1 Dhali ka cima pesu/ peki’d mo tani aMariyam Magdaliyya dhala Mariyam jin ta KoYakuub mo dhala Saluuma mo uni yolki to kun ḵuyi mo ki ḵuy mo, wakan ki uni mini ii mo dhali ’koshki a’di i is mo be. 2 Dhali ki mo ta mon’thamo/ ka tee jin ṯwa/a/ ga dhas mo tani uni iikin mo e moŋ’kup̱aje mo ka tente/ sulki’d mo be. 3 Dhali uni ’kokin mo mmo/o gwo ka rem ’kup̱ mo ki: Kaja sa/ imidi ḵa’cki ana wosh ’peni ’twaman jis jwa mo? 4 Dhali uni hilki mo ’kup̱ ki mis mo dhali uni p̱arki wosh e mo mmo’daŋkalkunu a’di ka nyaŋ’ko’d mo haali/ a’di caaca mo be. 5 Dhali uni cic̱ki bwaman jis jwa mo dhali uni p̱arki wathin dhuruca kamu/ e mo mmoc̱a’bki me’da bim poros mo mmohi’th burrinye/ jin c̱a’bki bany bany mo dhali uni merkin mo. 6 Dhali a’di ki o uni gwo mo ki: Dhalku/ ki mer mo. Um ŋap̱kina Yesus gi Pa Naasira mo, a’di jin ’koshkunu jwa mo ki cwany’ciṯẖan dhul mo. A’di cuki mis mo be. A’di diki di imahan mo be. Hili mo mo ma, mo jin karkina uni a’di nycine/ mo. 7 Hili iiku/ mo dhali ṯor imanciḵ a’di gwo gwo mo dhala Buṯerus si’da/ ki a’di midi ya iṯwa/a/ ki um e Pany Jaliil mo. Dhali e mun mo tani um mini p̱ar a’di e mo me’d gwo jin ṯorkina a’di um mo be. 8 Dhali uni iikin mo dhali so ka ŋwac̱a/ ’peni moŋ’kup̱aje mo haali/ mo jin deenu is mo dhali momer mo p̱u’dki’d ap̱o/ uni mo be, dhali uni ’koki o gwoŋ kamu/ ṯal ’de/ mo ki wathiŋ kamu/ mo haali/ uni ḵo/ki is mo be.

9 Dhali ki a’di cukunu mis mo ka’tum ka cim jin ṯwa/a/ ka dhas yan mo tani a’di piki’da Mariyam Magdaliyya i is nṯwa/a/ mo a’di jin urkina a’di aruma ’cesh thusi pesu/ ka pije/ mo be. 10 Ayim yaki’d mo dhali ṯor to gwansan ki uni gwansan kun nyaḵki ’ko ki a’di mo ki uni ’kokin mo mmo’ko ki bwan diṯin mo dhali mmoko mo be. 11 Hili ki uni ciḵki gwo ki a’di diki’d ki e mo dhali mish ma yim mo tani uni ’koki gam gwom piti is mo be.

12 Dhali yan’ko’d mo tani a’di piki unin sun tiya i is mo ki jamasa kamu/ mo me’d jin iikina uni ibway mo mmo/ii bampa/ mo. 13 Dhali uni iikin ka nyaŋ’ko’d mo dhali ṯor aris to gwansan ki ’kwani ’baar mo. Hili uni ’koki gam gwom buni is mo be.

14 Dhali yan’ko’d mo tani a’di ki pi uni ’kume’d i’ce’dka ’de/ i is uni ’cena mo me’d jin ’kokina uni eya tharabeesa mo mmoshwa to mo. Dhali a’di ki ḵucur uni ki gwo mo gom gwom buni gun ’kona uni ki gam is mo dhali goma dum buni kun ’bitha’bi’th mo haali/ uni ’koki gam gwo gi uni gwansan is mo uni kun p̱arki a’di e mo ’ko’di pim piti jin piyunu a’di mo be. 15 Dhali a’di ki o uni gwo mo ki: Iiku/ mo e mony’ceshi ’baar mo dhali c̱i gwom ’borga/ eya ris ’kwani ’baar mo kun uḵkunu mo. 16 I/a’di jin midi gam gwo is mo dhali minu mii ki yi’de/ mo tani a’di iminu iwoṯẖ mo be. Hili a’di jin diki gam gwo is mo tani a’di minu waḵ mo be. 17 Dhali jamas mii gwansan mini baṯẖ uni gwansan kun gam gwo is mo: Ki gway pem mo tani uni mini ura ruma ’cesh ka pije/ mo dhali uni mini wal ’twa/ ki ’twan thisa tiya mo be. 18 Uni mini bu’th tasha/ mo. Dhali waḵki/ uni mini p̱i ton tiya kun ’kon ma ṯi’di cine/ mo tani a’di midi diki shi/ uni is mo be. Uni mini dhu me’d buni ap̱o/ uni gun ’ba’thkin mo, dhali uni minu wac̱ mo be.

19 Dhali yan’ko’d wakan Tap̱a Yesus ’ko’di a’di ṯorki gwo e uni mo tani a’di bu’thkunu mo bway momis mo dhali di’d mo mmoc̱a’b ka bim poros ma Arumgimis mo. 20 Dhali uni iikin mo mmoc̱i gwo mo eya ris mo ’baar mo dhali Tap̱a diki’d mo mmonyaḵka ṯu’c mii ki uni mo dhali mmo’da/ki uni gwo kun c̱ina uni sho’k mo ki jamas mii kun baṯẖkunu mo be. Amen