1 I wakak sur mot in nuknuk un met lar met, a kum tultul anun o Karisito, ra o God i pitar tar anun a kum wasiso na pidik torom met sur met in upuaso i torom a taro. 2 Det ra di sa pitar tar lako kum pinapam tandet, det in lingmulus uni. 3 Ka nuk bing pasi ra mot in kuro iau, o an tur umatan a warkurai sur a taro kai det in kuro iau. Lingmulus, iau kai ka kuro iau. 4 Uni ka nuk pas tu utna ra a raro uni, ikut a nuknuking ri ken ulangolango ru iau. A Labino ut in kuro iau. 5 Gong mot warkurai taio numugu tana bung na warkurai. Mot in kis langlang tuk ra a Labino in nanpat. Ra i ut in utalapor a kum utna ra i parau una dumirum, ra in upuaso a nuknukin a taro. Ma una bung ra, o God in watung ulabo pas a taro, elar ut nama nundet a kum pinapam taktakai.

6 A kum tistising, a sa watung tar a kum wasiso ri un mir nam o Apolos sur in warut mot ma in ususer mot, sur mot in talapor una kukurai na wasiso ri: “Mot in muri kut a wasiso na Buk Tabu, ma gong mot ubek tar tu du wasiso kai.” Ra mot in muri lenra, katutaio tagun mot in ulabo pas ara, ma in unatino pas ara kai. 7 Osi ra i watungi lena ui u wakak tan tu pasandet? Asau ra anumi ra o God ke pitar tari tam? Ra o God i sa pitar tar a kum utna tam, i lai ra u ulabo pas ui nami?

8 Kutiro mot sa utur ukai a kum utna rop ra mot nemi? Kutiro mot sa tene gongon? Mot nuki lena mot kis elar nama kum king, ma met awu. A nemi lena mot in kis na king mulus, sur met kai met in kis na king tomo nam mot. Ikut awu. 9 Uni a nuki lena o God i ubek tar met a kum aposel, sur met in musano oros kut. Met elar nama kum karabus ra di sa kuro tar det sur det in mat ma din urongon un det. A taro ma a kum ensel kai det in tama det.

10 A taro det nuki lena met a kum longlong uni met ser mur o Karisito. Ikut mot, mot nuki lena mot sa mananos rop una numot a nilaun un o Karisito. Met, ka met dekdek, ikut mot, mot nuki lena mot dekdek. Mot, di ulabo pas mot, ikut met, ka di ulabo pas met. 11 Tuk uniri met murak, ma met muruk, met pipis a kum tartararos na malu, di um laulau met, ma ka tu rumu anumet. 12 Met papam dekdek nama kum lamamet ut. Ra det watung laulau met, met watung udan det. Ra det ukadik met, ka met balu det. 13 Ra det mang laulau met, met balu det kut nama kum wasiso na marmaris. Tuk uniri met elar nama beren tagun a rakrakon bual, ma elar nama utna ra i mereseng ra di woro ru i.

14 Ka tumus a kum wasiso ri sur an ban umaimai mot nami. A tumusi sur an ukodos mot, uni mot elar nama kum nutnutung ra a nem doko mot. 15 Kutiro ra anumot tu noino arip na tene tamtamabat, ra det tamtamabat anumot a nilaun un o Karisito, ikut kalako susut na tamtamamot. Un o Karisito Iesu, iau a tamamot, uni a los a Wakak na Wasiso torom mot. 16 Ra a udekdek pas mot sur mot in mur anung a petutna. 17 Iri i a kibino ra a tulu ru o Timoti torom mot. I a nutung ra a nem doko i, ma i ser lingmulus una pinapam anun a Labino. In unuk tar mot melet una nung a kum petutna, ra i kibino pas tagun anung a kinkinis tomo nam o Karisito Iesu. Anung a petutna i elar nam anung a etowo torom a taro na lotu una kum tamtamon rop.

18 Ara taro tagun mot det ulabo pas det ut, uni det nuki lena kan milet melet mo torom mot. 19 Ikut, milau mo an milet melet torom mot, ra ut ra a Labino i nemi. Ra an nanpat, kan mananos kut una wasiso anun a taro ra det ulabo pas det ut, awu. An mananos utkai una dekdek ra det papam nami. 20 Uni a matanitu anun o God ausur a wasiso, a dekdekino ut ra. 21 Asau ra mot nemi? An nanpat torom mot nam in kadas, o nam a marmaris ma a wowowon na petutna?