1 Suatu hari, Ibrahim rahatan duduk di muhara lawang kemahnya di parak puhun puhun di Mamre. Lalu Allah manampaiakan diri-Nya lawan sidin. Wayah itu, harinya panas manggantang.

2 Pas sidin manangadah sadikit ka jalan, sakalinya ada talu ikung musapir badiri bahadapan lawan sidin.* 18:2 Sabujurannya saikung musapir tu Allah, nang lainnya malaikat. Babaya malihat bubuhannya, sidin langsung bukah manyambut bubuhanya. Lalu sidin basujut sampai ka tanah.

3 “Pagustian ulun, amun pian hakun, baelang pang di kemah ulun. Jangan balalu haja” ujar Ibrahim baucap.

4 “Biar sadikit banyu diambilakan, jadi pian pian kawa mambasuh batis, lalu dudukan ai baistrahat di bawah puhun nang ini. 5 Ijinakanlah ulun manyiapakan makanan sakadarnya nyaman pian pian sigar pulang. Lalu, pian pian kawa manarusakan parjalanan. Ulun tarasa tahurmat lantaran pian pian sudah hakun baelang ka wadah kami” ujar Ibrahim baucap pulang.

“Ayuja” sahut bubuhannya.

6 Lalu badadas ai Ibrahim mandapati Sarah di kemah.

“Ding, lakasi, ambil sabantal galapung gandum nang pambaiknya, adoni, ulah manjadi ruti bulat” ujar Ibrahim ka bininya.

7 Imbah itu, bukah ai Ibrahim ka wadah sapi sapi inguannya. Lalu diambilnya saikung anak sapi nang lamak. Lalu dijulungnya lawan pambantunya. Lalu langsung dimasakakannya. 8 Diambilnya keju, susu lawan daging anak sapi nang sudah dimasak tu, lalu disurungakan sidin ka bubuhan musapir tu. Parahatan bubuhannya makanan, sidin badiri haja parak bubuhannya di bawah puhun tu.

9 “Mana bini ikam?” ujar bubuhannya batakun.

“Itu nah, urangnya ada di dalam kemah!” ujar Ibrahim manyahut.

10 “Nah ingatakan ja, Him ai, tahun dudi, aku pacangan babulik pulang mandapati ikam. Wayah itu, Sarah, bini ikam tu, pacangan baisi saikung anak lalakian” ujar saikung matan bubuhan musapir tu baucap.

Sarah umpat mandangarakan jua di lawang kemahnya. 11 Sabujurnya Ibrahim wan Sarah tu sudah tuha banar, Sarahnya sudah ampih datang bulan. 12 Lalu katawa ai Sarah.

“Sudah tuha nang kaya ini, masih bisa guring bakumpulkah akuni lawan Abahnya? Sidin gin sudah tuha jua” ujar Sarah baucap dalam hatinya.

13 “Kanapa maka Sarah tatawa wan kada parcaya amun inya masih kawa baranak biar inya sudah tuha? 14 Adalah nang mustahil gasan Allah? Tahun kaina, wayah nang sudah Aku tantuakan tadi tu, Aku pacangan babulik pulang mandapati ikam. Wayah itu pang Sarah pacangan baisi saikung anak lalakian” ujar ALLAH baucap lawan Ibrahim.

15 “Kada, ulun kada katawa” ujar Sarah sambil bakulim lantaran takutan banar.

“Iya ai, jangan bakulim! Ikam dasar katawa tadi tu!” ujar Allah manyahut. 16  17  18  19  20  21  22  23  24  25  26  27  28  29  30  31  32  33