Gwom ’Borga/ Isi ki Gwo ma LUUKA mo
1
Gwo jin Yedhuwa Ṯẖawup̱iilus Sho’k mo
1 Haali/ me’d ’kwani ka ris kun bu’thki gwo mo mmotul gwo ’kup mo ka baṯẖ ’pen mo, gwo jin thimkunu mo e bwam ana mo, 2 jasi me’d uni kun c̱ikunu ana mo ki uni gwansan ’peni ka muŋ’kup̱ mo kun ta iman/o gwo ki e mo dhali imanmii gwo mo tani 3 a’di ṯoshka/ ki a’di ’boro’d gom aha/ si’da/ mo mmobaṯẖa aris to gwansan ki ’dishe/ mo haali/ goma cim gunn isa gush mo mmo’kwar uni ka roṯẖam p̱o/ mo gom /e mo /e jin tana Ṯẖawup̱iilus jin ta jim ’borga/ mo 4 ki /e mini mish gwoŋ gana/ mo gom gwo gi to gwansan kun ṯorkunu /e mo be.
Mondho’th ma Yohaan jin Mii’da Mii ki Yi’de/ Ṯorkunu Nṯwa/a/ mo
5 Dhali ka tee ma Hirodus jin ta’da maliḵ gi Pa Yahuudiyya mo tani agasiisa kamu/ diki’d mo jin yuḵu gway ka Sakariyya mo. A’di ta’da awaḵ ’peni ’kwani ma Abiyya mo. Dhali a’di ta’d gi ashim piti ’peni i’bwa/ ma Haruun mo dhali gway ma yim yuḵu ka Ilisabaaṯ mo be. 6 Dhali uni su/ mmonṯal ’de/ mo tani ta kuŋ ḵar/e mo ibwambor ma Arumgimis mo mmomii gwoŋḵan jin ’kwarkunu ’baar mo dhali a’di jin ona gwoŋḵan gi Tap̱a mo ki dar gi miiwaḵ mo be. 7 Hili uni dar ga ’ci mo haali/ Ilisabaaṯ a’di ta’da burum mo dhali uni su/ cakin ki yil mo be.
8 Dhali ki a’di di’d mo mmomiiya ṯu’c ma gasiis ibwambor ma Arumgimis mo ka waḵ piti ’kon aṯu’c mo tani 9 isi me’d mii ma gasiis mo tani to biṯki’da p̱o/ a’di mo, to jin biṯu mo jin mina a’di cic̱ e gu’b gi mondheleladhelel gi Tap̱a mo dhali duḵa ’bicajwahar mo be. 10 Dhali awaambuhany ’kwani ’baar mo ’kokina pije/ mo mmo’tho mo ka tente/ jin duḵuwa ’bicajwahar mo be. 11 Dhali aman’doyu gwo gi Tap̱a piki a’di i is mo mmodosh ki ’bana bim poros ma gwaṯa/ jin duḵuwa ’bicajwahar mo. 12 Dhala Sakariyya mur ma du mo mmop̱arkina a’di a’di e mo dhali moŋḵo/ is biṯki’da po/ a’di mo be. 13 Hili aman’doyu gwo ki o a’di gwo mo ki: Dhalki is ki ḵo/ mo ma, Sakariyya, haala ’thom pini ciḵkunu mo be dhali ashim pini ka Ilisabaaṯ midi dho’th /e ya/in mo dhali gway piti mina /e iyuḵ ka Yohaan mo be.
14 Dhali /e mina bwa ’kuny mo dhali ’bor bwa mo be,
dhali ’kwani ka ris mina bwa ’kuny mo gom mondho’th piti mo be.
15 Haali/ a’di midi eḵa/ eḵ mo mbwambori Tap̱a mo,
dhali a’di midi diki p̱i yimana mura’th jin ḵa/u ki ŋah ŋah mo walla tomp̱inum ’bi’thga/ mo,
dhali a’di minu ’tu’d mo ki Shi/in Dheleladhelel mo.
me’d jin dikina a’di ’peni bwaŋ kum mo be.
16 Dhali a’di midi ṯu’k iya/ ma Israyiil ka ris mo e Tap̱a Arumgimis buni mo be,
17 dhali a’di midi ya mbwambori a’di ki shi/in mo dhali gi mom’bi’th ma Iliyya mo,
mmoṯuka du gi icom ki uc̱i mo,
dhali uni gun ushi gwo ha e mo e moyuḵ gi uni gun miin ka ḵar/e mo,
mmothoson ’kwani is mo gom Tap̱a mo, ’kwani kun thosonkunu mo be.
18 Dhala Sakariyya thoḵki’da man’doyu gwo gwo mo ki: Yan miga/ mish kata mo? Haali/ aha/ si’da/ tana wathin dhan mo dhali ashim pem si’da/ a’di ca’d ki yil mo be. 19 Dhali aman’doyu gwo ki o a’di gwo mo ki: Aha/ tana Jibra/iil, a’di jin doshki’d e buŋ’kus ma Arumgimis mo, dhali aha/ hashkunu mo mmoc̱i /e gwo mo dhali mmoḵal /e gwom ’boro’d yansan mo. 20 Dhali hili mo mo ma, /e mini ta a’diye/ mo dhali mol gwo o mo ntaga tee ki to gwansan minu p̱u’d mo haali/ /e diki gam gwom pem is mo, a’di jin minu thim ki mom buni mo be. 21 Dhali ’kwani ’kokin mo mmoc̱ora Sakariyya mo dhali uni merkin mo mmotayina a’di adiiṯe/ mo e gu’b gi mondheleladhelel mo be. 22 Dhali ki a’di yayi’d ka pije/ mo tani a’di diki mish ’twa/ walki uni mo dhali uni nyiṯẖkin ki a’di p̱arki tonyjan e mo e gu’b gi mondheleladhelel mo, dhali a’di ki mii jamas mii mmoṯor uni mo dhali a’di di’d ka ’diye/ mo naskina/. 23 Dhali ki mo ma cim piti jin miikina a’diya ṯu’c ’baarki’d mo tani a’di doḵki bway pam piti mo be.
24 Dhali ’ko’da tee gwansan mo tani ashim piti ka Ilisabaaṯ bwaaki’d mo dhali ka ppe ’kona ’kup̱i mudhe’d mo tani ayim bagki is piti mo mmo/o gwo mo ki: 25 Tap̱a a’di mii’d kan e aha/ mo ka tee jin hila a’di ap̱o/ aha/ mo mmoḵal mowaḵ pem jin waḵu aha/ e bwaman ’kwani mo.
Mondho’th ma Yesus Ṯorkunu Nṯwa/a/ mo
26 Dhali ka ppe ’kona ’kup̱i pe’de/ mo tani aman’doyu gwo jin ta’da Jibra/iil mo a’di hashkunu mo ’peni Arumgimis mo e ’peŋkuman bampa/ gi Pany Jaliil mo jin yuḵu gway ka Naasira mo be, 27 eny nyaraŋ gana/ jin karkunu mo gom wathi/ jin yuḵu gway ka Yuusup̱ mo ’peni gu’b ma Dawuu’d mo, dhali nyaraŋ gana/ yan yuḵu gway ka Mariyam mo be. 28 Dhali a’di p̱u’dki’da yim mo dhali o gwo mo ki: Hayy, ayy, /en ’de/ jin gamkina ’the mo. Tap̱a a’di di’d e /e mo be. 29 Hili a’di yim mur ma du kagahara mo, gom gwo yan jin okunu mo, dhali kulum a’di e bwam piti mo gom monthe me’d yan midi ta atinta mo. 30 Dhali aman’doyu gwo ki o a’di yim gwo mo ki: Dhalku/ is ki ḵo/ mo ma, Mariyam, haali/ /e gamkina ’the ’peni Arumgimis mo be. 31 Dhali hili mo mo ma. /e mini bwaa e bwam pini mo dhali dho’th ya/in mo dhali /e mini yer a’di gway ka Yesus mo be.
32 Dhali a’di midi eḵ mo dhali minu yuḵ ki Ya/ gi a’di jin Cayaa/ e ki Ca mo.
Dhali Tap̱a Arumgimis midi c̱i a’di aḵursi ma ababam piti ka Dawuu’d mo be.
33 Dhali a’di midi ta tap̱a apo/ gu’b ma Yakuub ki sule/ mo,
dhali bampam piti midi di kan ki dar gi ’pemen mo be.
34 Dhali aMariyam thoḵki’da aman’doyu gwo gwo mo ki: Yan minu mish mii kata mo ki aha/ mola wathiŋ gwaṯẖ kan mo? 35 Dhali aman’doyu gwo thoḵki’da yim gwo mo ki:
Shi/in Dheleladhelel midi yayu/ apo/ /e mo,
dhali mom’bi’th gi a’di jin Cayaa/ e ki Ca mo midi ’kam /e ka la mo be.
Wakan a’ci jin minu dho’th mo tani a’di minu yuḵ ki jiŋ ḵogu mo,
a’di jin ta Ya/ ma Arumgimis mo be.
36 Dhali hili mo mo ma, abas pini ka Ilisabaaṯ si’da/ bwaaki’da ’ci ki yil jin can ma yim mo, dhali yansan ta’da ppe ’kup̱i pe’de/ mo ka yim jin yuḵu gway ka yima burum mo be. 37 Haali/ ka Arumgimis mo tani to p̱iyi’d jin molu mii mo be. 38 Dhala Mariyam o gwo mo ki: Hili mo mo ma. Aha/ tana c̱iŋkina/ nyara/ gi Tap̱a mo. Dhalki a’di miinu mo gom aha/ mo isi ki gwom pini mo. Dhali aman’doyu gwo yaki’d mo ’pena yim mo be.
Mariyam Buṯki’d, Uni ka Ilisabaaṯ mo
39 Dhali ka tee gwansan mo tani aMariyam cuki mis mo dhali ya mo ki jahanne/ mo e bampa/ gi paŋ ’kuwosh mo e ’peŋkuman bampa/ gi Pa Yahuudiyya mo. 40 Dhali ayim cic̱ki gu’b ma Sakariyya mo dhali theka Ilisabaaṯ me’d mo be. 41 Dhali ka Ilisabaaṯ ciḵki monthe me’d ma Mariyam mo tani a’ci p̱eki’d mo e bwa ma yim mo be. Dhali Ilisabaaṯ ’tu’dkunu mo ki Shi/in Dheleladhelel mo be, 42 dhali ayim ’terki cuuwa/ mo ka dhan ’twa/ jin caaca mo ki: Mom’bor mii gom /e e bwaman up mo dhali mom’bor mii gom maman gi bwam pini mo! 43 Dhali a’di yan c̱ikunu aha/ mo gomata mo? ka ta’da gi Tap̱am pem midi ’taki yayu/ i aha/ mo? 44 Haali/ hili mo mo ma. Ki ’twa/ jin thekina /e aha/ me’d mo p̱u’dki’d e bwany’cem pem mo tani a’ci p̱eki’d mo e bwam pem mo gom moŋ’kuny bwa mo be. 45 Dhali mom’bor mii goma yim, a’di jin gamki gwo is mo ki a’di minu thim mo, a’di jin okunuwa yim mo ’peni Tap̱a mo.
Gway ma Mariyam jin Maŋa A’diya Maŋ mo
46 Dhala Mariyam o gwo mo ki:
Aḵashiram pem eḵki Tap̱a mo,
47 dhali shi/in pem ’kunykina bwa mo eya Arumgimis jin ta’da Amanwoṯẖ pem mo,
48 haali/ a’di ki hil monyc̱a’b piti jin hatha nyarany c̱iŋkinam piti ’ko’d mo.
Haali/ hili mo mo ma. ’Peni shwane/ mo tani aris ’kwani ma nyaḵum yil mo mini yuḵ aha/ gway ki a’di jin ’boru mii mo be.
49 Haali/ a’di jin ta gi mom’bi’th mo tani miiki’da dhan to jin eḵki’d e aha/ mo,
dhali gway piti ḵogu mo be.
50 Dhali momiimiim piti di’d ap̱o/ uni gwansan kun ḵo/ a’di mo,
’peni uni gun tana nyaḵum yil ka nyaḵum yil mo be.
51 A’di ṯor ’bi’th piti ka bim piti mo be.
A’di ḵwa/ki uni gun dhu is ki ca mo e gwalal buni kun kuluma uni eya dum buni mo be.
52 A’di ki thul uni gun ta gi ’bi’th ka ’cesh mo ’pena ḵursin tap̱am buni mo.
Dhali a’di ki dhu uni gwansan ki ca mo kun hatha ’ko ’ko’d mo be.
53 A’di ki ’tu’d uni gun ’kosha ṯe/ mo ki tom ’boron mo,
dhali uni kun ta pa ki pa mo tani dhukina a’di ’pen bwa ’te/ mo be.
54 A’di woṯẖki c̱iŋkinam piti ka Israyiil mo,
mmoka momiimiim piti e mo be,
55 me’d gwo jin okina a’di ibabam bana mo be,
eya Ibrahiim dhali iya/m piti ki sule/ mo.
56 Dhala Mariyam c̱a’bki’d mo nyaḵki a’di me’da ppe ’kup̱i kwara mo dhali doḵ pam piti ka nyaŋ’ko’d mo be.
Mo jin Dhodhuwa Yohaan jin Mii’da Mii ki Yi’de/ mo
57 Dhali mo p̱u’dki’d mo goma Ilisabaaṯ mmodho’th mo be dhali a’di ki dhodha ’ci jin ta ya/ mo. 58 Dhali imannyaḵ ’kom piti dhala bas piti ciḵki gwo ki Tap̱a ṯorki dhan miim piti e a’di yim mo dhali uni ’kunykina bwa mo nyaḵka yim mo be. 59 Dhali ka cim ’koni pekwara mo tani uni p̱u’dkin mo mmo’ciṯẖa/ ’ciya munyjal yis mo, dhali uni mini ’taki yer a’di gway ka Sakariyya ’ko’di gway gi com mo, 60 hili kum piti o gwo mo ki: Yisa wakana. A’di minu yuḵ gway ka Yohaan mo be. 61 Dhali uni o a’di yim gwo mo ki: Abas piniŋ kamu/ yisa yuḵu ki gway gi wakan mo be. 62 Dhali uni c̱i a’di jamas mii mo gom com mo mmo/o ki a’di minu yuḵ kata mo? 63 Dhali a’di doṯki uni cwam ba’d is mo jin gwaju ka ’diŋkilan dham mo mmo’kwar to mo dhali a’di ’kwarki’d ki: Gway piti ka Yohaan mo be. Dhali uni ’baar mo merkin mo be. 64 Dhali ki jahanne/ ’twam piti ḵa’dki’d mo dhala le’d piti ’cuḵki’d mo dhali a’di oki gwo mo mmo’bora Arumgimis bwa i is mo be. 65 Dhali moŋḵo/ is p̱u’dki’d ap̱owa ris imannyaḵ ’kom buni mo. Dhali aris to gwansan ’kokunu mo mmo/o ki lala’th mo e bampa/ ’baar mo gi paŋ ’kuwosh gi Pa Yahuudiyya mo be. 66 Dhali aris uni kun ciḵki uni mo tani dhuki uni eya dum buni mo dhali o gwo mo ki: A’ci yan midi ta ata mo? Haali/ me’d gi Tap̱a di’d e a’di mo be.
Gwo ma Sakariyya jin Ona A’di Is mo
67 Dhali ababam piti ka Sakariyya ’tu’dkunu mo ki Shi/in Dheleladhelel mo dhali o gwo is mo mmo/o ki:
68 Mom’bor mii e Tap̱a Arumgimis gi ’Kwani ma Israyiil mo,
haali/ a’di yayi’d mo mmobuṯ mo dhali mmowan ’kwanim piti ’ba/ mo be.
69 Dhali a’di ki ’de’k ce gi mowoṯẖ gom ana mo,
e gu’b gi c̱iŋkinam piti ka Dawuu’d mo.
70 Me’d gwo jin okina a’di ki ’twa/ gi imanc̱i gwo ma Arumgimis kadhamo/ mo kun ḵogu mo ’peni kadhamo/ mo,
71 ki ana minu woṯẖ mo ’peni ’kup̱ bana mo,
dhali ’peni me’d ga ris uni gun shi/i ana i e mo,
72 mmo’baar momiimiim piti gun onu is mo gom ibabam bana mo,
dhali mmoka gwom piti e jin gamu me’d jin ḵogu mo.
73 Gwo yan jin ona a’di is jin thula a’di ababam bana ka Ibrahiim me’da p̱o/ mo,
74 mmoc̱i ana mony’cuḵ mo ’peni me’d gi uni gun ta ’kup̱ ki ana mo,
ki ana mina mii a’di to mo ki dar gi moŋḵo/ is mo be,
75 e mo gi ḵo/uwa ḵo/ mo dhali e mo ma ḵar/e mo ibwambori a’di mo ka cimi ’baar mo gi moŋ’koki/em bana mo.
76 Dhali /e jin tana ’ci mo, /e minu yuḵ ka manc̱i gwo ma Arumgimis jin Cayaa/ e ki Ca mo,
haali/ /e mini ya ibwambori Tap̱a mo dhali thoson a’di bway mo be,
77 mmoc̱i mo jin mishu mowoṯẖ bana mo e ’kwanim piti mo,
dhali e modhal miinthus buni ’pen mo be.
78 Ka du gi momiimii ma Arumgimis bana mo,
ka tee mini kush mo mo ap̱o/ ana ’peni momis mo,
79 mmoc̱i moŋkush e uni gwansan gun ’kokin mo e mondhurumi’d mo dhali eya la gi mowu mo,
mmoshu sho’k bana bway mo e bway gi moŋḵu’th is mo be.
80 Dhali a’ci ca’d mo dhali a’di ’bitha is mo e shi/in mo dhali a’di diki’d e mombwaasho mo ntaga tee jin ṯoru a’di eya tente/ e ’Kwani ma Israyiil mo be.