49
Israel teebe tee yentu ki tur digbana
1 Yimm digbanbanfɔka damm, gbiintir man,
yimm nba be banfɔka na.
Bi din tan maarin na, ki sɔɔ Yennu gannin
ki teenin u toontunnɔwa.
2 U te ki n mɔbona man nan banjiak nae.
U dia u tiɔŋ nuue ki guun.
U teenin nan peenu nae, ki n porin ki teen siir nan yeku.
3 U yetin a, “Israel, a tee n toontunnɔe;
li saa nyi a nie ki niib n dontin.”
4 Ki n jiin a, “N tun toonn-a, ŋaan dindann kaa.
N nyinn n paŋa ŋaan ki la siara nyɔɔt.”
Ŋaan n saa teen Yennu-e yada ki wun sommin n toona ni;
u saa pan, n toona paaka.
5 Bi din tan maarin na ki sɔɔ Yennu gannima,
u teenin u toontunnɔe a man jen nan u niib
nba tee Israel teeb ki yat na.
Yennu-e teenin baakir, n paŋ nyi u niŋe.
6 Ki Yennu yetin a, “N toontunnɔ, n mɔk toonjaanne ki teena.
Li ki tee nan a saa ŋamm teen Israel teeb
nba ki n tinnib na kɔɔ kaa-ii yabii,
ŋaan n saa te ki a tee yentue ki tur digbanlia,
ki lin te tingbouŋ na niib kur n tinn.”
7 Israel teeb kasii Yennu nba tee bi tinntɔɔ na,
yeen wunba ki digbana yisimɔ bonchiann, ki bia namɔ,
ŋaan ki u tee doo diara toontunnɔ na a,
“Kpanbara saa la ki bi ŋaa-a, ki bi saa fiir ki tura jirima,
ki tɔɔndamm mun bia saa lar, ki gbaan jianta.”
Linba na saa tun, kimaan Yennu gann u toontunnɔwa,
Israel teeb kasii Yennu na dia u mɔsona.
Ki jiin Jerusalem ŋammu po
8 Yennu yet u niib a, “Yoo-i baar nan man tinni,
n saa sommi, ki saa gbat i mɔnii nba jiin sommir po na.
N saa guuri ki nyinni, ki i paak, n saa lor mɔlor nan nibooru kur.
N saa te ki yin ŋamm kar i tiŋ nba dɔɔ yann na ni.
9 N saa yet dansarkɔɔra na a, ‘Ii saa i yamani man,’
ki bia yet binba be bunbɔnn ni a, ‘Baat yeeuŋ ni man.’
Bi sii tee nan pei nba ŋman kunkona paak nae;
10 nyunnyukuru koo kon kan soorib.
Yonnu nan tinkorik wɔruk kan teenib siar,
kimaan wunba mɔk lomm namme saa gar bi tɔɔnn.
U saa saan namm nyuntona boa.
11 “N saa faa sɔnjar ki gaan kunkona paak,
ki ŋamm sɔnu ki n niib n tɔkin.
12 N niib saa nyi banfɔka ki baar.
Bi saa nyi gaŋ po nan yondo po
nan Asuann nba be diitu po na.”
13 Sanpaak, ii yiin yaŋ.
Tingbouŋ, ii hoot kii kpamm, ŋaant kunkona-ii yiin yanii.
Yennu saa maan u niib para,
u sii mɔk ninbatinu nan u niib nba di biak na.
14 Ŋaan ki Jerusalem teeb yet a,
“Yennu nyɔr nyikita. U tamm ti powa.”
15 Ki Yennu jiin a, “Poo saa tamm u bik powa-a?
U kii loon u bik nba ki u marɔ na-a?
Li-i lekii tee ki poo saa tamm u bik po,
ŋaan min kan tamm i po.
16 Jerusalem, n kan ban tamm a po;
n sɔb a sann n niipant nie.
17 “Binba saa ŋamm maa-a na baate mɔtana,
ki binba bo biira na saa yaat.
18 Gotir lint ki la linba tuun na. A niib na lakinte ki kpent.
Barmɔnii nan maa tee Yennu nba fo na,
a sii mɔk parbifaant a niib paak,
nan pooyookir nba tuu mɔk parbifaant u salinbana paak nae.
19 “A tingbouŋ din boonte ki teen yann.
Ŋaan mɔtana li saa waab nan binba jent na karuwa.
Ki binba teen a doi langbent na saa nyi ki fɔkit nana.
20 A niib nba ki bi din marib yommisin ni digbangann ni na
tan saa yet dasiar a, ‘Tiŋ na mantik waaba.
Ti loon yiar nba yabe ki tin kar.’
21 Li yoo na, a saa yet a mɔŋ a,
‘Ŋmee mar waas na kur ki turimi?
N din kɔŋ n waas, ki ji din ki fit mar waasi.
Bi din ber ki nyinnin ki teenin yommik.
Ŋmee wubir waas na? N din biar n kɔɔe, ki waas na nyii lee?’ ”
22 Yabint Yennu yet u niib a,
“N saa tur digbana nyinn, ki bi saa kunn i waas.
23 Kpanbara sii tee nan bi baanba nae ki turi,
ki poobatnba tee nan bi naanba na.
Bi saa baa fabin i tɔɔnn, ki turi baakir,
ki sikin bi mɔŋ ki turi jirima,
ki i saa bann nan mine tee Yennu,
ki wunba guu n sommir kan di fei.”
24 Jɔɔ-i jii linba jat ni, a saa fit fata-a?
A saa fit fat kunkɔnkɔntondaanɔ dansariiwa-a?
25 Yennu yeen a, “Linba saa tume na.
Bi saa jii kunkɔnkɔntondaanɔ dansarii na ki yaat namm,
ki bia fat kunkɔnkɔntondaanɔ bona.
N saa kɔn nan wunba kur kɔn nani, ki saa tinn i waas.
26 N saa te ki binba dinti biak na n kpi bi leeb,
ki nikpinu nan wutoor saa yibib,
ki niib kur saa bann nan mine tee Yennu nba tinti ki nyinti yann.
Bi saa bann nan mine tee Israel teeb Yennu nba mɔk paŋ.”