1-2 Nyakama* 1 Ko 7:12-16; Ep 5:22-24; Kl 3:18; Ta 2:5; 1 Pi 1:25 enda dupame nyakamanya akalingi dupanya pundipundi pilyepape. Dopa pitaminopa nyakamanya akalingi dupanya mendeme Gotenya pii doko nasoo tanga lao katatamo kandao doko, nyakama enda dupame piipi mende lamaiya naenya, Gote paka kayao mana epe minao pititaminopa nyakamanya akalingi dupame mana doko kandatala Gotenya jetami. 3 Asili* Ais 3:16-24; 1 Ti 2:9 kumao mandengepi, golome wasepaeme yati pingipi, yonge pee epe pingipi, dopale dupame nyakamanya yonge doko iki yati napyepape. 4 Dopa napinya andiki pingipi ema napyoo petengepi mana dopale dupame nyakamanya mona doko yati petae pilyepape. Mana dopale dupa koyao alu napingi. Goteme mana dupa kandatala epe etetena lao masingi. 5 Wamba waka Gote lao masoo malisoo peteamino enda etete epe dupame mana dopale dupame tange yati petala, akalinginya pundipundi peteami-pyaa. 6 Dopaka* Jen 18:12; Ga 4:28 pyoo enda Seta dokome Apotakameme leamoli pyoo pitipala, baa kenge kamongona lao andasiaka-pyaa. Indupa nyakamame dopaka pyoo mana epe dupa minao opale koo mende paka nakayao pitipala enda Setanya wanenge jetelyamino.

7 Dopaka* Ep 5:25-33; Kl 3:19 pyoo nyakama akali dupame enda dupa-kisa etete pupu lapae nasingina lao masokondape petala, nyakamanya etanenge dupa-pipa tole pyao pilyepape. Goteme mona epe palyoo nyalambo endakalipa lapota lete etete katasiamo doko lao masetala, nyakama akali dupame etanenge dupa andanda semaiyoo kalyepape. Opale mendeme nyakamanya loma singi doko minanjala naena lao dopa pyepape.

8 Nambame pii dutupa etasoo dapa lelyo: nyakama pitakame masingi mendai iki palyoo mende kanda kanda pyoo, kaiminingi dupa auu kayao, kondo kayao, anasale joo kalyona lao masoo kalyepape. 9 Endakali* Mt 5:39,44; Lu 6:28; Lo 12:14-18; 1 Te 5:15; 1 Pi 2:23 dupame nyakama kandao koo pitamino dokopa itingi yanu nyoo koo napyepape. Pii koo latamino dokopa, itingi yanu nyoo pii koo laa nayalapape. Opa napinya, nyakamame dupa kandao pii epe laapape. Doko, Goteme nyakama epe doko ditoo latala ipupa latea.

13 Nyakamame mana epe dupa minapuma laka lao minao katataminopa apimi nyakama koyasetape? 14 Dopaka* Pot 3:25; Ais 8:12-13; Mt 5:10; 10:26-31 doko, nyakamame mana epe minatamino dokonya nyakama tanda ditamino kandao doko, nyakama mona yaepao katatami. Nyakamame dupa paka kayao walu laa nayalapape. 15-16 Kataisa* 1 Pi 2:12 baa Kamongo kalyamona lao masetala nyakamame baa lao moname tama pyepape. Nyakamame masoo malisilyamino dokonya pisetamino endakali dupa pitaka kandao paka kaele lao andiki pyoo pii tenge yanu pyakamaiyanya koteaka lao depa latae kalyepape. Nyakama masingi epe palyoo kalyepape. Dopa pitaminopa nyakama Kataisapa pakatae payao mana epe minilyamino dupa kandao endakali dupame pii koo lataminopa, pii koo latamino dupanya tange elya setami. 17 Goteme* 1 Pi 2:20 nyakama tanda nyipimi laka lao masetamo kandao doko, nyakamame mana epe minatala tanda nyetaminopa yaka jeta. Aopyoo latala nyakama mana koo minatala tanda nyetaminopa yaka nanjeta.

18 Kataisa* Ais 53:11; Lo 1:3-4; 5:6; 6:10; Ip 9:26-28; 10:10; 1 Pi 1:21-24 baame naima laminao Gote kalyamo dokonya patona latala baame naimanya koo dupanya paa mendai iki kumia. Baa akali tolatae doko naima koo pingi endakali dupanya kumikea. Endakalimi yonge doko pyao kumasiaminoaka doko, Goteme imambu doko lete katasia. 19 Dee* Mt 12:40; Lu 23:46; Ap 2:24-31; Lo 10:7; Ep 1:21-22; 4:9-11 imambu dokome imambu anjetae kateamino dupa pao pii lamaiya-pyaa. 20 Wamba* Jen 6:1–7:24; 2 Pi 2:5; 3:9 waka Noa katao endakinya pituu paenge sipi doko wapuoo kateamino dokopa, Goteme yapa maka nakayao endakali dupanya mona kapilyetamipi lao malisoaka kateamopa dupame baa lao masoo minala nayami-pyaa. Dopa piaminopa, endakinya pituu paenge dokonya peteamino endakali tukulapo dutupa iki Goteme endaki dokonya pyoo nyia-pyaa. 21 Indupa* Lo 6:3-4; Kl 2:12-13; Ip 10:22 kaimbu dokome naima pyoo nyilyamo doko endaki dokome makande pia-pyaa. Kaimbu dokome yongenya kaimala kunanya nepalanya daa. Dokome Gotenya mana watao minalanya masingi epe palyetamina latae mende. Jisasa Kataisa dee malunya sakateamo dokonya-kaita kaimbu dokome naima pyoo nyingi. 22 Baa* Mt 22:44; Ap 2:33; Ep 1:20-21; Kl 2:15 kaiti-kisa pupala Gotenya kingi tolae-kaita kalyamo. Goteme enjele dupapi, enomba nyoo isoo katenge dupapi, pupu lapae dupapi dupa baanya pundipundi katena lea-pyaa.