1 A kum tistising, numugu ka wasiso lar pas torom mot lenlar a taro ra a Tokodos na Nion i kis un det. A wasiso torom mot elar kut nami ra torom a taro taginin una rakrakon bual, ra mot a kum nat liklik utmakai una kinkinis tomo nam o Karisito. 2 A tabor mot kut nama polo na sus, ausur nama dekdek na utna na inangon, uni ka mot dekdek utmakai suri. Lingmulus, tuk uniri, ka mot dekdek utmakai. 3 Mot murmur utmakai a kum petutna taginin una rakrakon bual. I talapor lena mot laun utmakai elar nama taro taginin una rakrakon bual, uni mot ser nuknuk laulau ma mot ser wasiso na kankan etetalai. Mot laun elar nam det ra ka det nurnur. 4 Ra taio i watungi lena, “A mur o Pol,” ma taio kai i watungi lena, “A mur o Apolos,” mot wasiso kut elar nama taro taginin una rakrakon bual.

5 Osi ra o Apolos? Ma osi kai o Pol? Mir aru tultul kut anun o God, ra mot nurnur un o Karisito i kibino una numir a pinapam. Mir taktakai mir pam a pinapam ra a Labino i pitar tari torom mir. 6 A marut a wino, o Apolos i pukpuki nama danim, ikut o God ut i ulubung pasi. 7 Lenra o naro ra i marmarut ma o naro kai ra i pukpuki ka der labo. O God kut i labo, i ra i ulubungi. 8 O naro ra i marmarut ma o naro ra i pukpuki, a nuknukinder i takai kut. Ma der in los anunder a ikul elar ut nama nunder arara pinapam. 9 Uni mir aru tene pinapam tomo anun o God. Ma mot, mot elar nama kinobot anun o God, ma mot elar kai nama rumu anun o God ra i papam nanan uni.

10 Kibino una marmaris anun o God ra i sa pitar tari tang, a papam elar nama tene pam rumu ra i mananos. A sa utur tar a kibin a rumu, ra ara taro bulung det papam netes uni. Det rop taktakai ra det papam netes uni, det in tumarong det una si na ngas na pinapam ra det in pami. 11 Uni o God i sa ukis tar o Iesu Karisito, i a kibin a rumu, ma ka din pam melet lar pas tu kibino gisen. 12 Ra taio in papam netes una kibin a rumu ri nam a gol, o a silwa, o a kum wat ra a matandet i ka, o a duwai, o a re, o a kum luluano wit 13 din upuaso anun a ngas na pinapam una bung na warkurai. Din upuaso i nama sungun, ma a sungun ra in lar a ngas na pinapam anun arara taktakai. 14 Ra a pinapam anun taio in winim pas a sungun, in los pasi ut anun a ikul uni. 15 Ikut ra a sungun in tun rop ru anun a pinapam, anun a pinapam in utna oros mukut. O God in ulaun pas a tene pinapam ra, ikut in elar mukut nama musano ra di ulaun pasi gusun a sungun.

16 Pepetlai, ka mot tasmani lena mot a rumu anun o God, ma a Nion o God kura un mot? 17 Ra taio in banlaulau a rumu anun o God, o God in banlaulau a musano ra. Uni a rumu anun o God i talapor, ma mot ut a rumu ra.

18 Gong mot toro mot ut melet. Ra taio tagun mot i nuki lena i mananos nama ngas na mananos taginin una rakrakon bual, i wakak sur in longlong umatan a taro, sur in mananos mulus umatan o God. 19 Uni a mananos tagun a rakrakon bual ri, i a longlong na utna kut umatan o God. Elar nami ra di sa tumus tari una Buk Tabu lena,