1 Gi usamilo꞉ towa꞉lo꞉ halaido꞉ kega꞉lab a꞉no꞉, o꞉ba a꞉la꞉ta꞉ga꞉ fa꞉la꞉dowaba? Mogago꞉ ko꞉li ko꞉lilo꞉ kele asulo꞉ a꞉no꞉, gili asulo꞉ usami tadowo꞉la꞉sa꞉ga꞉ dowabiki, a꞉na fa꞉la꞉dowa꞉lab. 2 Giliyo꞉ kelego꞉ nolo꞉ alan asula꞉sa꞉ga꞉ mo꞉dialikiyo꞉, kalu nowo꞉ sana soma꞉no꞉ asulan. Giliyo꞉ kelego꞉ nolo꞉ mesela꞉sa꞉ga꞉ mo꞉dialikiyo꞉, towa꞉yo꞉ kegaki buban. Giliyo꞉ Godemo꞉wo꞉ mo꞉dabu ba꞉ba꞉ ko꞉lo꞉, kelego꞉ gililo꞉ asulab a꞉no꞉ mo꞉dia꞉sen. 3 Giliyo꞉ Godemo꞉ dabu ba꞉dab amio꞉, gililo꞉ ha꞉iyab a꞉no꞉ mo꞉dia꞉sen. Mo꞉wo꞉ giliyo꞉ hala asulaki, ginina꞉ma꞉la꞉lo꞉ sagalema꞉no꞉ a꞉no꞉ ko꞉lo꞉ dabu ba꞉dabiki, Godeya꞉yo꞉ mo꞉dimia꞉sen.

4 Gayo꞉ kaluwo꞉ ha꞉na꞉sa꞉ga꞉ ino꞉ ta꞉takilo꞉ uwo꞉ dia꞉li sian o꞉leaumbo꞉ gio꞉ a꞉la꞉dimida꞉lab. Kalu abeyo꞉ henfelo꞉ mano꞉ mada alan asula꞉lab a꞉no꞉, e Gode o꞉lia꞉yo꞉ gis dimida꞉lab, a꞉la꞉bo꞉ gio꞉ mo꞉asulaya? Hendele, kalu abeyo꞉ henfelo꞉ man we o꞉lia꞉ ege dowalega, e Gode o꞉lia꞉ gis diab. 5 Godeya꞉ bugo꞉ us amilo꞉ sa꞉sa꞉lo꞉wo꞉ a꞉la꞉sio꞉, “Godeya꞉yo꞉ nili mamayo꞉ ho꞉leno꞉ tambo enedo꞉ asulab aum kudu ya꞉melea꞉kiyo꞉, alan asulab.” To a꞉la꞉do꞉ sio꞉ a꞉no꞉ Godeya꞉yo꞉ o꞉ngo꞉ma꞉lo꞉ngo꞉ sa꞉sa꞉lo꞉ma. 6 Ko꞉sega Godeya꞉yo꞉ nio꞉ alan kanulaki, nio꞉ asuwa꞉ta꞉lab. A꞉la꞉ga꞉lab ko꞉lo꞉ Godeya꞉ ene to sa꞉sa꞉lo꞉ a꞉ma꞉yo꞉ a꞉la꞉sio꞉,

7 A꞉la꞉fo꞉ko꞉lo꞉ gio꞉ Godeya꞉lo꞉ asulab aumb dimidaki, E ha꞉ga dowa꞉bi. Gio꞉ halale kagayaki, Setene e gola ba꞉da꞉bi. A꞉la꞉dimidalikiyo꞉, Seteneyo꞉ ge ta꞉ta꞉ga꞉, e nai ha꞉na꞉ib. 8 Gio꞉ Godeya꞉ anibdeya ha꞉na꞉bi. A꞉la꞉dimidalikiyo꞉, Gode elo꞉ gi o꞉lia꞉ anibdeya doma꞉ mia꞉ib. Man mogago꞉lo꞉ dimida꞉lab kalu gio꞉, dagi heyo꞉ to꞉go꞉dalu o꞉leaumbo꞉, gio꞉ mogago꞉ dimida꞉sen a꞉no꞉ tambo ta꞉ta꞉bi. A꞉la꞉ta꞉ga꞉ asulo꞉wo꞉ a꞉la꞉lo꞉ a꞉lab gio꞉, mogago꞉ asulan a꞉no꞉ kata꞉taki, kufa꞉ uso꞉ malilo꞉ dowa꞉bi. 9 Gililo꞉ hala dimida꞉sen a꞉no꞉ asulakiyo꞉, nofolaki ya꞉la꞉lubi. Sagala꞉likilo꞉ o꞉ga꞉lab a꞉no꞉ nodola꞉sa꞉ga꞉, kele asulakiyo꞉ ya꞉la꞉lubi. 10 Gio꞉ wilo꞉malo꞉ngo꞉ dowaki, Alana꞉ ha꞉ga dowa꞉bi. A꞉la꞉dimidalikiyo꞉, Godeya꞉yo꞉ gio꞉ iwalu dulugu alifa꞉ib.

11 Ni milile, giliyo꞉ gegelebo꞉ nolo꞉ sada꞉da꞉so꞉bo. Kalu abeyo꞉ ao noma꞉ man dimidabo꞉ alobana ba꞉daki sada꞉dalega, kalu a꞉ma꞉yo꞉ Godeya꞉lo꞉ ele difa꞉ a꞉no꞉ alobana ba꞉daki, o꞉ngo꞉malo꞉ngo꞉ dowakigab. Giyo꞉ a꞉la꞉ dimidalega, ge ele a꞉ma꞉ ha꞉g amio꞉ mo꞉dowaki, ge mo꞉walilan kalu o꞉ngo꞉ fa꞉la꞉dowab. 12 Eleyo꞉ Gode imilise ene saefa꞉ ko꞉lo꞉, kaluka꞉isalelo꞉ mo꞉walilab a꞉no꞉ Gode imilise ko꞉lo꞉lab. Kaluka꞉isale nolo꞉ a꞉gasiliaki, nolo꞉ yasalaki, a꞉la꞉do꞉ dimidama꞉no꞉ a꞉no꞉ Gode E amio꞉ halaido꞉wo꞉ a꞉lab. A꞉la꞉fo꞉ko꞉lo꞉ kalu nolo꞉ gilo꞉ alo꞉ ba꞉da꞉labko, ge mada o꞉bo꞉ngo꞉wo꞉?

13 Kalu abeyo꞉ enena꞉ma꞉la꞉ kailakiyo꞉, “Aliyo꞉ ne amisa꞉n nowa ha꞉na꞉ga꞉, dona imilise nowo꞉ a꞉na siliki nanog dia꞉likiyo꞉, moleyo꞉ alan dia꞉no꞉.” a꞉la꞉do꞉ sa꞉la꞉sen gio꞉, ni to we dabuma. 14 Hendele, gio꞉ alilo꞉ fa꞉la꞉doma꞉nigab ko mo꞉asulo꞉ ko꞉lo꞉lab. Gi amilo꞉ mela꞉no꞉ da꞉lab ko, ma꞉no꞉ ufa꞉ amilo꞉ ho fa꞉la꞉dowa꞉sa꞉ga꞉lo꞉ bo꞉i kelegelian o꞉ngo꞉ ko꞉lo꞉lab. 15 A꞉la꞉fo꞉ko꞉lo꞉ giliyo꞉ a꞉la꞉bo꞉ mo꞉sa꞉laki, weaum sa꞉la꞉bi. “Kalu Alana꞉yo꞉ a꞉la꞉dimidama꞉ki asulalega, ne o꞉silikiyo꞉, nanog nol we o꞉dimida꞉mela꞉no꞉” giliyo꞉ a꞉la꞉sa꞉la꞉bi. 16 Ko꞉sega gio꞉ go꞉no꞉na꞉ma꞉la꞉ kailaki, go꞉no꞉n wiyo꞉ duluda꞉sen. Go꞉no꞉ndo꞉ kailan man a꞉no꞉ mada mogago꞉le ko꞉lo꞉lab.

17 A꞉la꞉fo꞉ko꞉lo꞉ kalu abeyo꞉ man nafale dimidama꞉no꞉ a꞉no꞉ e asulo꞉ ko꞉sega mo꞉dimidalega, kalu a꞉no꞉ mogago꞉le dimidab.