1 Yone
Yonehanda Keriso hameigini hearuhondo beba mbira ogo gilibu wia hene
Mbuga ogoha gilibu ngarunaga nemandi ogo
Yonehanda beba mbira ogo gili binigo irane kiranaga gilibu nga.
Mbira
Wali agali beba ogo daga lararu ti Ngode Datagaliwabebi ibu igini Yasu Kerisobi heba hogimbu bu howa tinibi gubalini ho haga hagabu holene nga, lalu gili bini.
Mende
Ngode Datagaliwabe mana henene ngadagua ndo lawai haga henerume wali agali mo guya halu ti Ngode Datagaliwabebi Yasu Kerisobi heba gubalini haga bu holenego mo ereba holigo de hondo holene nga, lalu gili bini. Ngode Datagaliwabe mana henene ngadagua ndo lawai haga heneru tigua lalu, Mbirale bibahende dindini ngaruni mbira ela harimiyagua ko yania ho kamigoni, laga hene.
Ani lowa lalu, Yasu ibu Ngode Datagaliwabenaga Iginiore howa dindini daluwa agaliore hene laramaligo ogonidagua nabini irane ibu ko ela holeda, lowa tigua mana ani lawai halu hene. Ngode Datagaliwabe mana henene ngadagua ndo lawai haga uruni tigua lawai halu, Mbirale ko ngago bayaleda lalu daba nabi bia gubalini haga haga bu holenegobi nahe waha birimiyagua ti Ngode Datagaliwabenaga pele mulene nayule ndo yuleberami, laga hene.
Tigua ogonidagua lawai hayagola Yone ibugua lalu, Ani ndo Yasu Keriso ibu Ngode Datagaliwabe howa agali heneneore hole dalini. Ai Yasu Kerisohondo mini mbiraore wu karume Ngode Datagaliwabehondo gubalini halu tinibi gubalini haga haga bulene nga, lalu hongo howa lalu gilibu nga.
Bu̱lu̱ baga buwa kuni gilibu ngago
1.1-4
Gili binigonaga irane 1.5–2.29
Wá holenenagabi aruma holenenagabi 3.1-24
Ngode Datagaliwabenaga waneiginibi dama Heyolabenaga waneiginibi 4.1-6
Henene lolenebi ke̱ holenebi 4.7-21
Gubalini haga haga bu holene 5.1-21
Mini mbiraorewi kagome wayali holene
1
Haabo holene Bi ibu hapani henego ogo
1 Mbirale bibahende nawingi haabo holene Bi ibu hene. Iname Bi ogoni hale howabi deme hondowabi gime ela howabi tíhondo beba gilibu wia haramagoni.✡ Yo 1.1-4, 1.14, 20.27, 2 Pi 1.16, 1 Yo 2.13-14 2 Holene ogoni hapani hayagola iname de hondowa tí langialu kama. Haabo holene ogoni ibu Abala henegobi ina de hondoloma̱ya hapani hayagobi ogoninaga lalu langerama.✡ Yo 1.14, 21.24, Ab 2.32, Lm 16.26 3 Ina Aba Iginila libuha ho gimbu bu kamadagua tíbi inaha ho gimbu bu halimulo ibugua bi layago iname hale howabi de hondowabi tí langerama.✡ Yo 17.21, Ab 4.20, 1 Ko 1.9, 1 Yo 2.24 4 Turu holene tíhabi inahabi to̱lai helo iname tíhondo beba ogo gilibu wia haramagoni.✡ Yo 15.11, 16.24, 2 Yo 12
Ngode Datagaliwabe ibu wá holene kago ogo
5 Yasu ibuha howa bi layago iname hale howa tí langeramago ogo. Ngode Datagaliwabe ibu wá holene kago aruma holene mbira ibuha nawiore.✡ Yo 1.9, 9.5, 12.35-36, 1 Ti 6.16, Ya 1.17, 1 Yo 3.11 6 Anigo iname, Ngode Datagaliwabeha hogimbu bu kama, lalu howa aruma holenehayagi kamayagua iname bi laramagobi mana beremagobi ke̱ halu henene lolene nayi howa ko bialu kama.✡ 2 Ko 6.14, 1 Yo 2.4 7 Ngode Datagaliwabe ibu wá holene kadagua inabi wá holenehayagi ibaga bu kamayagua ina Ngode Datagaliwabenaga wali agali maru heba mini mo mbiraore ho holeberama. Ani buwa ibu Igini Yasu darama pela hayagome ko bibahende birimaru domo waharagome ina ibuha ho mbiraore ho kama.✡ Ais 2.5, Yo 3.21, Eb 1.7, Hi 9.14, 1 Pi 1.19, Mo 1.5, 7.14
8 Inaneme lalu, Ko mbira inaha nawiore kama, larimayagua Ngode Datagaliwabenaga henene lolene inaha nawi howa inane mo hondo halu kamagoni.✡ Yob 9.2, Iba 32.5, Min 28.13, Ya 3.2, 1 Yo 2.4 9 Iname ko birimaru lapani harimayagua Ngode Datagaliwabehanda ibu mini tigabi howa domo waholebero layadagua domo waholebira. Mana ko bibahende birimarubi domo wahai haga ka.✡ Iba 51.2, Min 28.13, 1 Yo 1.7 10 Inaneme, Ko nabiore kama, larimayagua Ngode Datagaliwabenaga bi inanaga bu habaneha nawi howa bi laramagome, Ngode Datagaliwabe ibu ke̱ haga ka, larama.✡ 1 Yo 1.8
Keriso ibu inanaga biamogo biaga kago ogo
✡1:1: Yo 1.1-4, 1.14, 20.27, 2 Pi 1.16, 1 Yo 2.13-14
✡1:2: Yo 1.14, 21.24, Ab 2.32, Lm 16.26
✡1:3: Yo 17.21, Ab 4.20, 1 Ko 1.9, 1 Yo 2.24
✡1:4: Yo 15.11, 16.24, 2 Yo 12
✡1:5: Yo 1.9, 9.5, 12.35-36, 1 Ti 6.16, Ya 1.17, 1 Yo 3.11
✡1:7: Ais 2.5, Yo 3.21, Eb 1.7, Hi 9.14, 1 Pi 1.19, Mo 1.5, 7.14
✡1:8: Yob 9.2, Iba 32.5, Min 28.13, Ya 3.2, 1 Yo 2.4
✡1:9: Iba 51.2, Min 28.13, 1 Yo 1.7