122
Dontir nba jiin Jerusalem po
1 Li bo maŋime yoo nba ki bi yetin a,
“Ŋaant ki tin saan Yenjiantu ŋasaakak ni.”
2 Ki mɔtana ti ji be nna na,
ki see Jerusalem tammɔi nɔɔk ni na.
3 Jerusalem tee doo nba ki bi ŋammir nan fant
nan binbenŋaŋe.
4 Leŋe tee siaminba ki nibooru na baar,
booru nba tee Israel teeb na,
a bin tur Yennu niipoouk nan u sennu nba tee biaŋinba na.
5 Leŋe ki Israel kpanbara kar a bin bu bi niib buut.
6 Ii mei Yennu wun tur Jerusalem parmaasir a,
“Ŋaant ki binba loona na-ii mɔkitir.
7 Ŋaant ki gbananmaasu-ii be a doo ni,
ki manu-ii be a naan ŋei ni.”
8 N yɔɔsnba nan n nikpiimm paake te ki n yeen Jerusalem a,
“Parmaasir-ii be a paak.”
9 Ti Yomdaanɔ Yennu ŋasaakak paake
ki n mei maa bona kur-ii ŋan ki tura.