1 Per troq liq
Awg meh he lehq phehq peg che awg lawn
Liq che ve haq haq yug che chaw teq pa vawr, tuq che khanr che he lehq su du deh che awg ceng teq pa haq gha khanr mad jad chehd che yaog. Lex lehq, maq muh muha ver, u ve haq keh hehnd jad ir jad che tuq che khanr che haq liz, laex pun gha kawq khanr mad jad tug ser che yaog. Liq che ve te koz vawr, Rod maq muhd mig ted kag gha lia lo kha chehd che Khreq yad teq pa haq buhq vid lar che yaog. Awg cehg mag koz ver, liq che ve te koz haq haq yug tug chaw teq pa haq “mig gig che khod-aq lo khehx chaw heh te chehd che chaw” lehd koz kug lar che yaog.
Buhq var he lehq buhq che awg yand
Buhq var yawd ved awg ton haq Yer suq Khreq ve cuh yad Per troq lehd koz lar che yaog. Kheh te lehq, liq che ve te koz khuhn buhq lar che awg lawn he lehq buhq khad teq pa liz, Per troq buhq lar che haq sax khiz khanr che yaog. U ve teq pa haq keh liz lex lehq, liq che ve te koz haq ngawx ver, Ha lehg che bon khuhd liq teq pa he lehq Cuh yad liq ve rar sar vanr (Awg lawn pir) he lehq tawd khuhd yehd che awg khad haq gha mawg che yaog. Kha sehax koz ver, Per troq yaw lar che tawd khuhd teq pa haq mawg gha che yaog. Liq che ve te koz haq A.D. 64 khuhq thad huh buhq lar che yaog.
A yed ir che awg lawn he lehq awg lawn kha peg
Per troq liq awg khuhn, Khreq yad ve yonr khad nux teq pa ve awg lawn he lehq mad awr ve Khreq yad teq pa ve a saq teq khad he lehq te kenr te cawd che kanx teq pa haq koz buhq lar che yaog. Liq che ve te koz vawr, phaz daq che liq, tuq che khanr che he lehq du deh che liq, tuq che khanr che he lehq awg mig awg phond liq, duhd law che liq, yonr che awg khuhn yaq kaw tod kae che liq, ni mag tag che he lehq Ghig sa ve har kax che awg bon haq koz lar che liq te koz phehq che yaog. Liq che ve te koz awg khuhn, daq kehg che a saq teq khad cawg tug awg pun awg ghad pid lehq u kheh te che a saq teq khad cawg tug kha sehax lawg khawx lar che yaog. Lex lehq, Jawd mawd Yer suq Khreq ni pawz te pawz kawq yaq tug haq duhd law che awg khuhn, u kheh te ghu hehnd lehq law chehd lar vid tug haq koz lar che yaog.
Awg lawn nux
1. Awg kawd ve tawd (1:1-2)
2. Ghig sa ve har kax che awg bon he lehq thaer khuhq che haq chid muh che (1:3-12)
3. Daq che kehg che a saq teq khad (1:13-5:11)
4. Liq che ve te koz ve duhd law kig (5:12)
5. Awg leh med ve tawd (5:13-14)
1
Awg chawd teq pa haq duhd nuhd che tawd
1 Ngag awr lehr, Yer suq Khreq ve cuh yad Per troq* 1:1 Per troq Yer suq lez yug lar che awg laq ghuhd phehq che yaog. Mt 16:18 yaog. Phaz daq lehq,† 1:1 Phaz daq lehq Du deh che haq gha khanr che haq te lehq, kheh te phaz daq veh che yaog. Por tuq, Gar lar tiq, Kar par dawd kiq, Ar siq he lehq Ber tud niq muhd mig teq pa awg khuhn lo te pawz te yand ca chehd veh vehr che chaw teq pa haq ngag liq buhq ax che yaog. 2 Yer suq Khreq haq na yug lehq, yawd ved awg suhr nig hehd haq puhr vid tug,‡ 1:2 yawd ved awg suhr nig hehd haq puhr vid tug Yer suq Khreq ve awg suhr i hehd ve vend bax haq chuhd phu chuhd kehg vid tug haq koz che yaog. a mig thad lo liz Awr pa Ghig sa nig hehd haq lez yug lar lehq,§ 1:2 lez yug lar lehq Ghig sa ve chaw phehq che haq koz ax che yaog. Ef 1:4 Awg ha phu nig hehd haq daq vid kehg vid peor. Awg bon awg sinx he lehq duhd sa gad sa tug nig hehd awg khuhn mad-ag vid-oq.
Duhd law kig cawg che awg lawn
3 A nig ved Jawd mawd Yer suq Khreq ve Awr pa Ghig sa haq chid muh-o. Yawd har kax vix jad che haq te lehq, a nig chaw awg suhx* 1:3 chaw awg suhx Yer suq khuhn vend bax chuhd phu peg che Khreq yad haq koz che yaog. phehq vehr lehq, teq chehd che duhd law kig cawg vehr che yaog. Duhd law kig u ve awr lehr, Yer suq Khreq suh kig lo kawq teq tuag che haq te lehq cawg vehr che yaog. 4 Kheh te lehq, a nig Ghig sa ve awg sinx cad sehr phad† 1:4 awg sinx cad sehr phad Yer suq haq yonr che haq te lehq gha lar che daq jad che co ha teq che awg bon laq sawnr haq koz che yaog. teq pa phehq vehr che yaog. Ma kid mad lug vix che, daq kehg che he lehq ma pehz vix che awg sinx u ve haq muhd nuh maq lo nig hehd awg pun yawd haq sax lar che yaog. 5 Awg leh med teq ni‡ 1:5 Awg leh med teq ni Ghig sa suhx jehg suhx taz che awg ni haq koz che yaog. thaer khuhq che haq kha sehax pheq mar ax thad kha gag, nig hehd yonr che haq te lehq Ghig sa yawd ved kand pax haq cud lehq nig hehd haq haq sax chehd lar che yaog.
6 Kheh te cheaq te lehq, a meha te pawz te yand awg khuhn, lawnd ngawx che laex ceng haq nig hehd gha tuq gha khanr cawd liz, ha lehg chehd-oq. 7 A mir awg khuhn si haq lawx che heh, tuq khanr che che teq pa awr lehr nig hehd awg cehg mag yonr che ni ma haq lawnd ngawx che yaog. Nig hehd yonr che ni ma awr lehr, lug vix sez vix che si haq keh awg phuhd khaz jad che yaog. Nig hehd awg cehg mag yonr yeg ver, Yer suq Khreq kawq yaq che§ 1:7 Yer suq Khreq kawq yaq che Suhx jehg suhx taz tug yaq che haq koz che yaog. 1Th 2:19, 5:23 te yand, chid muh che, awg mig awg phond he lehq tar ir tar muh che haq nig hehd gha tug yaog. 8 Yawd haq nig hehd mad mawg jaw liz, nig hehd yawd haq haq chehd che yaog. A meha yawd haq mad mawg liz, nig hehd yawd haq yonr che haq te lehq, awg mig awg phond* 1:8 awg mig awg phond Ghig sa tar ir tar muh vid tug haq koz che yaog. ir jad che he lehq ca koz mad peg che ha lehg che nig hehd geh cawg che yaog. 9 Awg lawn ghod ver, nig hehd yonr che awg sir haq gha haq yug chehd che yaog. Awg sir u ve awr lehr, nig hehd ve co ha thaer khuhq che haq gha che yaog.
10 Thaer khuhq che che ve haq Ghig sa ve cuh kar var† 1:10 cuh kar var Ghig sa koz cuh che tawd su haq ca koz vid che chaw haq koz che yaog. teq pa kha nehax na ngawx lehq ca ngawx peor. Ghig sa nig hehd haq awg bon pehar tug awg lawn, a mig thad lo liz i hehd bon mar peor. 11 Cuh kar var u ve teq pa awr lehr, Khreq ve Awg ha phu, “Khreq gha tuq gha khanr lehq awg khaz nuhr awg mig awg phond gha tug yaog,” lehd koz lehq i hehd haq mar vid che heh, mig gig yad haq thaer khuhq tug, khar ve te ghad, khar ve te yand lehq nar, i hehd ca ngawx peg che‡ 1:11 i hehd ca ngawx peg che Isy 49:1-6, 50:4-7, 52:13-53:12 yaog. 12 Cuh kar var u ve teq pa te che kanx awr lehr, i hehd awg pun ma hez, nig hehd awg pun yaog lehz Ghig sa i hehd haq pheq mar vid lar che yaog. Kanx u ve awr lehr, a meha su nig hehd haq mar ax che ha lehg che bon khuhd yaog. Nig hehd haq mar ax che chaw u ve teq pa awr lehr, muhd nuh maq lo peha che§ 1:12 muhd nuh maq lo peha che Ghig sa lag peha che haq koz che yaog. Daq che kehg che Awg ha phu haq cud lehq nig hehd haq mar ax che yaog. Awg ceng u ve teq pa haq muhd nuh maq cuh yad teq pa liz mawg gad jad che yaog.
Daq che kehg che haq te tug awg lawn
13 Kheh te cheaq te lehq, nig hehd ni ma ghu lar lehq sa tiq tar chehd-oq. Yer suq Khreq kawq yaq che te yand, nig hehd haq pehar tug awg bon haq kha nehax duhd law lar-oq. 14 A mig thad nig hehd maq sir ser thad,* 1:14 nig hehd maq sir ser thad Khreq yad mad phehq ser thad lehd koz gad che yaog. a sug yawd ved awg suhr awg sar a lor awg khad haq te che heh, a meha tad kawq te. Na yug vix che chaw yad nehax heh teo. 15 Nig hehd haq kug yug che Ghig sa daq kehg che heh, nig hehd kha te che awg lid awg khad awg gha lia awg khuhn daq kehg vid-oq. 16 Awg lawn ghod ver, † 1:16 Ak 19:2Ngag daq kehg che haq te lehq, nig hehd liz daq kehg vid-oq lehz, Liq phu khuhn buhq lar che yaog.
17 Ghig sa geh nig hehd bon lawg thad, A pa-og lehz nig hehd koz lehq yawd awr lehr chaw mehz khuhd haq maq ngawx lehq, a sug yawd te che kanx haq ngawx lehq suhx jehg che yaog lehz sir ver, nig hehd mig gig khod-aq lo khehx chaw† 1:17 khehx chaw Mig gig khod-aq lo te cuhx te yand gha chehd che haq koz che yaog. te chehd che te yand, yawd haq yawz yan che awg khuhn teo. 18-19 A pux a pi teq pa geh gha che awg bon mad cawg che awg lid‡ 1:18-19 A pux a pi teq pa geh gha che awg bon mad cawg che awg lid Khreq yad mad phehq ser thad yehd che (mad daq che) awg lid awg pir haq koz che yaog. awg khad teq pa haq pong tug, yawd nig hehd haq thaer khuhq lar che yaog. Lug vix sez vix che phu si haq yehd lehq thaer khuhq ax che ma hez. Kheh ma khuhd, awg phuhd khaz jad che Khreq ve awg suhr nig hehd haq thaer khuhq lar che haq nig hehd sir che yaog. Awg suhr u ve awr lehr, awg kix awg hawehd mad cawg lehq awg meg mad cawg che yawg nehax§ 1:18-19 yawg nehax Id sar rer laq chaw Ghig sa haq tox tand huh yehd che to nud to saz ted ceng phehq che yaog. Tuhz 12:5, Ak 16:1-34 awg suhr heh phehq che yaog. 20 Mig gig haq maq te phanr ser thad liz, kheh te gha te khanr tug, Ghig sa yawd haq lez yug lar che yaog. Kheh ma khuhd, awg leh med ve awg yand* 1:20 awg leh med ve awg yand Yer suq kawq yaq lag tug awg yand haq koz che yaog. He 1:1 che awg khuhn, nig hehd awg pun Ghig sa yawd haq peha lar che yaog. 21 Khreq haq te lehq nig hehd Ghig sa haq yonr che yaog. Ghig sa yawd haq suh kig lo kawq teq tuag vid lehq, awg mig awg phond pid che yaog. Kheh te cheaq te lehq, nig hehd yonr che awg ceng he lehq duhd law che awg ceng Ghig sa awg khuhn cawg che yaog.
22 Nig hehd awg cehg mag cawd che haq na yug che† 1:22 awg cehg mag cawd che haq na yug che Bon khuhd mar ax che heh te na yug lehq a saq teq che haq koz che yaog. haq te lehq, a vix a nax teq pa haq awg cehg mag haq gha tug, nig hehd ve co ha daq vehr kehg vehr che yaog. Kheh te lehq, nig hehd ni ma awg tawg kha gag te ghad he lehq te ghad haq daoq. 23 Nig hehd awg suhx te pawz kawq pawag peor. Pawag che che awr lehr, lug vix sez vix che awg yuhd haq te lehq ma hez. Kheh ma khuhd, mad lug ma sez vix che awg yuhd,‡ 1:23 mad lug ma sez vix che awg yuhd Ghig sa ve tawd khuhd haq koz che yaog. Ghig sa ve teq chehd yeg chehd che tawd khuhd haq te lehq pawag che yaog. 24 Awg lawn ghod ver Liq phu awg khuhn koz lar che,
† 1:24 Isy 40:6-8Chaw ceng awg gha lia awr lehr muhq haq sur daq lehq,
i hehd ve awg mig awg phond awg gha lia liz
muhq vez heh te§ 1:24 muhq vez heh te Chaw yad a saq mad yehg che haq koz che yaog. Isy 40:6-8, Yk 1:10-11 che yaog.
Muhq awr lehr nuhr veh god veh lehq,
awg vez liz pig veh che veh che yaog.
25 Kheh ma khuhd, Jawd mawd Ghig sa ve
tawd khuhd awr lehr, co co taer taer yeg chehd che yaog.
Tawd khuhd u ve awr lehr, nig hehd haq koz mar lar che ha lehg che bon khuhd* 1:25 ha lehg che bon khuhd Yer suq haq yonr ver thaer khuhq gha che haq koz che yaog. Yh 3:16 phehq che yaog.
*1:1 1:1 Per troq Yer suq lez yug lar che awg laq ghuhd phehq che yaog. Mt 16:18
†1:1 1:1 Phaz daq lehq Du deh che haq gha khanr che haq te lehq, kheh te phaz daq veh che yaog.
‡1:2 1:2 yawd ved awg suhr nig hehd haq puhr vid tug Yer suq Khreq ve awg suhr i hehd ve vend bax haq chuhd phu chuhd kehg vid tug haq koz che yaog.
§1:2 1:2 lez yug lar lehq Ghig sa ve chaw phehq che haq koz ax che yaog. Ef 1:4
*1:3 1:3 chaw awg suhx Yer suq khuhn vend bax chuhd phu peg che Khreq yad haq koz che yaog.
†1:4 1:4 awg sinx cad sehr phad Yer suq haq yonr che haq te lehq gha lar che daq jad che co ha teq che awg bon laq sawnr haq koz che yaog.
‡1:5 1:5 Awg leh med teq ni Ghig sa suhx jehg suhx taz che awg ni haq koz che yaog.
§1:7 1:7 Yer suq Khreq kawq yaq che Suhx jehg suhx taz tug yaq che haq koz che yaog. 1Th 2:19, 5:23
*1:8 1:8 awg mig awg phond Ghig sa tar ir tar muh vid tug haq koz che yaog.
†1:10 1:10 cuh kar var Ghig sa koz cuh che tawd su haq ca koz vid che chaw haq koz che yaog.
‡1:11 1:11 i hehd ca ngawx peg che Isy 49:1-6, 50:4-7, 52:13-53:12
§1:12 1:12 muhd nuh maq lo peha che Ghig sa lag peha che haq koz che yaog.
*1:14 1:14 nig hehd maq sir ser thad Khreq yad mad phehq ser thad lehd koz gad che yaog.
†1:16 1:16 Ak 19:2
†1:17 1:17 khehx chaw Mig gig khod-aq lo te cuhx te yand gha chehd che haq koz che yaog.
‡1:18-19 1:18-19 A pux a pi teq pa geh gha che awg bon mad cawg che awg lid Khreq yad mad phehq ser thad yehd che (mad daq che) awg lid awg pir haq koz che yaog.
§1:18-19 1:18-19 yawg nehax Id sar rer laq chaw Ghig sa haq tox tand huh yehd che to nud to saz ted ceng phehq che yaog. Tuhz 12:5, Ak 16:1-34
*1:20 1:20 awg leh med ve awg yand Yer suq kawq yaq lag tug awg yand haq koz che yaog. He 1:1
†1:22 1:22 awg cehg mag cawd che haq na yug che Bon khuhd mar ax che heh te na yug lehq a saq teq che haq koz che yaog.
‡1:23 1:23 mad lug ma sez vix che awg yuhd Ghig sa ve tawd khuhd haq koz che yaog.
†1:24 1:24 Isy 40:6-8
§1:24 1:24 muhq vez heh te Chaw yad a saq mad yehg che haq koz che yaog. Isy 40:6-8, Yk 1:10-11
*1:25 1:25 ha lehg che bon khuhd Yer suq haq yonr ver thaer khuhq gha che haq koz che yaog. Yh 3:16