Lad hur Si Liq Phu Awg Suhx 1 Per troq liq 2

1 Kheh te cheaq te lehq, haeg che awg gha lia he lehq her ka che awg gha lia, ma hez che te che, soer che he lehq khaex che awg gha lia haq chid bag lar haz-oq. 2 A meha heh pawag che chaw yad nehax heh te lehq, co ha phawd awr daq jad che cux pehz ghig haq khar thad liz dawg gad chehd-oq. Co ha phawd awr ve cux pehz ghig* haq cud lehq, nig hehd ve thaer khuhq che awg khuhn pong thad kha gag nig hehd ir lag muh lag tug yaog. 3 Awg lawn ghod ver, Jawd mawd Ghig sa ve har kax vix jad che ted ceng haq nig hehd sir vehor.

Teq chehd che huhx meh dig awg lawn

4 Jawd mawd u ve geh lar-oq. Yawd awr lehr teq chehd che huhx meh dig† phehq che yaog. Chaw yad yawd haq chid bag liz, Ghig sa yawd haq lez yug lehq, awg phuhd khaz jad che lehz sawnr lar che yaog. 5 Nig hehd liz teq chehd che huhx meh dig teq pa heh te lehq, Ghig sa nig hehd haq yug lehq co ha phawd awr ve yehg‡ te tug, a sug yawd awg ton Ghig sa haq chid aq vid-oq. Co ha phawd awr ve tand tug teq pa§ haq nig hehd gha tand tug, Ghig sa nig hehd haq daq kehg che paw khod teq pa phehq vid vehor. Nig hehd Yer suq Khreq haq cud lehq tand che haq te lehq, tand tug u ve teq pa haq Ghig sa haq yug che yaog. 6 Awg lawn ghod ver, Liq phu awg khuhn che kheh koz buhq lar che,

†Ngawx-oq, ngag lez yug lar che, awg phuhd khaz jad che huhx meh dig haq

Yid onr* awg khuhn

awg cuhz penr awg cir huh ngag kawx lar che yaog.

Huhx meh dig u ve haq kha yonr che chaw awr lehr maq gha yaq taw,

lehd koz lar che yaog. 7 Kheh te lehq, nig hehd kha yonr che chaw teq pa awg pun, yawd awr lehr awg phuhd khaz jad che yaog. Kheh ma khuhd, maq yonr che chaw teq pa awg pun awr lehr, Liq phu khuhn buhq lar che heh,

†Yehg kawx sehr phad teq pa chid bag lar che huhx meh dig awr lehr,

awg cuhz penr awg cir huh ve huhx meh ted dig phehq vehor.

8 †Kheh te lehq, chaw yad khi thid pog lehq,

kuhd tug huhx meh dig liz phehq che yaog,

lehz buhq lar che yaog. I hehd Ghig sa ve tawd khuhd haq maq na yug che haq te lehq, i hehd khi thid pog lehq kuhd che† yaog. I hehd che kheh phehaq tug awg pun, awg kawd thad huh liz Ghig sa koz teh lar peor.‡

Ghig sa ve awg yad awg dug phehq che awg lawn

9 †Nig hehd awr lehr, Ghig sa lez yug lar che chaw ceng phehq lehq Jawd mawd Ghig sa ve paw khod§ phehq che yaog. Daq keng che muhd mig yad liz nig hehd phehq lehq Ghig sa ve awg yad awg dug liz phehq che yaog. †Yawd ved daq jad che awg lawn su haq koz mar vid tug, awg ceng che teq pa nig hehd phehaq che yaog. †Yawd ved daq jad che awg ghiz awg khuhn gehag tug, naz hoq che awg khuhn yawd nig hehd haq kug tuhaz vehor. 10 Awg kawd thad, nig hehd awr lehr Ghig sa ve chaw ceng ma hez. Kheh ma khuhd a meha awr lehr, nig hehd Ghig sa ve chaw ceng phehq vehor. Awg kawd thad nig hehd awr lehr, har kax che awg bon haq maq gha. Kheh ma khuhd a meha har kax che awg bon haq nig hehd gha vehor.

Ghig sa ve awg ceg teo

11 Haq che chaw teq paog, mig gig khod-aq lo nig hehd khehx chaw heh phehq che haq te lehq, co ha haq bawz daq chehd che awg suhr awg sar a lor haq jaw kae tug, ngag nig hehd haq lawg khawx che yaog. 12 Khreq yad ma hez che chaw teq pa mehz khuhd suhr nig hehd daq che awg lid awg khad haq lehax teo. A meha i hehd nig hehd haq khaex lehq vend bax tar chehd liz, i hehd suhx jehg che awg ni* gaeg che te yand, nig hehd ve daq che kanx haq gha mawg lehq Ghig sa haq chid ir chid muh tug yaog.

13 Jawd mawd Khreq awg pun, chaw yad teq pa teh lar che uq penr tug awg gha lia awg huhx lo chehd-oq. Awg gha lia awg khod-aq ir sehr phad Jawd mawd nux† te lehq uq penr che awg huhx lo lehd ma koz kha nehax chehd-oq. 14 A sug yawd ved muhd mig haq uq penr che jawd mawd teq pa awg huhx lo liz kha nehax chehd-oq. Haeg che haq te che chaw haq cir yanr vid lehq, daq che haq te che chaw haq chid muh vid tug, Jawd mawd nux i hehd haq peha lar che yaog. 15 Awg lawn ghod ver, nig hehd daq che haq te che haq cud lehq, maq sir vix ma duhd ngawx vix che chaw teq pa‡ nig hehd haq mad daq che teq chaweh ca koz maq gha lehq taq chuhax chehd cuh vid tug te che awr lehr, Ghig sa ni ma cawd che yaog. 16 Nig hehd pong vehr che chaw§ phehq che yaog. Nig hehd pong vehr che haq yehd lehq haeg che haq taq te. Kheh ma khuhd, Ghig sa ve awg ceg heh te-og. 17 Chaw awg gha lia haq yawz yan-o.* A vix a nax Khreq yad teq pa haq haoq. Ghig sa haq kuhz-oq. Jawd mawd nux haq yawz yan-o.

18 Awg ceg teq paog, nig hehd ve awg sehr phad teq pa haq kuhz lehq i hehd awg huhx lo kha nehax chehd-oq. Ni ma daq lehq nud nehg che awg sehr phad teq pa haq lehax ma hez. Haeg che awg sehr phad teq pa awg huhx lo liz kha nehax chehd-oq. 19 Nig hehd vend bax mad cawg liz, Ghig sa haq duhd nuhd che haq te lehq, su du deh ax che haq gha khanr lehq yeg khanr ver, Ghig sa ni ma cawd che yaog.† 20 Nig hehd vend bax te che haq te lehq su dawz ax che haq yeg khanr ver, a thoq maq chid muh tug cawar le. Kheh ma khuhd, daq che haq te che haq te lehq, tuq che khanr che haq gha khanr che te yand yeg khanr ver, Ghig sa ni ma cawd che yaog. 21 Awg lawn ghod ver, u kheh te gha khanr tug, nig hehd haq kug yug lar che yaog. Khreq liz nig hehd awg pun gha tuq gha khanr lehq, nig hehd yawd ved khi ho awg khad haq ghaq kae tug, nig hehd awg pun hend kig jawg kig yawd te lar haz vehor. 22 †Yawd awr lehr vend bax maq te jaw.‡ Yawd ved mawq kaw khuhn her ka che tawd khuhd liz ma tuhaz jaw. 23 Su yawd haq kha muhd kha na koz che te yand, yawd su haq kha muhd kha na mad kawq koz khuhq. Yawd gha tuq gha khanr che te yand, su haq kawq te khuhq tug yaog lehz yawd mad kawq koz khuhq. Kheh ma khuhd yawd thed-e ghad cawd-aw ghad Suhx jehg sehr phad Ghig sa ve laq khuhn yawd awg ton haq kawq cax aq vid che yaog. 24 Suhz mehz duh thag huh yawd gha khanr suh thad, yawd awg ton awg khuhn a nig ved vend bax haq yawd puhd cuhx lar che yaog. A nig a sug yawd ved vend bax haq saw chid bag lar haz lehq, thed che cawd che awg khuhn gha teq chehd tug, yawd khanr suh che yaog. Yawd ved nag kig haq te lehq nig hehd na vehr che yaog.§ 25 Nig hehd awr lehr, awg kawd thad yaq kaw yaq lehq mehx vehr che yawg heh phehq che yaog. Kheh ma khuhd, a meha awr lehr nig hehd ve co ha haq ngawx haq sax sehr phad he lehq Yawg huhx var* geh nig hehd kawaq vehor.

*2:2 2:2 Co ha phawd awr ve cux pehz ghig Ghig sa ve tawd khuhd haq koz che yaog. Chid 119:103

†2:4 2:4 teq chehd che huhx meh dig Yer suq haq koz che yaog. Isy 28:16

‡2:5 2:5 co ha phawd awr ve yehg Awg ha phu chehd lehq kanx te kig bon yehg lehd koz gad che yaog. 1K 3:16-17

§2:5 2:5 tand tug teq pa Awg ton, phu tand, med nged jeg kor, chid muh khuhd, bon lawg khuhd haq koz che yaog.

†2:6 2:6 Isy 28:16

*2:6 2:6 Yid onr Yer ruq sar lehnr med haq koz gad che yaog.

†2:7 2:7 Chid 118:22

†2:8 2:8 Isy 8:14

†2:8 2:8 khi thid pog lehq kuhd che Yer suq haq maq yonr che chaw gha lug gha sez che haq koz che yaog. Yh 3:36

‡2:8 2:8 Ghig sa koz teh lar peor Rm 8:28-30, 9:14-18 haq ngawx.

†2:9 2:9a Tuhz 19:6

§2:9 2:9 paw khod Chaw yad he lehq Ghig sa awg kar lo kanx te par haq koz che yaog. Gal 3:22-29

†2:9 2:9b Isy 43:21

†2:9 2:9c Isy 43:20

*2:12 2:12 suhx jehg che awg ni Ghig sa suhx jehg suhx taz che haq koz che yaog. Pheq 20:11

†2:13 2:13 Awg gha lia awg khod-aq ir sehr phad Jawd mawd nux Kehd sar haq koz che yaog.

‡2:15 2:15 maq sir vix ma duhd ngawx vix che chaw teq pa Maq yonr che chaw haq koz che yaog.

§2:16 2:16 pong vehr che chaw Vend bax khuhn pong che haq koz che yaog. 1:18, Yh 8:32

*2:17 2:17 yawz yan-o Chaw yad awr lehr Ghig sa ve awg hoq awg han khuhn te phanr lar che haq te lehq, te ghad haq te ghad yawz yan cawd che yaog. Khiz 1:27

†2:19 2:19 Ghig sa ni ma cawd che yaog Che haq te lehq Ghig sa bon naq ax tug yaog lehd koz gad che yaog. Mt 5:11-12

†2:22 2:22 Isy 53:9

‡2:22 2:22 vend bax maq te jaw 1:19, Cy 3:14, 2K 5:21, He 4:15, 7:26.

§2:24 2:24 na vehr che yaog Co ha phawd awr daq kehg vehr che haq koz che yaog. Isy 53:5,12

*2:25 2:25 Yawg huhx var Yer suq haq koz che yaog. Yh 10:11, 1Pt 5:4