1 Ha panggopkuʼn maluɏat kan chikayuʼn imbilangkuʼn aalakku, ta achi kayu makabyasuɏ. Ngim lu awed makabyasuɏ, awed si Jesu Kristu un lappun byasuɏla un siya malakcheɏ kan chitaku kan Apudyus un Ama. 2 Si Kristu langikaɏu si chusan cha byasbyasuɏ taku taplu mapakawan taku, ked chakampun un abus cha byasuɏ taku ngim cha byasuɏn cha losan un tagu.

3 Lu tuttuwaon taku cha bilin Apudyus, sigulachuʼn ammu taku si Apudyus. 4 Ked lu awed mangibyega un ammula si Apudyus ngim achipunla tuttuwaon cha bilinla, siya ked matuli ya achipun lummamut chi katuttuwaan kan siya. 5-6 Ngim ha maluttuwa si ugud Apudyus, lappun mangkuɏangan chi ayatla kan siya. Ked lu awed mangibyega un litimpuyug kan Apudyus, masapuɏʼn tuɏachola ugalin Jesu Kristu. Ked lu kamatchi koon taku, hachi maligulachuwan taku un tuttuwan litimpuyug taku kan Apudyus.

7 Bubuɏunkuʼn ay-ayatok, ha allaʼn bilin un isuɏatku kan chikayu, chakampun un kàichatu, ngim chachaan un bilin un laatod kan chikayu si chamchamu, hachiʼn bilin un chingchingngeɏyu. 8 Ngim kamad kàichatu allaʼn bilin ti lalàilaʼn ustu-ustuʼn latungpeɏ si killingwan Jesus ya ulay bo mambibiyegyu si sala. Ti allaʼn umaki-akit chi pangot ked lumilalilang chi ustu-ustuʼn silaw.

9 Lu awed mangibyegaʼn iinggew si padcha ngim lawingola suludlaʼn lamati, sissiyaʼn iinggew si pangot. 10 Ngim ha mangay-ayat si suludlaʼn lamati iinggew si padcha, ked lappun kan siya gapun chi makabyasuɏan cha uchum.* 2:10 Chuwa piolaʼn uguchon: lappun kan siya chi mampabyasuɏ kan cha kadwala ya lappun mampabyasuɏala udchi. 11 Ngim ha mallawing si suludlaʼn mamati, pangot chi iinggewala ya malidtidchaɏalala, ked lappun ammula si ayala ti kiluɏap chi pangot.

12 Chikayuʼn imbilangkuʼn aalakku, maluɏatak kan chikayu, ti lapakawan cha byasuɏyu mipagapu kan Kristu. 13 Chikayu boʼn aamma, maluɏatak kan chikayu ti ammuyu siya un sigud un illiinggew malipud si chamchamu. Ya chikayu boʼn babbaru, maluɏatak kan chikayu ti illogyu si Satalas.

14 Ikasinku ibyega gapun chi maluɏatak kan chikayu. Chikayuʼn imbilangkuʼn aalakku, laluɏatak kan chikayu ti ammuyu Ama taku. Chikayu boʼn aamma, laluɏatak kan chikayu ti ammuyu siya un sigud un illiinggew malipud si chamchamu. Chikayu boʼn babbaru, laluɏatak kan chikayu ti mangkoscheɏ kayu ya limuɏa ugud Apudyus si somsomokyu ya illogyu si Satalas.

15 Achiyu ayaton cha lailubungan un sumupling si pion Apudyus ya cha inggew si lubung. Ti lu ayatonyu cha allaʼn byaleg, lappun bò ayatyu kan Apudyus un Ama taku. 16 Ti cha losan un lailubungan, un isun cha lawwing un ugali un sigud un pipion chi long-eg taku, cha allaʼn aguman cha itutullongcha, ya ipaspasweɏcha cha bilaklangcha ya kasasaedcha, ked chakampun un Apudyus un Ama taku lampeɏpuwancha ngim lampeɏpucha si allaʼn lubung. 17 Ked ha allaʼn lubung ya cha losan un kilalawwing un aguman cha tagu, mangkiged. Ngim ha pin-a mangwa si pion Apudyus, awed kan siya biyeg un mallalayun.

18 Aalakku, chancheli alungus chi lubung! Ked chingngeɏyu un umali kalanchaʼn kabusuɏn Kristu. Ked si sala, lummoswa cha achuʼn kabusuɏn Kristu, ked hachi mangammuwan taku un chancheli umaliyala kasin. 19 Cha hachiʼn kabusuɏla, litipugcha kan chitaku si sin-eɏgew, ngim chakampun un tuttuwan kadwa takuʼn mamati, siya gapun tilelancha chitaku. Lu kadwa taku chicha, intuɏutuɏuy cha otyan un iinggew kan chitaku. Ngim summilacha taplu mipaila un lappun kan chicha ustuʼn mankakadwaan taku.

20 Ngim chikayu, awed chi Ispiritun Apudyus kan chikayu un illidchon Kristu, ked ammuyu losan chi katuttuwaan. 21 Ha panggopkuʼn laluɏat kan chikayu, chakampun un gapu ta achipunyu ammu katuttuwaan, ngim gapu ta ammuyu, ya ammuyu bo un lappun tuli un mampeɏpu si katuttuwaan.

22 Silu lù chi latuli? Ha mangibyegaʼn chakampun un Kristu si Jesus. Siya ked kabusuɏn Kristu, ked chakampun si abus chi Alak Apudyus chi achipunla bigbigon ngim ulay bo si Apudyus. 23 Ti ha taguʼn achipun mamigbig si Alak Apudyus, achipunla bo bigbigon si Amalaʼn Apudyus. Ngim ha taguʼn mamigbig si Alak, bigbigola bo Ama.

24 Ked ibyegak kan chikayu, ipapatiyu chingngeɏyu malipud si chamchamu ta mimuɏa si somsomokyu. Lu ha chingchingngeɏyu malipud si chamchamu limuɏa si somsomokyu, pasig kayu iinggew si Alak ya si Ama. 25 Ked allaya ingkarin Kristu kan chitaku, ha biyeg un mallalayun.

26 Isuɏatku cha alla kan chikayu mipanggop kan cha mangan-allilaw kan chikayu. 27 Ngim kan chikayu, iinggew chi Ispiritun Apudyus un illidchon Kristu, ked achipun masapuɏʼn awed sabyali un mantudtuchu kan chikayu, ti siya mantudtuchu kan chikayu mipanggop kan cha losan. Ked cha losan un itudtuchula, pasig katuttuwaan ya lappun tuntulli. Ked ammanyu tuttuwaon cha hachi, ya iinggew kayu mitimpuyug kan Kristu.

28 Ked chikayuʼn imbilangkuʼn aalakku, iinggew kayu kan siya taplu lateɏod kayu ya achipun kayu mabiin kan siya lu mangulin si umaliʼn eɏgew. 29 Tuttuwaʼn ammuyu un lalintog si Kristu.† 2:29 Ha uchum un piolaʼn uguchon si Greek, lalintog si Kristu. Masapuɏ un ammuyu un aalak Apudyus cha losan un pin-a mangwa si ustu.