2
Tomota adi kaigigita goi taabu kowowooinēdi
1 Segowo, ida Tomoya Yeisu Guyau, Tauyana Yaubada ana káeyana ana tovagitákwana,† Gui 7:2; 1Ko 2:8; Epe 1:17. e ina kabikáwana aba numisa‡ Ina kabikáwana aba numisa: Enao aiyuwo sikaaiyaka bego ame takaigavile. Tayamo moe mae nakae. Aiyuwoina itoboineda kada, ‘Tanumisa Guyau Yeisu yaina.’ kosabookulīye go, imi sabokuliyana goi taabu tomota adi kaigigita goi kowowooinēdi. 2 Aba gita tayamo goi guna nuwonúwana ataligei. Koroto adi taiyuwo, tayamo guyau, tayamo tookaina go, adi taiyuwokova imi kaba tugúguna goi sisiu. Kina guyauyana ana pasapasa be nakae ana kwama kaausaraidi go, kina tokainayana ana kwama baailidi. 3 Sisiu go, nakona guyauyana mana kwama kaausaraidi kowowoinedoko kami,
‘Kūma ameko kebam dedevina goi kutulāga.’
Go nakona tokainayana kolatuwoko kami,
‘Amoko goi kuutāoya.’
O nakona kami,
‘Ameko aegu ana kaba yata kikina goi kutulīku.’
4 Neta nakae kolatuwokoidi, e imi guinuwa kogite? Tomota yaimi adi kaigigita goi kowowoinedi. Mami nuwogau goyogoyoina koetotakínona.
5 Konovēgu, guna kaloyao! Tookaidiyadi da poyapoya matadi goi sitokai go, kina Yaubada ikinavedi idi numisa pasina siguyau be nakae ikalibubudi nakae boi ikaatotule Tauyana ana tomatakoiyao yaidi ae? 6 E komi sem imi guinuwa goi tookaidiyadi kogieomaemaedi! Go kogita! Avatauwa mou siivinimi? Avatauwa kotu goi siiyatoimi? Kidi guyaguyauwo ae? 7 Komi bogina koeboda tayamo Yeisu taiyao, tauna Tauyana yoina ikaaiyaka yaimi go, yoinayana dedevina kidi sitaagiwoi ae?
8 Neta tookaidi kogieomaemaedi, moe sinapu igoyo. Ida Tokalibúbuna lovina ame Gínina Kimaasabaina goi ivinida kana,
‘Siyami komataakoīye nakae toinimi komatakooiyemi.’† Mad 5:43, 19:19, 22:39; Mak 12:31,33; Luk 10:27; Rom 13:9; Gal 5:14; Ibe 13:1; Yem 2:8.
Vininabeso 19:18
Neta amo lovinayana kokiibobosi, e moe guinuwa dedevina koguuinuwe. 9 Go neta tomota adi kaigigita goi kowowooinedi, e moe goyo koguuinuwe be nakae Atukedayana ikamamaetalimi komi tokapipilova. 10 Avatauwa neta lovina madabokidi Yaubada ina Katukeda goi sikabikaonedi go, lovina tayamo goi sikapusi, e moe nakae Atukedayana madabokina sikapipilave. 11 Moitamo. Atukedayana ana Tokaiguyau tayamo tauna. Moe Tauyana kana,
‘Taabu korooerāta.’
Aiyuwoina kana,
‘Taabu kokaaumāta.’† Tat 20:13-14; Atu 5:17-18.
Tauna neta geya koroerateta, go sem kokaumata, komi Atukedayana ana tokapipilova. 12 Tauna mami matakoi be mami nuwokapisi kobobōbwara be kooketōiya, unana Yaubada bei itakinoida nakonakae ida Tomoya ina Katukedayana matakoi manuna boi bogina italiigeida takabikaone. 13 Neta sedao geya tanuwokapisiyedita, e Yaubada nakae ina takínona goi geya inuwokapisiyedeta. Avatauwa neta tonuwokapisi, Yaubada ina takínona geya simatoiteyeta, go sem Yaubada ina nuwokapisi bei sibabane.
Imi guinuwa dedevidi goi imi numisa kovagiitakōe
14 Segowo, kaga ana dedevina neta koroto tayamo idigo kana, ‘Yau magu numisa’ go, korotoyana guinuwa geya? Manakae? Bei ina numisayana goi ana yava ibabane gea geya? Geya ae? 15 Nakona siyami o niumi geya ana kwamamo be nakae geya avanamo 16 go, tayamo yaimi kulatuwoko kudigo kam,
‘Yaubada ina yabobona yaim. Kwaiyāka dedevina be nakae kwāika dedevina.’
Go neta kwama o awoinu geya kuviniyeta, moe kaga ana dedevina? Geya ae? 17 Numisa nakae. Neta numisa kaka go, guinuwa geya, numisayana kaamasina nakae. Tauna guinuwa be numisa siituyuwo go, geya itoboinedeta numisa be guinuwa takimasabedi. 18 Go nakona tomota tayamo bei igéona idigo kana,
‘Tomota tayamo mana numisa go, tayamo mana guinuwa.’
Go yau kagu,
‘Kom geya im guinuwamo go, im numisa manakaem kuvatulukoigu agite? Geya itoboinemta! Ago yau guna guinuwa goi bei guna numisa avatulukoim.’
19 Kom kuunumisa bego Yaubada tayamo toito; moe dedevina toina. Ago dimoni nakae siinumisa bego Yaubada tayamo toito go, madi matoita sitátava, unana idi numisa kaka tauna geya ivaitedita! Amo aba gitayana goi tayagoi numisa be guinuwa siituyuwo go, numisa kaka geya ivaitedeta.
20 Kom tapaviivilim! Manakae? Aba gita avatulukoim, e bei kuuyagoi bego numisa kaka go, guinuwa geya moe geya basabasainamo? 21 Aba gitayana ame nakae: Boi tubuda Eberamo natuna Aisake aba kasala goi ikailagasi bego ikasale Yaubada yaina.† Abv 22:1-14; Ibe 11:17. Manakae? Kada,
‘Tubuda Eberamo ina guinuwa pasina Yaubada ivayoko kina tokibóbwata’?
Nakae ae? 22 Moeko goi tayagoi Eberamo ina numisa be ina guinuwa sipaisewa vavasa. Tauna ina guinuwayana pasina ina numisa imatuwo. 23 Moeko goi Gínina Kimaasabaina ina talavaita imalatomota; talavaitayana idigo kana,
‘Eberamo inumisa Yaubada yaina, e ina numisayana Yaubada igite, ikamoitamoe bego kina Eberamoyana moe Yaubada nuwona ana tokibóbwata.’†a Rom 4:3,9,22; Gal 3:6,29.
Aba Vatowo 15:6
Tauna Yaubada idigo kana,
‘Eberamo yau siyagu.’†b 2Te 20:7; Ais 41:8.
24 Eberamo ana kaba gitayana goi tagite tomota idi guinuwa goi Yaubada ivayokoidi kidi kiboobosidi go, geya kada numisa kaka goi geya. 25 E tomatagogoli Reyabi nakae. Ina guinuwa dedeviina pasina Yaubada ivayoko kina kiboobosina. Ina guinuwayana moe Iyosuwa ina toyausayao adi taiyuwo ina vada goi iuyaonedi go, tutayana sina, ituli ta kenao ivatuulukoidi goi sisiya.† Iyo 2:1-21. 26 Mae guna nuwonuwanayadi moe moitamo. Neta wowoda geya balomainamo, e wowodayadi kaamasidi. Numisa nakae. Numisa neta guinuwa taiyao geya situyuwoita, moe nakae numisayana kaamasina.
†2:1 Gui 7:2; 1Ko 2:8; Epe 1:17.
‡2:1 Ina kabikáwana aba numisa: Enao aiyuwo sikaaiyaka bego ame takaigavile. Tayamo moe mae nakae. Aiyuwoina itoboineda kada, ‘Tanumisa Guyau Yeisu yaina.’
†2:8 Mad 5:43, 19:19, 22:39; Mak 12:31,33; Luk 10:27; Rom 13:9; Gal 5:14; Ibe 13:1; Yem 2:8.
†2:11 Tat 20:13-14; Atu 5:17-18.
†a2:23 Rom 4:3,9,22; Gal 3:6,29.
†b2:23 2Te 20:7; Ais 41:8.