10
Anerose tayamo mana buki giyaina
1 Amo ikavava, ituli ta anerose toogagaina agite yábana goi isousou. Tauyana gaota kwama nakae ilosi go, kíyala dabana itakabobo. Maisina ana kaigigita níyala nakae go, aena moe yeu sabeninimina taaoyaina nakae. 2 Aneroseyana nimana goi tayamo buki giyaina be bilibilina go, bogina katupaaevaina. Aena kakataina négwasa goi ivakavata go, aena kekelina moe poyapoya goi ivakavata. 3 Niyana gagaina goi iduduwo, ana taiyakeka laiyoni ina gou nakae. Tutayana iduduwo, niyanayana palapala adi badabada ainima aiyuwo sikatumapu. 4 Tutayana palapalayadi ainima aiyuwo sibóbwara, bego aginidi go, yábana goi níyana tayamo anove idigo kana,
‘Kaga palapala ainima aiyuwo siidigedi kuvamōudi o tadigo kada, “Tabu kuuginīdi.” ’
5 Iya go aneroseyana agitegite négwasa be poyapoya yaidi goi iitaoya nimakakataina ikatulagasi yábana ivasakikinako,† Atu 32:40; Dan 12:7; Emo 3:7. 6 ikanatamada Yaubada yoina goi; Tauyana Tokaiyako vata. Yábana, poyapoya, négwasa be nakae kaga liliuna sinaedi imadagidi.† Tat 20:11. Ina kanatamadayana goi idigo kana,
‘Yaubada geya tuwaina iupavilavila, 7 go sem tutayana anerose ainima aiyuwoina ina síula iuwe, Yaubadayana ina nuwogau liliudi ilukavavedi, nakae boi nimatu ee, bogina ina pakonayao, tauyadi moe ina tokabivalavalayadi, yaidi goi italavaita.’
8 Iya go niyanayana yábana goi agiminove aiyuwoina ilatuwokoigu idigo kana,
‘Kūna aneroseyana négwasa be poyapoya goi iitaoya go, bukiyana katupaaevaina nimana goi kukābi.’
9 Tuwo moitamo ana aneroseyana alatuwoko adigo kagu,
‘Moe bukiyana giyaina kuvinīgu.’
Tuwo ivinigu go, idigo kana,
‘Dedevina, kukābi, kukāni. Tutayana kutono, bei gamom goi tamatamaina kulotowo go, tobum goi ana lotówana bei ikalala mokava nakae.’† Isi 2:8—3:3.
10 Tuwo bukiyana nimana goi akabi akani. Tobugu goi alotowo ikalala mokava nakae go, tutayana atono, tamatamaina gamogu goi alotowo. 11 Akáika ikavava, aiyuwoina ilatuwokoigu idigo kana,
‘Aiyuwoina itoboine Yaubada ina livala boda liliudi, kantri liliudi, aníyana liliudi be nakae tolovina liliudi yaidi kukabivalevale.’