69
Oturutoh Ritonõpo a tyyryhmase ahtao
Tawi nymerohpyry, inekarohpyry eremiaketõ tuisary a.
1 Ritonõpo kypynanohko!
Tuna zueme nexino ypymyry ae.
2 Ikurepato htaka omõnõko ase zue aka,
tũporẽ pyra mana upupuru apõme.
Zue aka tomõse ywy, nerỹko ase tuna opotũ exiryke.
3 Tapotũkehse ase: “Kuakorehmako!” kary poko.
Jesenary jetuhxo nase, jenuru piukah ãko nase ooepyry
eraximary poko, Ritonõpo Jesemy jakorehmase!
4 Yzehno exiketõ tuhke mã toto, toto onyhtomapopyra
jahtao ro, ikuhpỹme toh mana jupuhpyry po
jũsety ehtoh motye.
Jamihme mã toto jenahkary se exiketomo,
ajohpe ehtoh ke jyhxirõko mã toto.
Imehnõ mõkomory onematonanohpyra exiase repe,
yrome epehmapõko ropa mã toto ya.
5 Yyrypyry ononẽpyra ase owinoino, Ritonõpo;
tuaro mase putupyra jehtopõpyry poko.
6 Ritonõpo Jesemy, Jamihmehxo Exikety,
oenetupuhnanõ ewomako ehxiropyra
toto ehtohme azahkuru jehtopõpyryke.
Ritonõpo Izyraeu tõ Esemy, ah oeahmananõ
ehxiropyra ypoko nexĩ toto.
7 Opyno jexiryke yronymyryme jyhxirotoh
toanahtose ya, toehxirose roropa repe ywy.
8 Imepỹ nonory põ sã toehse ywy jakorõ tomo a,
katonõme sã ase ytapyĩ taõkomo a.
9 Atapyĩ pynohxo jehtoh apoto sã ukurohtao mana,
okerekerematopõpyry opoihtonanomo a
ypona toehse roropa mã kehko.
10 Yxitaryhtao te, otuhpyra roropa jahtao
jotururuke oya jeunohnõko mã toto.
11 Upo topuxiximã amururuhtao ya aorihtyã
hnamonanõ samo, moro eneryke tyya xine
jeunohnõko mã toto, ypoihtõko roropa mã toto.
12 Ypoko oturũko mã toto osema ae ytoketomo,
aetỹtyã roropa ypoko eremiãko mã toto.
13 Yrome oya oturũko ase, Ritonõpo Jesemy.
Kuezuhko, Ritonõpo, ise oehtoh toehse ahtao
ypyno yronymyryme oexiryke.
Kypynanohko õmihpyry ae ro.
14 Kuewomako omõpyra jehtohme ikurepato htaka;
kypynanohko yzehnotokõ winoino,
nerypyra jehtohme tuna zue aka.
15 Ypona tuna onenehpopyra exiko tukumase ahtao;
zue ao ynerymapopyra exiko,
aorihtyã esaka ytopyra jehtohme.
16 Ritonõpo Jesemy, kure mase,
ypyno roropa mase ipunaka. Kuezuhko,
kuakorehmako, juãnopyry se pyra oexiryke ipunaka.
17 Otonẽpyra exiko ywinoino; kuezuhko seromaroro,
popyra ehtoh konõto toehse exiryke ya!
18 Osehko ya, kypynanohko;
kuewomako yzehnotokõ winoino.
19 Yzehnotokõ emero enẽko mase,
ypoihtoh tonõ eya xine waro mase, tuaro mase
jehxirotopõpyry poko tyhxirose jahtao eya xine.
20 Jyhxirotoh pokoino sam ãko ase ukurohtao,
tapotũkehse ywy jakorehmane oehpyra exiryke!
Ypyno exikety toraximase ya repe, yrome arypyra,
ypyno exikety pyra nexiase; jemuhkehkane oepyry
toraximase ya repe, yrome oehpyra tokurehse.
21 Omise toehse jahtao orihmato tyrise
ynapyry aka eya xine.
Tutunazehnase jahtao ikatainety tokarose ya jokurume.
22 Naeroro otuhtoh riryhtao eya xine,
ah nyporemãno, mokaro ryhmapotohme!
Otuhtoh konõto riryhtao eya xine,
ah tyyryhmasẽme nexĩ toto, toto wãnohtohme.
23 Ritonõpo, tonurãkõkara sã toh tyripoko!
Jũme jamihme pyra tyripoko toto!
24 Mokaro zuãnohko, toto zehno oexiryke,
jetunety ke epehmako toto orẽpyra oexiryke!
25 Ah toto esary irumekahpyry sã nexino!
Ah isene exiketõ pyra nexino itapyĩkõ tao.
26 Onuãnohtyã rohmanohpõko mã toto,
anapurotyã tuarimary eunohnõko mã toto.
27 Mokaro rypyry imeroko apapẽ pokona emero;
toto onypynanohpyra exiko ipunaka.
28 Mokaro esety ikyryko isene exiketõ papẽ poe,
õmiry omipona exiketõ esety maro pyra toto ehtohme!
29 Sam ãko ase, tapotũkehse jakorehmane oehpyra
exiryke! Ritonõpo, kuanỹko, kypynanohko!
30 “Kure mase,” ãko ase, eremiãko Ritonõpo
eahmaryme; “Onyrityã motye imehxo mase,”
ãko ase, tãkye jexiryke opoko.
31 Morara kary ya Kuesẽkõ zamaro mana
pui tõ ynekarory motye, pui orutua zuãtahpyry,
totapasẽ motye apoto apõ po.
32 Moro eneryhtao irohmanohpotyamo a,
tãkye exĩko mã toto.
Mokaro, Ritonõpo eahmananõ sekese exĩko mã toto.
33 Tymõkomokãkara omiry etãko Ritonõpo mana.
Wenikehpyra mana typoetory tõ poko
ãpuruhpyry tao toto ahtao ro.
34 Ritonõpo eahmatoko kapuaõkomo, sero nono põkõ
roropa, tuna konõto maro, ikuaõkõ roropa emero!
35 Jerusarẽ pynanohnõko mana.
Juta patary tõ rĩko ropa mana.
Moroto ipoetory tõ exĩko mana.
Osesarĩko mã toto moro nono po: “Sero nono
ekarõko ase oya xine,” katopõpyry ae ro.
36 Mame moro nono esẽme
exĩko Ritonõpo poetory pakomotyamo.
Moroto ipyno exiketõ exĩko mana.