1 “Inaꞌ daꞌa anif basef fefeꞌma ensel anamba nugumafi sios amam nematawa Kristen sagape Sardisi. Aeꞌ ahapila anagof ambagof buꞌwagufi Godi 7-pelaiguf eaꞌ ahapila ondowa awamba 7-pelaiwa.

Aeꞌ egawa waf hiafi ipaꞌ pandaꞌafi. Esis sagaꞌi basefa ipaꞌ naꞌambai saꞌi, ‘Ipaꞌ ambal lagapaipai.’ Apaꞌ owaꞌ, owaꞌatin. Ipaꞌ siꞌi pagagaꞌ eaꞌi.* Re 1:4,16, 2:2 2 Ipaꞌ safel dasaꞌma pekwaha koh! Waf hiafi awafi ipeꞌifi ataꞌ fapaipa atapif faꞌi fehepa pegaꞌ. Apaꞌ anef waf buꞌwafi kwaiaꞌuf ipaꞌ pendewaꞌ banagaf fendape. Deiꞌ main? Waf hiafi ipaꞌ pandaꞌafi, Aeꞌ ina ati anef ataꞌ usiꞌif aꞌowaꞌ ma naep Ahame Godi, owaꞌ.* Re 2:5; 1 Te 5:2 3 Ipaꞌ ukup pendapoma basef ifimba aeꞌafi fowaꞌ paliꞌ pameꞌef pegefaꞌef eaꞌi. Pigiꞌmif pembema nelelemb pekwaha waf awafi pifiꞌmai Aeꞌ. Iꞌi ipaꞌ owaꞌ pesafel ulal pekwaha koha, atiasi Aeꞌ ifiꞌi endambahoꞌ etagamepa siꞌi epen nandaꞌ wali nafiꞌi nagataga eaꞌ ina pegawa nogota mamahotama ifiꞌi egatagamepa, owaꞌ.* Ju 23 4 Apaꞌ ipaꞌ anipa pagape Sardisi owaꞌ pendaꞌ luwaguf maim ipeꞌimi alugumia, atiasi pindawisa klos afitimi dambaimi atom pefeꞌ peloma Aeꞌ. Deiꞌ main, ipaꞌ epes buꞌupai eaꞌ pandahama amamba.* Mt 10:32; Lu 10:20; Re 3:18 5 Ipaꞌ paloma anis epes daias wapani sagape ambal namili lifilafi agof ipeꞌigufi fail anoꞌw buk saꞌi buk ambal namili lagapauꞌwi. Epen nilutu banagena nelefata negaliiꞌamona waf awafii, Aeꞌ eseꞌan luwaguf amamba afitimi nilam. Eaꞌ ina atiasi ipatiꞌmas agof asasigufi fagail buk akwambai, owaꞌatin. Afil atapiguf. Ewalapa agof asasigufi ma naep Ahame aeꞌanai noloma amom ensel ananimi iꞌipam iꞌi epes isimba aeꞌasi. 6 Ipaꞌ mamahipama aligah hagapaipai pendameꞌ andeandeꞌ basef ifimba Ambal buꞌunai Godi nagawalapefa esis amam nematawa Kristeni.* Ais 22:22

7 “Inaꞌ daꞌa anif basef fefeꞌma ensel anamba nugumafi sios amam nematawa Kristen sagape Filadelfiai. Aeꞌ buꞌuwai hililiꞌi endilisii deiꞌ ahapila ki ma uta atamba fowaꞌ king Devit nagahapilanatai. Iꞌi Aeꞌ egawisiꞌata, anona aman ina laꞌifina ma nogowalowata, eaꞌ Aeꞌ iꞌi egowalowata wapani, atiasi anin epen ina laꞌifina nigawisiꞌata, owaꞌatin. Aeꞌ atowe aꞌipipago basef ifimba ipaꞌ.* 1 Ko 16:9; Re 2:2 8 Aeꞌ egawa waf hiafi deiꞌ pandaꞌafi hiꞌalaf eaꞌ egawa ipaꞌ wapani, ataꞌ banagepa kwasakwasala ma anis epes owaꞌ sogameꞌ basef ipeꞌifia. Apaꞌ ipaꞌ apaila basef aeꞌafi andeandeꞌ. Eaꞌ ina pambahoꞌ agol aeꞌagili, owaꞌatin.

“Ipaꞌ piti, aeꞌ andaꞌ uta tagal tapomepa, owaꞌ anona aman laꞌifinama nogowalowataea, owaꞌatin.* Re 2:9; Ais 45:14; Ais 49:23; Ais 60:14 9 Ipaꞌ pemeꞌ! Ipaꞌ pegawa eaꞌ epes isimba Satani. Esis sagaꞌi basef saꞌi esis miniꞌap Judai, owaꞌ owaꞌatin. Esis ina saila waf Judai, owaꞌ. Esis sagambasoꞌami. Aeꞌ atiasi endaꞌ epes isimba sifiꞌi sindiwa nembawa sotawa felefeleꞌma boꞌwagah ipeꞌigahi ma sogogawa aeꞌ okom maimailipa.* Lu 21:19; 2 Ti 2:12 10 Ipaꞌ paila basef aeꞌafi andeandeꞌ palutu banagepa ma nimanimi amamba magatagamipai. Eaꞌ Aeꞌ deiꞌ imafi ipaꞌ ma atiasi nemaf afamba gwamba motagama mogogwamba amam nematawa hiasi itap hiagomai ma mogawalogasa waf buꞌwafi awafii. Amamba ina atiasi motagama ipaꞌ, owaꞌatin.* Re 2:10,16 11 Aeꞌ ifiꞌi etagama ipaꞌ kwafalis atis. Waf buꞌwafi usiꞌifi ipaꞌ pagahapilaf eaꞌi, hapilaf tatalaꞌif atapipa. Naꞌamba anona aman nondalombepa hiahaom buꞌwami magapoma ipaꞌ ma anaf pegefaꞌami.* Ais 62:2, 65:15; Esi 48:35; Re 14:1, 21:2 12 Epen ami nilutu banagena nelefata wandafa nigaliꞌamona waf awafii, bola Aeꞌ endaꞌan nilutu banagen siꞌi olaf fogombaloꞌ ipat luꞌunai Godi aeꞌanai. Eaꞌ epen inimba ina atiasi nekwaha ipat anamba luꞌunai netanima nuwisi andoꞌ wapani, owaꞌatin. Nepe andeandeꞌ nomon atapin. Atiasi endaꞌ agol Ahame Godi gila anin goloma agol wambel ambalemba luꞌwambili God aeꞌanaii, Jerusalem wambel namimbili fasimbili. Wambel ambalemba atiasi bekwaha heven God aeꞌanai nagapoma bisilaꞌi. Eaꞌ agol namigili aeꞌagili wapani endaꞌagol gila anin. 13 Ipaꞌ mamahipama aligah hagapaipai pendameꞌ andeandeꞌ basef ifimba Ambal buꞌwali Godi nagawalapefa esis amam nematawa Kristeni.”* Re 1:5, 19:11; Kl 1:15

14 “Inaꞌ daꞌa anif basef fefeꞌma ensel anamba nugumafi sios amam nematawa Kristen sagape Laodisiai.

Aeꞌ kofagewe ma basef endilisifi, eaꞌ awalapef fafeꞌ usiꞌif basef hiafi Godi. Lifilafi awalapef usiꞌif datima. Aeꞌ Dembiwai ma hiahaom hiami God nandaꞌam magape ilif itapi maloma epes hiasi wapani. Aeꞌ aꞌipinago basef ifimba inaꞌ.* Ro 12:11; Re 2:2

15 “Aeꞌ egawa eaꞌ ma waf hiafi deiꞌ ipaꞌ pandaꞌafi. Eaꞌ egawa ipaꞌ ina pohalepa, owaꞌ. A ipaꞌ ina nifipa, owaꞌatin. Apaꞌ Aeꞌ aꞌi ipaꞌ pendape pohondalepa aꞌa pendape nifipa. 16 Owaꞌ, owaꞌatin. Ipaꞌ nifipa kwasakwasala. Ipaꞌ owaꞌ nifipa endilisia o owaꞌ poholepa endilisia. Eaꞌ Aeꞌ andaiwaꞌmepa aꞌi iguꞌupai malogol aeꞌagili.* Hos 12:8; 1 Ko 4:8; Lu 12:21 17 Ipaꞌ pagaꞌiasi naꞌamba paꞌi, ‘Apaꞌ moni hianai naloma hiahaom hiami maꞌomapa. Apaꞌ ina anin mae akapa, owaꞌatin.’

“Apaꞌ naep aeꞌapi atilipa pape awepa endilisi, ma anis epes sigati ipaꞌ owahipipa. Ipaꞌ pape kwahupa endilisi, naep paseꞌepa alop paimipa dowaf. Apaꞌ ipaꞌ owaꞌ pegawa isimba sowalapa waf awafi ipeꞌifia, owaꞌ.* Ais 55:1; Je 2:5; Re 3:5, 4:4; Re 16:15 18 Eaꞌ eseꞌepa nomonas isimba ipaꞌ. Gol aeꞌami deiꞌ eaꞌ fandom mataga boꞌom aꞌowaꞌ. Andeandeꞌma ipaꞌ petaloma pegataga beꞌepa hiahaom hiamipa aꞌowaꞌ. Andeandeꞌma petala klos afitimi pelam pigiliꞌama alop ipeꞌipi ma esis ina siti alop ipeꞌipi pope wahifip eaꞌ ambagof awagof, owaꞌ. Andeandeꞌma ipaꞌ petala anin marasin pendaꞌan naep ipeꞌipi ma laꞌifipama pigati.* 1 Ko 11:32; Re 2:5 19 Epes hiasi mamahisa Aeꞌ okom magamagailasi isimba Aeꞌ endaꞌ megah mohas ehas kalamuta ma endaꞌ waf asasifi fegataga usiꞌif. Eaꞌ ipaꞌ wapani ukup pendandaꞌma waf ipeꞌifi hiafi, pembema nelelemb pekwaha waf awafi pifiꞌmai.* Jo 14:23; 1 Jo 2:24 20 Ipaꞌ pemeꞌ, Aeꞌ aha uta alutu. Iꞌi anin epen nemeꞌ malogol aeꞌagili ma nusiꞌ uta, Aeꞌ iwis nomon epe eloman ope atogon weaꞌ gwaꞌaisi.* Mt 19:28 21 Epen ami nilutu banagena nelefata wandafa nigaliꞌamona waf awafii, Aeꞌ atiasi iꞌi ahoꞌma anina nepe negalome ma negape Dembinai sia king aeꞌanai. Eaꞌ naꞌamba atin siꞌi fowaꞌ Aeꞌ agalutu banagewe ma egelefata wandafa waf awafi. Eaꞌ deiꞌ ape aloma Ahame aeꞌanai ape dembiwai sia king ananinai. 22 Ipaꞌ mamahipama aligah hagapaipai pendameꞌ basef ifimba andeandeꞌ Ambal buꞌunai Godi nagawalapefa esis amam nematawa Kristeni.”