No Pakpakat tupas ira
HIBRU
Pa dahat nunurei bia siga tutun ga pakat iakan ra pakpakat. Aring diet lik bia Pol, aring mesa bia Banabas bia Apolos bia tiga mes na tunatuna. Senbia i manga palai bia iakan ra pakpakat ga haan tupas diet ira Iudeia (ing di kilam mah diet bia ira ‘Hibru’) ing diet gata nurnur ta Karisito. Aring tabuna nurnur diet ga hagawai ira Kristian na Hibru, hua aring ta kaikek diet ga wara taptapukus taar ta ira warkurai ta Moses ma ta ira nudiet magingin na lotu ta ira Iudeia. Io, iakan ra pakpakat i manga hakatom diet bia waak diet tapukus talur Karisito, Kalou kaba gi kurei diet hoing ga kurei ira hintubu diet ira Israel naluai sakit. Iakan ra pakpakat i hasahesa bia Karisito at i tale bia na halon diet kanong a Nati Kalou ia, hua i tamat ta ira poropet ma ira angelo ma Moses mah (nas Hibru 1.1-3.6). Ma no nuna minaat wara lamlam tunatuna tupas Kalou i manga bilai ta ira magingin na lotu ta diet ira pris gar na Iudeia. Kanong warah, Karisito i ta gil tiga sigara kunubus nong i ta kios sasei no tuarena kunubus (8.6-13) ing a mon hartabar na wawaguai tanai. Kaikek ra hartabar na wawaguai tupas Kalou pa ga tale bia na kap sei ira magingin sakena ta ira tunatuna. Senbia no minaat ta Karisito i tale. Ma Karisito i la kis taar hathatikai hoing no bilai na pris (7.1-10.18). Io hua, i tahut bia dahat ira Kristian dahat na haan tupas Kalou ma ra balamasa narako ta Karisito (10.19-22) ma dahat na tur dadas ta ira nudahat nurnur (10.22-39) hoing diet ira tena nurnur manaluai (11.1-40). A liman na dadas na hatumarang bia tikai pa na hilau talur Karisito (2.1-4; 3.7-4.13; 5.11-6.20; 10.26-31; 12.18-29). Kanong warah, Karisito sena mon i tale bia na halon dahat, ma iakan no suruna ta iakan ra pakpakat.
1
Iesu i tamat ta diet ira angelo kanong a Nati Kalou ia
1 Naluai Kalou ga ianga ta ira hintubu dahat maram narako ta ira nianga ta ira poropet. Ma ga gil hua a haleng na pakaan ma narako ra haleng na mangana ngaas. 2 Senbia ta kaiken um ira mutuaina pakana bung ma maram narako tano Natina, i ta ianga ta dahat. Ma no Natina ia nong Kalou ga pilak tar ia bia na tinanei ira linga bakut. Ma kaia tano limana no Natina, Kalou ga hakisi no mawai ma no ula hanua bakut. 3 Ma ia i haminis no minamari Kalou. Ma i haruat tutun at ma Kalou. I la puspusak ma i la balbalaurei no mawai ma no ula hanua bakut ma no dadas tano nuna nianga. Ma ing bia gata gil tar no pinapalim na hagamgamatien ri talur ira sakana magingin, ga kap no tamat na kinkinis. Ma iakano kinkinis i kis taar tano sot na limana Nong i Manga Tamat Sakit aram naliu. 4 Ga kap no tamat na kinkinis hokaiken ta ira angelo. Ma i takodas bia na kap ia kanong no hinsang no Natina ga hatur kahai ia i tamat ta ira kaba angelo. 5 Ma iakan i palai kanong Kalou pa ga tangai ta tiga angelo bia,
“No Natigu uga.
Katin iau tangai ra palai bia a Natigu uga, ma iau no raam Sus.”
Taia. Pa ga tangai hua ta ira angelo mon. Ma ga tangai habal bia,
“Iau no ana Sus um.
Ma ia no Natigu balik um.”
6 Ma tano pakana bung bia Kalou i kap hahuat no Natina ukai tano ula hanua, iakano Natina nong i kap no luena kinkinis, Kalou i tangai habalin bia,
“Na tahut bia ira angelo ta Kalou bakut diet na lotu tupas no Natigu.”
7 Ma kaia uta diet ira angelo Kalou ga tangai hoken:
“Kalou i gil ira nuna angelo hoing ira dadaip.
Ma i gil ira nuna tultulai hoing ira kamariana iaah.”
8 Ma sen tano Natina balik i tangai bia,
“No num kinkinis na warkurai na kis hathatikai ma pa na pataam.
Ma u na kurei ira num mataniabar ma ra taktakodas.
9 U sip ira takodasiana magingin ma u malentakuanei ira sakena.
Io hua, Kalou, no num God, i ta bul ra wel aram naliu taam wara gilimis uga.
Hokaiken u na kap ra tamat na kinkinis ma ra tamat na gungunuama ta diet ira num harhis.”
10 Ma Kalou ga tangai habal bia,
“Uga no Watong. Makaia tano hathatahun u ga hakisi no ula hanua.
Ma u ga gil no ula mawai ma ira limaam tus.
11 No mawai ma no ula hanua dir na panim, senbia u kis taar at.
Dir na tutuarain hoira maal.
12 U na puli dir hoing ra sigasigam.
Ma u na kios dir hoing ira tunatuna diet la harkios ma ira nudiet maal.
Ma senbia uga, pau sala kikios.
Ma no num nilon pa na pataam.”
13 Ma Kalou pa ga tangai ta tiga angelo bia,
“U na kap no tamat na kinkinis kai tano sot na limagu,
tuk iau na bul hasur ira num hirua napu, hoing tiga linga na bul kakim.”
14 Io, asa tutun diet ira angelo? Diet ira tanua na tultulai. Ma Kalou i la tultulai sei diet wara gaia diet ing diet na kap no harhalon.