124
Egvu, aagụje teke eeje Jerúsalemu; onye deru iya nụ bụ Dévidi
1 Tẹ ndu Ízurẹlu tụko kfua ya; sụ:
Lẹ ndẹge Ojejoje ta nọ swiru ayi;
2 ndẹge Ojejoje ẹ tọ nọ
swiru ayi teke ono,
ndiphe tsoru ayi ọgu ono;
3 mbụ teke ono, ẹhu nwuhuru
ẹphe ọku l'ẹke ayi nọ ono;
mẹ ẹphe elekwaa ayi lẹ ndzụ.
4 Ẹphe ge erikwa ayi l'ọ bụ utso;
mbụ bụru ọchoku-mini tsọta ayi tụgbua;
5 mbụ bụru ukporo-mini
kpota ayi;
ayi eje abụru ọ-la-l'iyi.
6 T'ajaja bụru kẹ Ojejoje,
bụ onye ono, ẹ te kwedu
t'ẹphe gude eze
takashịa ayi atakashị ono.
7 Anahụ, ayi nahụru ẹphe
dụwa l'ọ bụ nwẹnu,
nahụru onye agba ọnya ẹnu.
Ọnya ọbu swewaru ìphòró;
ayi anahụ gbalashịa.
8 Ọ bụ Ojejoje, bụ iya meru
igwe; mee mgboko;
bẹ eeshije l'ẹka agbaru ayi mkpu.

© 2014 WBT