taku abus, ngim masapuɏʼn sipupusu ya mipaila si pin-a taku koon. 19 Lu kamatchi man-aayat taku, siya mangagammuwan taku un tuttuwaʼn aalak chitaku kan Apudyus. Ked mallin-ot taku un umachali kan Apudyus. 20 Ked ulay lu amuyuwan chitaku si somsomok taku, ti lapotpotog si Apudyus lu ha somsomok taku ked ammula losa-losan mipanggop kan chitaku.

21 Ked bubuɏunkuʼn ay-ayatok, lu achipun umamuyu somsomok taku, lateɏod taku un malluwalu kan Apudyus. 22 Ked idchola ulay silu kochewon taku kan siya, ti tuttuwaon taku cha bilinla ya siyad koon taku cha mampagalas kan siya. 23 Ked allaya bilinla kan chitaku: masapuɏʼn mamati taku si ngachen Jesu Kristu un Alakla ya man-asiayat taku un siya imbilin Kristu kan chitaku. 24 Cha losan un maluttuwa kan cha bilin Apudyus, iinggew kan Apudyus ked iinggew bo si Apudyus kan siya. Ked ha mangagammuwan taku un iinggew si Apudyus kan chitaku, ammu taku mipagapu si Ispiritu un illidchola un iinggew kan chitaku.