68
Izyraeu tõ orẽpyra ehtopõpyry poko
Tawi nymerohpyry. Eremiatopo. Inekarohpyry eremiaketõ tuisary a.
1 Owõnõko Ritonõpo mana tyzehnotokõ enyohtohme sapararahme aytotohkõme.
Ise pyra exiketõ epãko mã toto, typoremãkapose toexirykõke.
2 Orexĩto aropory sã tyryrykane a,
moro sã toto aropõko mana.
Popyra exiketõ osenahkãko mã toto Ritonõpo ẽpataka,
mopuku epukuru tunatary samo apoto ke.
3 Yrome zae exiketõ tãkye rokẽ exĩko mã toto,
atãkyemãko mã toto Ritonõpo ẽpataka.
Tãkye toexirykõke eremiãko Ritonõpo poko mã toto.
4 Oeremiatoko Ritonõpo eahmaryme,
oeremiatoko kure aexiry poko.
Osema ikurãkatoko esemaryme,
akurũ po ytokety sã mana.
Esety Kuesẽkõme mana;
atãkyematoko ẽpatao awahtao xine.
5 Poetõpo tõ pynanohnõko Ritonõpo mana,
Tytapyĩ kurã tao isene exikety,
pytỹpo tõ ewomãko roropa mana.
6 Turumekase exiketomo a tapyi ekarõko mana
moro tao toto ehtohme,
ãpuruhpyry taõkõ tũtanohpõko ropa mana,
tỹpokase sã toto ehtohme tãkye rokẽ aehtohkõme,
yrome Ritonõpo omipona pyra exiketõ
nono tonorẽ po rokẽ exĩko mã toto.
7 Ritonõpo, opoetory tõ tarose ahtao oya
ahno esaka pyra,
nono tonorẽ kuroko toytose awahtao,
8 nono tykytyky tykase, kapu poe konopo toehse
itamurume Ritonõpo oepyryke Xinai esemy,
Izyraeu tõ Esẽ roropa.
9 Konopo itamurume menehpoase
ononory kurãkatohme ropa,
patãpome sã toehse exiryke.
10 Opoetory tõ tõsesarise moroto;
kure oexiryke tonahsẽ mekaroase tymõkomokãkara a.
11 Tynyripohpyry tokarose Ritonõpo a,
mame nohpo tõ tuhkãkomo a moro omi tarose:
12 “Tuisa tõ soutatu tõ maro epãko mã toto,
typoremãkase toexirykõke!”
Tytapyĩkõ tao mõkomo tapiakase nohpo tomo a
tynapoihpyrykomo topetõkara mõkomohpyry.
13 Utukuimo panono parata ke tyõtose, taporihke
zemime uuru kurã ke.
(Oty katoh toitoine amarokõ tehme toehse kaneru tõ esao etonatoh po?)
14 Tuisa tõ typoremãkapose ahtao Ritonõpo Jamihmehxo Exikety a newe tonehpose eya, moroto ypy Saumõ po.
15 Kaetokohxo ypy Pasã mana, ypy tõ tuhke, zumo roropa mana!
16 Oty katohme matou ypy tõ kaehxo exiketõ poe
Ritonõpo nymenekahpyry zumoxike sã enẽko matou? Moroto jũme Ritonõpo ehse exĩko mana.
17 Tykahu tõ tuhkãkõ jamihmãkõ maro Ritonõpo
Kuesẽkõ tooehse ypy Xinai poe tosary kurã pona.
18 Tõnuhse ynororo kakoxi, tynamoto tõ tuhkãkõ tarose tymaro; ahno nekarotyã tapoise eya, aomiry onymoipyra
exiketõ nekarotyã roropa tapoise eya.
Moroto Ritonõpo Kuesẽkõ ehse exĩko mana.
19 “Kure mase,” sykatone Kuesẽkomo a.
Kokoro rokẽ kuakorehmatorỹko mana tupime hkopyra kyrohmanohpotoh ehtohme kyya xine omoxĩ hkopyra aehtohme roropa!
Kypynanohnekõme mã ynororo.
20 Kuesẽkõ Kypynanohnekõme mana;
Ritonõpome mana Kuesẽkomo,
kypynanohtorỹko mana oorihpyra kuehtohkõme.
21 Tyzehnotokõ zupuhpyry hmõko mana,
tyyrypyrykõ rumekary se pyra exiketomo.
22 Ritonõpo Kuesẽkõ ynara nase yna a:
“Ozehnotokõ enehpõko ropa ase ypy Pasã poe.
Toto enehpõko ropa ase tuna konõto zue ae
23 oepytohkõme toto munuru ke,
oekykõ kaikuxi tunurukõ ke toto munuru emẽko mana.”
24 Ritonõpo orẽpyrahxo oytory enẽko mã toto emero,
atakenaka ytoketõ Ritonõpo ekahmãko, Jesẽ,
omõnõko mana Tytapyĩ kurã taka.
25 Eremiaketõ ytõko osemazuhme,
mokaro mykapo etyhpyryme rue etonanomo.
Mokaro rãnao oryximãkõ ytõko mana
tãpori tõ etonanomo.
26 “Kure mase,” kahtoko Ritonõpo eahmaryme,
oximõmãkomo ipoetory tomo.
“Kure mase,” kahtoko Ritonõpo Kuesẽkomo a,
Izyraeu pakomotyamo.
27 Pẽjamĩ tõ oehnõko osemazuhme,
jekyry tuhke hkopyra exiryke;
mokaro mykapo Juta tamuximãkõ oehnõko
tyekyry tõ maro; mokaro mykapo Zepurõ tõ
tamuximãkomo te, Napatari tõ tamuxiry tõ maro.
28 Ritonõpo, ajamitunuru enepoko yna a,
ajamitunuru ke takorehmase yna exiryke.
29 Atapyĩ Jerusarẽ po, morotona tynekarorykõ
arõko tuisa tõ mana,
30 Ejitu põkõ enaroximako, onokyroimo sã mokaro
mana sapisapiriimo htao exiryke samo;
Ritonõpo, imehnõ nonory põkõ enaroximako;
pui orutua kõ sã mã toto typoenõkõ maro, oeahmatohto
eya xine tosekumurukõ po, parata enepyryhtao
roropa eya xine tynekarorykõme oya.
Sapararahme tõsetapary se exiketõ aropoko.
31 Kowenu nenehpotyã oehnõko Ejitu poe;
Etiopia tõ roropa oehnõko, tomarykõ tanỹse kakoxi
tõtururume oya, Ritonõpo.
32 Oeremiatoko Ritonõpo eahmatoko, emero nono
põkomo, oeremiatoko Kuesẽkõ eahmatoko!
33 “Kure mase,” kahtoko Mokyro a, kapu ae kawaru po
ytokety a, moino ro kapu ao mana,
pakato ro mokyro.
Aomiry etatoko, konomeru konõto sã mana.
34 Oturutoko Ritonõpo jamitunuru poko;
imehxo aexiry Izyraeu tõ maro mana.
Ijamitunuru kapu ao mana.
35 Ritonõpo imehxo mana Itapyĩ kurã tae aepyryhtao,
Izyraeu tõ Esẽme mana!
Tyjamitunuru ekarõko typoetory Izyraeu tomo a.
“Kure mase, Ritonõpo!” kahtoko.