50
1 Ki Yennu yet a, “I dukii a n ber nyinn n niib
nan jɔɔ nba tuu yêt u poo ki ber nyinnɔ nae?
Ki li-i tee nnaie, yêtu gbant be lia.
I dukii nan n kɔie, ki bi soori
nan jɔɔ nba tuu kɔi u waas ki bin teenib daaba na-a?
Aaii. Bi din teeni yommii, kimaan i toonbiit paake.
Bi din yaat nani, kimaan i marinbiit paak.
2 “Bee ki n niib yêt bin gbiint,
yoo nba ki n baar bi boor maa n tinnib na?
Bee ki bi yêt gatu, yoo nba ki n yiinib na?
N ki mɔk paŋ nba saa tinnibe-e?
N saa fit yet maan ki mɔkgbeŋir n fɔɔr,
ki mɔka n kpant kunkoot, ki li janii na n kpo nyunkon.
3 N saa fit te ki sanpaak n bɔnn, ki tee nan li mɔ kpemɔnii na.”
Ki jiin Yennu Toontunnɔ na mɔsaku po
4 Yabint Yennu wannin maa saa pak linbawa,
ki n saa fit kɔɔn binba chɔk na paŋ.
Sanyiɔk kur, u te ki n numm mɔne
nan man gbiint linba ki u saa wannin.
5 Yennu turin bannuwa, ki n ki yêt,
koo ki lek n numm ŋaan nyikɔ.
6 N jii n bɔɔnne ki chab binba boon na.
N ki gɔɔrib, yoo nba ki bi sukiin, ki ŋabii n tiaŋ,
ki sat mɔsant n numm po na.
7 Ŋaan bi sukit na kan teenin siar,
kimaan Yabint Yennu-e teenin sommir.
N tuu kpaŋ n mɔŋe ki gubin diar, n mi nan n kan di fei,
8 kimaan Yennu be nanin, ki saa wann nan n ki mɔk biiti.
Sɔɔ mɔk par ki saa baar nan maan n paaki-i?
Wun ŋaan tin tɔk saan barbuut boor.
Wun baar nan u maan maŋ.
9 Yabint Yennu tiɔŋo kɔn n paak,
ki ŋmee mun saa yet a n mɔk kaati?
Binba paantin maan na kur saa mir bote
nan tintɔɔk nba tuu tɔɔ tiɔk biaŋinba na.
10 Yimm nba kur baakit Yennu,
ki bia saak u toontunnɔ mɔb na,
sɔnu nba ki i tɔk na-i lekii bɔn biaŋinba,
ŋaan i teen Yennu yada kii maa u paak.
11 Yimm nba kur lorin a yin biir leeb na,
i tiɔŋ lorbiit maŋe saa biiri.
Yennu tiɔŋo saa te linba na n tun, ki i tan saa kpo ninbakuun.