1 Kelego꞉ modo꞉lo꞉ da꞉lab kalu gio꞉ dinafa dabuma. Gi amio꞉ hida꞉yo꞉ alano꞉ fa꞉la꞉doma꞉nigab ko꞉lo꞉ gio꞉ modaki ya꞉la꞉lubi. 2 Kelego꞉ nafa gililo꞉wo꞉ abula꞉sa꞉ga꞉, gegede ane ko꞉m. A꞉la꞉ta꞉ga꞉ helebeso꞉g nafale gililo꞉ da꞉lab ko walibiaya꞉ tandala꞉. 3 Gili moleyo꞉, go꞉l o꞉lia꞉ silba o꞉lia꞉yo꞉ wameleli ko꞉m. Godeya꞉yo꞉ gio꞉ mo꞉walilab amio꞉, wamelo꞉ a꞉ma꞉yo꞉ gililo꞉ hala dimidan a꞉no꞉ kalaba walama꞉ib ko꞉lo꞉ wamelo꞉ a꞉ma꞉yo꞉ gi do꞉mo꞉ ko, deya꞉lo꞉ nan auma꞉ib. Henfelo꞉ we elema꞉nigab ko꞉sega giliyo꞉ kelego꞉ modo꞉wo꞉ ka kegenela꞉li ha꞉na꞉lab. 4 Dabuma! Giliyo꞉ egelo꞉ amilo꞉ nanogdo꞉ dian kalu iyo꞉ moleyo꞉ mo꞉kilili ko꞉lo꞉, mole mo꞉kililiakilo꞉ ta꞉li a꞉ma꞉yo꞉, gililo꞉ hala dimido꞉ a꞉no꞉ ko꞉lo꞉ kalaba widaki ho꞉idab. A꞉la꞉ta꞉ga꞉ gili nanogdo꞉ dian kaluwa꞉lo꞉ ya꞉la꞉lab a꞉no꞉, Gode Halaido꞉lelo꞉ A꞉lab Eyo꞉ o꞉ma dabu.

5 Gio꞉ henfelo꞉ wena silikiyo꞉, kelego꞉wo꞉ gililo꞉ asulab aumb kegene dila꞉likiyo꞉, ho꞉leno꞉ tambo ginina꞉ma꞉la꞉yo꞉ sagala꞉sen. Kabowo꞉ toda꞉liliab amilo꞉ sa꞉mba꞉ni ha꞉nab o꞉leaumbo꞉, gio꞉lo꞉ Godeya꞉lo꞉ mo꞉walilima꞉no꞉ ho꞉len a꞉na fa꞉la꞉doma꞉ni ha꞉nab. 6 Giliyo꞉ kaluka꞉isale halalo꞉ mo꞉dimido꞉ nolo꞉ mo꞉walila꞉sa꞉ga꞉ sana sowa꞉sen. A꞉la꞉ta꞉ga꞉ gililo꞉ dimidab a꞉namio꞉ iliyo꞉ mo꞉galala꞉sen.

7 A꞉la꞉fo꞉ko꞉lo꞉ ni mili, gio꞉ Alando꞉ mia꞉nigab a꞉no꞉ ha꞉sa iliki yasila꞉lubi. Gio꞉ asuluma, egelo꞉lo꞉ biso꞉wa꞉yo꞉ fowo꞉ gela꞉sa꞉ga꞉yo꞉, ho꞉n tima꞉no꞉ a꞉no꞉ ko꞉lo꞉ ha꞉sa iliki yasila꞉len. A꞉la꞉ta꞉ga꞉ fo tuma꞉no꞉ ho꞉len a꞉no꞉lo꞉ yasilakiyo꞉, e ha꞉sa elen. 8 O꞉leaumbo꞉, Alando꞉ mia꞉nigab a꞉no꞉ ko꞉na꞉ma dowab ko꞉lo꞉, gio꞉lo꞉ halaido꞉ dowaki, ha꞉sa iliki yasila꞉lubi. 9 Ni mili, giliyo꞉ gao nowo꞉mbo꞉wo꞉ mo꞉beakiyo꞉ sada꞉da꞉so꞉bo. Mo꞉wo꞉ giliyo꞉ a꞉la꞉dimidalega, Godeya꞉yo꞉ gio꞉ mo꞉walilima꞉ib. Bo꞉ba! Mo꞉walilima꞉no꞉lo꞉ kalu a꞉no꞉ toga꞉ meya kagafo꞉lab ko꞉lo꞉ mo꞉walilima꞉no꞉ ho꞉leno꞉ ko꞉na꞉ma fa꞉la꞉dowab.

10 Ni mili, Godeya꞉ dinali sa꞉lan kalu iyo꞉, Alana꞉ wiya a꞉la꞉ta꞉ga꞉ widab amio꞉ hida꞉yo꞉wo꞉ dia꞉li ha꞉nalikiyo꞉, halaido꞉ dowaki, ha꞉sa elen. Gio꞉ ililo꞉ dimido꞉ o꞉leaum, ha꞉sa iliki kudu ha꞉na꞉bi. 11 Hida꞉yo꞉lo꞉ dia꞉i ha꞉na꞉len kaluka꞉isale a꞉no꞉ wabulun dowab a꞉la꞉bo꞉ nio꞉ asulo꞉. Yo꞉b e amio꞉ hida꞉yo꞉wo꞉ fa꞉la꞉dowabiki, e halaido꞉ kagafo꞉liki ha꞉sa elen ko꞉lo꞉ tif amio꞉ Alana꞉yo꞉ e sagale alitaki, ilili alifa꞉. Malolo꞉ a꞉no꞉ gio꞉ da꞉da꞉len ko꞉lo꞉ asulo꞉. Hendele, Alan eyo꞉ nofolakilo꞉ asuwa꞉tan man a꞉no꞉, e amio꞉ wa꞉lifo꞉.

12 Ni mili, to we mada halaido꞉ ko꞉lo꞉ sa꞉ma꞉nigo꞉l. Giliyo꞉ elela꞉ sa꞉lalu aumbo꞉, Hebene wi amiyele, henfelo꞉ wi amiyele, mo꞉ wi no amiyele a꞉la꞉bo꞉ mada sa꞉la꞉so꞉bo. Giliyo꞉ a꞉la꞉bo꞉ sa꞉lalega, Godeya꞉yo꞉ gi a꞉no꞉ mo꞉walilima꞉ib. A꞉la꞉fo꞉ko꞉lo꞉ giliyo꞉ dinali sa꞉lakiyo꞉, “A꞉, niyo꞉ dimido꞉,” “A, niyo꞉ mo꞉dimido꞉” a꞉la꞉ka dinali sa꞉la꞉bi.

13 Kaluka꞉isale gi usamio꞉ nowo꞉ hida꞉yo꞉wo꞉ dowalikiyo꞉, eyo꞉ Godemo꞉ dulugu sa꞉la꞉bi. Kaluka꞉isale gi usamio꞉ nowo꞉ sagalalikiyo꞉, eyo꞉ Godeya꞉ wiyo꞉ duludaki, sagalo꞉ gisalo꞉wo꞉ sama. 14 Kaluka꞉isale gi usamio꞉ nowo꞉ walafo꞉ dowalikiyo꞉, eyo꞉ sa꞉sdo꞉ bo꞉fo꞉lowan kaluwo꞉ elo꞉wa mena꞉ki ho꞉ida꞉bi. Iliyo꞉ wa ho꞉no꞉ e wa꞉la tulaki, Alana꞉ wi amio꞉ Godemo꞉ dulugu sama꞉ki, ho꞉ida꞉bi. 15 A꞉la꞉dimidalikiyo꞉, ililo꞉ tilida꞉da꞉sa꞉ga꞉lo꞉ dulugu sio꞉ a꞉ma꞉yo꞉, walaf kalu a꞉no꞉ ko꞉lo꞉ falele alitabiki, Alana꞉yo꞉ e a꞉ma꞉la꞉ dasi alifa꞉ib. A꞉la꞉ta꞉ga꞉ kalu a꞉ma꞉yo꞉ mogago꞉wo꞉ dimido꞉lalega, Godeya꞉yo꞉ mogago꞉ a꞉no꞉ halaliki ga꞉lila꞉ma꞉ib. 16 A꞉la꞉fo꞉ko꞉lo꞉ Godeya꞉yo꞉ gio꞉ falele alifoma꞉kiyo꞉, gililo꞉ mogago꞉ dimido꞉ a꞉no꞉ gegelebo꞉ foga꞉le sa꞉la꞉sa꞉ga꞉yo꞉, giliyo꞉ gegelebo꞉ nowo꞉ Godemo꞉ dulugu sa꞉la꞉lubi. Kalu Gode amilo꞉ tili da꞉da꞉sa꞉ga꞉lo꞉ digalo꞉ dowab a꞉ma꞉lo꞉ dulugu sa꞉lab a꞉no꞉, halaido꞉wo꞉ a꞉lab ko꞉lo꞉, elo꞉ dulugu sa꞉lab a꞉no꞉ hendele asuwa꞉ta꞉sen.

17 Elaiya e ni o꞉ngo꞉ ko꞉lo꞉, eyo꞉ ho꞉no꞉ mo꞉timena꞉ki, Godemo꞉wo꞉ halaido꞉ dulugu sio꞉ ko꞉lo꞉, dona otalen a꞉la꞉ta꞉ga꞉ ele do꞉go꞉fela꞉fo꞉ us a꞉namio꞉ ho꞉no꞉ mo꞉tia꞉. 18 A꞉la꞉ta꞉ga꞉ Elaiya eyo꞉ ho꞉no꞉ a꞉timena꞉kiyo꞉, Godemo꞉ wa꞉ka dulugu sa꞉labiki, ho꞉no꞉ akin halona a꞉la꞉ta꞉ga꞉ tindabiki, egelo꞉wo꞉ a꞉na fa꞉la꞉ne.+1 Misa꞉ Kalu 17, 18

19-20 Ni mili, gi us amio꞉ kalu imilig nowo꞉ Godeya꞉ to hendele a꞉no꞉ kata꞉ta꞉ga꞉ ha꞉nabiki, kalu noma꞉yo꞉ e a꞉ma꞉la꞉ tililia꞉ mio꞉lalega, kalu a꞉ma꞉yo꞉, to we asuluma. Kalu abeyo꞉, ao nowo꞉ mogago꞉lo꞉ dimida꞉li ha꞉na꞉len ko꞉lo꞉ a꞉ma꞉la꞉ tililia꞉ mio꞉ a꞉ma꞉yo꞉, kalu soma꞉no꞉lo꞉ doba꞉da꞉lo꞉ ha꞉na꞉len o꞉mo꞉wo꞉ mela꞉no꞉wo꞉ a꞉ma꞉la꞉ dimi. A꞉la꞉go꞉ko꞉lo꞉ mogago꞉ ko꞉li ko꞉lilo꞉ dimida꞉li mio꞉ a꞉no꞉ Godeyo꞉ mo꞉bo꞉ba꞉ki, go꞉lu alifa꞉.