1 Zin moori ta len ŋgar ambaiŋana na, tikamam uraata be tiurpe ruumu kizin mi mboti ki wal kizin.

Mi zin moori kankaanaŋan ta tizorzooro na, mbulu kizin ipasansaana ruumu kizin mi mboti ki wal kizin.✡ Tut 12:4, 19:14, 31:10+; Rut 4:11

2 Sombe tomtom sa ipa pai kini ma ambai men pa Yooba mataana, ina iswe i kembei ni imototo Yooba, mi ileŋleŋ la kalŋaana.

Mi sombe tomtom sa itoto zaala pakaamŋana, ina iswe i kembei ni irepilpiili Yooba kembei koroŋ sorok.

3 Wal kankaanaŋan ta tizorzooro na, sua kizin talliŋana ta iwe uunu pizin be teene ikan zin.

Mi wal ta len ŋgar ambaiŋana na, sua kizin iporoukalkaala zin ma timbotmbot ambai.

4 Sombe tiŋgiimi lende bapolo, nako lende uraata be tuputu i. Mi irao tomoto pa ka uraata pepe.

Pa ulaaŋa tabe ni ipimiili piti i, ko biibi ma ilip. Ko ikam ma mokleene kiti ipiyooto kini boozo.✡ Tut 12:10

5 Tomtom ŋonoono isombe ipombol tomtom toro sua kini, na irao ipakaam na som.

Mi sombe tomtom pakamkaamŋana sa ipombol tomtom toro sua kini, na irao tendemeere sua kini tana na som. Pa zin wal ta kembei, kwon bok pa sua pakaamŋana.

6 Tomtom ta so ipakurkur itunu mi irepilpiili ŋgar ambaiŋana, sombe iru ŋgar ambaiŋana, nako irao indeeŋe na som. Ko ike pini.

Mi zin wal ta ŋgar kizin ipet kek, nako imarra pizin be tikam len ŋgar pakan ma isala ki.

7 Wal kankaanŋan ta tizorzooro na, garrau zin pepe. Mbotmbot molo pizin.

Pa ŋgar ambaiŋana sa ko irao iyooto pa kwon na som.✡ Ep 5:15

8 Wal ŋgarŋan na, matan iŋgalŋgal zitun mi tikamam ŋgar pa zaala ta titoto na: Zaala tana ambai, som ambai som?

Mi wal kankaanaŋan ta tizorzooro na, ŋgar kizin talliŋana ipakankaana zin.

9 Sombe tomtom sa ikam patoronŋana pa sanaana kini, na wal kankaanaŋan ta tizorzooro na, ko tikam sua repiiliŋana pini.

Mi zin wal ta tikamam kat mbulu na, Anutu leleene pizin.

10 Tomtom toro sa irao iute kat lelende na som.

Pa sombe lelende ipata kat, som menmeen ti biibi, na iti itundu men ta tayamaana.

11 Mbotŋana kizin wal sananŋan ko kembei ruumu ta ibuuzu ma borok su lene.

Mi zin wal ta tikamam kat mbulu na, mbotŋana kizin ko kembei ruumu ta imbol ma imbotmbot.✡ Tut 10:25; Mt 7:24-29

12 Zaala pakan ta tomtom titoto na, tindemeere ma tiso ko zaala ambaimbaiŋan.

Mi som. Ina zaala ki meeteŋana.✡ Mt 7:13-14,21-23

13 Wal pakan tizeŋzeeŋge sorok. Tamen lelen na, ambai som.

Mi tomtom pakan ta koozi lelen ambai mi menmeen zin na, kaimer ko lelen ipata.

14 Tomtom ta so ipizil ndemeene pa zaala ki Anutu, nako ire kat kadoono pa mbulu kini tana.

Mi wal ambaimbaiŋan ta kembena. Zin ko tikam len kadoono ambaiŋana pa mbulu ta tikamam na.

15 Zin wal ta len ŋgar biibi som na, tikanan la sorok sua ta boozomen.

Mi wal ŋgarŋan na, tikamam ŋgar pa zaala ta titoto na: Zaala tana ambai, som ambai som?✡ Tut 4:26

16 Tomtom ta le ŋgar ambaiŋana na, imototo kana mi imbotmbot molo pa koroŋ sananŋan.

Mi wal kankaanaŋan ta tizorzooro na, tipase pa zitun ma tiso tirao. Tanata timototo som, mi tikamam mbulu talliŋana tabe ipasaana zin i.✡ Tut 28:14

17 Tomtom ta so keteene malmal karau, nako ikam mbulu talliŋana.

Mi zin wal ta gorgori tirru zaala be tikam mbulu sananŋana na, tomtom tiurur koi pizin.✡ Tut 12:16, 16:32; Tit 1:7; Yems 1:20

18 Zin wal ta len ŋgar biibi som na, tipamalmaala mbulu kizin talliŋana, kembei zin naroogo kan tipamalmaala aigau kizin.

Mi zin wal ta len ŋgar ambaiŋana na, ŋgar kizin tana iswe zin kembei zan bibip, kembei mogar ta zin king tiurur na.

19 Wal sananŋan ko tilek kumbun pizin wal ambaimbaiŋan.

Ko tilala pa wal ndeeŋeŋan ruumu kizin kwon kwon, mi tipakurkur zin.✡ Tur 3:9

20 Wal sorrokŋan na, waen bizin tiurur kat lelen pizin som.

Mi zin wal ta mbio uunu na, len tomtom boozo.✡ Tut 19:4,7

21 Tomtom ta so mata pasom waene bizin, ina ni ikam sanaana.

Mi tomtom ta so imuŋaiŋai zin wal ta timbot ŋoobo na, ni ko leleene ambai mi kampeŋana biibi imbotmbot se kini.✡ Mbo 41:1; Tut 22:9, 31:9; Mt 5:7; Yems 2:12-16

22 Zin wal ta lelen iurur pa mbulu sananŋana na, tisaŋsaŋ pa zaala ambaiŋana kek.

Mi tomtom ta so irru zaala be ikam mbulu ambaiŋana pizin tomtom, na tomtom ko tiurur kat lelen pini. Irao tizemi na som.

23 Uraata boozomen ta so takam kat, inako iuulu iti.

Mi sombe tombomboorende men, mi toyyo kwondo pa sua soroksorok, nako molo som to tusu ma tombot ŋoobo.✡ Tut 21:5

24 Zin wal ta len ŋgar ambaiŋana na, tirao kat pa koroŋ boozo, mi koroŋ kizin tana iswe zin kembei zan bibip, kembei mogar ta zin king tiurur na.

Mi wal kankaanaŋan ta tizorzooro na, ta kembena. Mbulu kizin talliŋana ta izzwe zin.

25 Tomtom ta so ikam ŋoobo mbulu sa som, mi tipamenderi sorok be tipuni ma imeete, sombe le gaabaŋana sa be iso sua ŋonoono mi ipombol sua kini, na gaabaŋana tana ko irao be ikamke i.

Mi sombe tomtom pakamkaamŋana sa ipombol tomtom toro sua kini, na irao tendemeere sua kini tana na som. Pa sua kini tana ko pakaamŋana.

26 Tomtom ta so imototo Yooba mi ileŋleŋ la kalŋaana, nako ipase pa Yooba be iporoukaali.

Mi lutuunu bizin tomini ko tipase pa Yooba be iwe ur pizin.✡ Tut 18:10, 20:7

27 Mbulu ki tomototo Yooba mi teleŋleŋ la kalŋaana, ina kembei yok bukbukŋana ta ipiyotyooto mbotŋana ambaiŋana piti.

Pa ipiŋgisŋgis kumbundu pa kilis boozomen tabe ikam ti ma temeete i.✡ Tut 13:14

28 King sa, sombe imborro iwal biibi, nako niini ise mi ikam zaana biibi.

Mi sombe imborro wal boozo som, inako mbotŋana kini isaana, mi zaana biibi som.

29 Sombe tomtom sa leleene luumuŋana, ina iswe i kembei ni le ŋgar biibi.

Mi tomtom ta so keteene malmal karau, ina ni ipamaala mbulu kini talliŋana ma imbot kat mat.✡ Tut 16:32, 17:27, 19:11; Yems 1:19

30 Sombe lelende ambai, nako ikam ma kulindi imbot ambai tomini.

Mi sombe matanda mburmbur, inako ikam mete piti.

31 Tomtom ta so ikototo zin wal sorrokŋan, ina ni irepilpiili Anutu ta iur zin na.

Mi sombe tomtom sa ikampewe zin wal ta timbot ŋoobo, inako iwe zaala pa Anutu be ikam zaana biibi.✡ Tut 17:5, 22:2; Mt 25:40; Yems 3:9

32 Mbulu sananŋana ta wal sananŋan tikamam na, ko ipasaana zitun.

Mi sombe wal ndeeŋeŋan timeete, na Anutu ko iwe ur pizin be tike lela ma timbot ambai.✡ Mbo 49:14-15

33 Zin wal ta ŋgar kizin ipet kek na, lelen iwe kembei ŋgar ambaiŋana muriini be imbotmbot pa.

Mi wal kankaanaŋan ta tizorzooro na, ŋgar ambaiŋana sa imbotmbot la lelen som.

34 Lele sa, sombe tikamam mbulu ndeeŋeŋana men, nako zan iwe biibi.

Mi sombe tinoknok sanaana, ina ipamiaŋ zin.

35 Mbesooŋo sa, sombe le ŋgar ambaiŋana, nako king leleene pini ilip.

Mi sombe mbesooŋo sa ipamiaŋ biibi kini, nako biibi kini keteene malmal pini.✡ Mt 24:45-51, 25:14-30