BAL CEHEC JE HAUN MAK 1

Me Je i

Mak Jaqen

Aqunec Je

Me je i cel dana bahic jaqen eu je oso qee nijel. Euqa Kristen tamanec cofadec dana age wele Jisas Krais mahana cobon saennadec li saen qila nijia eu Jon Mak, Pitana danah, uqa me je i jaqen ec madein. Me je ina je mati eu Pita uqana me je madec euqa Mak jaqen. Jon Mak uqa Jisasna malogom oso. Uqa anagna jona Jerusalem ono wawaga meleec dana cajaca age ceguloig. (Aposel 12.12 feiga.) Pol Banabasca ale Jerusalemdec Antiok taunna ceseli belesin saenna Jon Mak aleca belein. (Aposel 12.25 feiga.) Mak uqa age Jisas hewudein eu fen. Dana haun i lotoc nag himec taqen uqa age hewudoqaga bili odoinqa uqa bical bubusali bilei lotoc eu culen eu uqa Jon Mak. (Mak 14.51-52 feiga.)

Makna me je sanan mec eu je i Jisas Kraisnu me je, uqa Anut Melah ec madena. Me je ina Mak uqa Jisas eu Kraisca, eu Anut Melahca eunu ihacena. Jisas uqa dana Anut uqa uqana gagadic odoc utimei gagadic odoc euca cabi on eunu ihacena. Uqa dana cajaca je iwaladen euca, uqa buga me qee dana cajaca deweneganadec ititacaden euca, uqa dana cajaca agena silail cagasiaden euca, uqana odoc eu cunug Jisas uqa dana Anut gagadic odocca bilen ec ihacena. Jisas uqadodocnu ija Dana Melah, ijana cebac bilec eu dana cajaca mati besiadec fajadecnu culigen imei eunu toni nem ec maden. (Mak 10.45 feiga.)

Mak uqa Jisas odi odonnu je mati jaqen. Uqa gaid Jisas odi odimei mahuc odi odon ec jaqen. Mak uqa Jisas dana cajaca je iwaladen eunu je mati qee jaqel. Euqa Mak uqa Jisas eu iwaladec dana je mati jaqen. Mak uqa casac Wa Joadec Jonnu jaqen. Odimei Jon uqa Jisas wa joudeceb Kis uqa Jisas u suldocob wadauna nueceb Seten temdon eunu jaqen. Odimei eu hedocob Jisas uqa dana cajaca me madecnu cabica, me je iwaladecnu cabica odon eunu jaqen. Casac Jisasna malogom age Jisas uqa in tutuc qee doloin, euqa cebitcebit uqanu dodoig li Pita uqa Jisas eu Anutna Krais ec maden. (Mak 8.29 feiga.) Euqa Juda dana benben age Jisasna cad mimeig age hibna uqanu gemanaga ben beceb uqa qocobil cal mecnu togodoin ec feigale. Makna me je cit qoc age Jisas na babalecna tuitu qocobil cal mimei ceseli cajennu saena.

Makna me je cit qoc lecis nijia eu [ ]na gadac men. Cit qoc je i docca dana age Mak eu qee jaqel, euqa dana fil oso jaqen, ec cisdoin.

Je Dunuhnu Dado Mec

1. Jisas uqa uqana cabi oc sanan men (1.1-13)

A. Wa Joadec Dana Jon uqa Jisas aqunidon (1.1-8)

B. Jon uqa Jisas wa jouden (1.9-11)

C. Seten uqa Jisas temdu fen (1.12-13)

2. Jisas uqa Galili hatuna uqana cabi on (1.14-6.29)

A. Uqana cabi Galili hatuna sanan men (1.14-3.12)

1. Uqana malogom aquniadec utaadeceb toodoin (1.14-20)

2. Uqa kobolkobol odoc Kapaneam jobonna odon (1.21-34)

3. Uqa Galili hatuna cocobi nuen (1.35-45)

4. Uqa Kapaneam jobonna cabi on (2.1-11)

5. Jisas Juda agena cuha deelna cabi qee oc eunu maden (2.23-3.12)

B. Uqa Galili hatuna uqana cabi haun on (3.13-6.29)

1. Jisas aposel 12-pela nesili ehaden (3.13-19)

2. Uqa Kapaneam dana cajaca iwaladen (3.20-35)

3. Uqa Anutna culnu galolo je maden (4.1-34)

4. Uqa Galili wa gad cagoc leti nuen (4.35-5.20)

5. Uqa Galili ono kobolkobol odoc haun odon (5.21-43)

6. Nasaretdec dana cajaca age Jisas hibemdoin (6.1-6)

7. Jisas uqana malogom 12-pela lecislecis suladeceb belein (6.7-13)

8. Herod uqa Jisasnu Wa Joadec Jon ec cisdon (6.14-29)

3. Jisas uqa Galili hatu culdimei cudun filfil nuen (6.30-9.32)

A. Uqa Galili wa gad cagoc leti uqa cudun ono isec nuen (6.30-52)

B. Uqa Galili wa gad cagoc ceseli leti uqa Genesaret hatuna nuen (6.53-7.23)

C. Uqa Fonisia hatuna nuen (7.24-30)

D. Uqa Dekapolis hatuna nuen (7.31-8.10)

E. Uqa Sisaria Filipai ono isec nuen (8.11-9.32)

4. Jisas uqa Galili hatuna uqana cabi hedon (9.33-50)

5. Jisas uqa Judia hatunaca Peria hatunaca cabi on (dac 10)

A. Jisas uqa ocobocobec kobol cagocnu iwaladen (10.1-12)

B. Jisas uqa mel simnu iwaladen (10.13-16)

C. Dana haun cehewanca uqa Jisasca hocob madesin (10.17-31)

D. Jisas uqa cal mimei ceseli cajigian ec maden (10.32-34)

E. Jems Jonca ale Jisas je madowasannu bilesin (10.35-45)

F. Jisas dana oso, ijan Batimias, uqa ameg galuc mec me muden (10.46-52)

6. Deel 6-pela hedocob Pasowa Sab Jec Ben Deel caligiannu ninijen Jisas uqa age qocobil cal migiannu Jerusalem ono nuen (dac 11-15)

A. Jisas uqa kingwe Jerusalem dunuh len (11.1-11)

B. Jisas uqa tempel jo soidon (11.12-19)

C. Jisas uqa Juda dana benben gami fee dadani hedoin (11.20-12.44)

D. Jisas uqa Oliw Aluhna cit qoc saennu maden (dac 13)

E. Juda dana benben age Jisas qocnu jic walein (14.1-2)

F. Caja oso Jisas ilona mool dedeman me bahic joiden (14.3-11)

G. Age Jisas hewudi gesildumeig na babalecna tuitu qocobil cal men (14.12-15.47)

7. Jisas ceseli cajimei leih age uqa fein (dac 16)

Wa Joadec Jon Tibudna jic saciadon

(Matju 3.1-12; Luk 3.1-9, 15-17; Jon 1.19-28)

1 I Jisas Krais uqana me je* sanan mec, uqa Anut Melah.

2 Anutna je hahun madec dana, Aisaia uqa je jaqen eu odi calen:

“Feiga, ija ijana sos suldocomin aqunihi nuigian.

Uqa hinana jic saciadugian. (Malakai 3.1)

3 Dana jejeg oso wadauna† bibili utai maadena,

‘Tibudna jic saciadoiga.

Uqana jic tutuc mudeiga,’ adena,” en. (Aisaia 40.3)

4 Odocob Wa Joadec Jon uqa wadauna camasac men. Uqa dana cajaca je qasali maaden, “Agena silailnu tului falicdumeig wa joadec oiga. Odi odocobilfi Anut uqa agena silail cagasiadigian,” aden. 5 Dana cajaca Judia hatuna bileginaca, dana cajaca Jerusalem bileginaca age cunug Jonca lein. Limeig age agena silailnu je qasali madocobil Jon uqa Jodan Wana wa joaden.

6 Jon uqa kamel bagicna lotoc mudec tacoloi, odimei uqa wailohna dool ganacna oologam mudec taqoloi, odimei uqa sisca mehud uqana waca joloi.‡ 7 Uqa dana cajaca je qasali maaden, “Dana oso uqa hib tooti hugian, uqana gagadic odoc ijana gagadic odoc wooldona. Uqa dana meca bahic. Ijaqa dana meca qee. Ija uqana cabi dana me bahic ihoc qee, ija jogoimig uqana jaih tacec halu cufalitocwe qee. 8 Ija age wana wa joadigina qa uqa age Kis Gunna wa joadigian,” aden.

Jon uqa Jisas wa jouden

(Matju 3.13-17; Luk 3.21-22)

9 Saen euna Jisas Nasaretdec Galili hatuna hocob Jon Jodan Wana wa jouden. 10 Odocob Jisas wanadec cali beceb mahucwe sao ohis jic cebec hudeceb Kis cuhudid cinigwe uqaca nenen tebandu fen. 11 Odocob jejeg oso sao ohisdec camas mi madon, “Hina ija melami nalunin migina. Ija hinanu wawi ben ceelena,” don.

Seten uqa Jisas temdon

(Matju 4.1-11; Luk 4.1-13)

12 Saen euna bahic Kis uqa Jisas u suldocob wadauna nuen. 13 Uqa wadauna deel 40 cunug Seten temdodon bilen. Uqaha dool cusca ono bilen. Uqa odi bibilen ensel age cewel utoin.

Jisas uqana cabi oc Galili hatuna sanan men

(Matju 4.12-17; Luk 4.14-15)

14 Aria, age Jon hu hewimeig gihacdoc jona mudi hedocobil Jisas Galili hatuna limei cocobi Anutna me je qasali mamadi maaden. 15 Uqa maaden, “Saen Anutna cul cali hoia nijia. Anutna cul eu age cemenega hona. Agena silailnu tului falicdumeig me jenu wawaga meleeiale,” aden.

Jisas cul dool cedec dana 4-pela utaadeceb toodoin

(Matju 4.18-22; Luk 5.1-11)

16 Saen Jisas Galili wa gad cagocna cocobi dana oso waliagca fecialen, eu Saimon uqa waliag Andruca. Ale cimec ben wana hehelesin fen. Ge, ale cul dool cedec dana. 17 Odocob Jisas maalen, “Hu tootecebil ija odalecemin ale dana cajaca cedadec dana calowasan,” alen. 18 Odocob mahuc bahic ale cimec ben cuculesi uqa toodu belesin.

19 Uqa nag bahic onoca limei dana oso waliagca haun fecialen, eu Jems uqa Sebedi melah, uqa waliag Jonca. Ale alena wagna bibilesi cimec ben tatalec eu haun wewegi bilesin. 20 Jisas mahucwe utaalen. Odocob ale memela Sebedi uqana cabi danaca wagna bibilegin cuculadi limesi Jisas toodu belesin.

Jisas uqa dana osona buga me qee ititacdon

(Luk 4.31-37)

21 Age Kapaneam jobon hoin. Odocobil mahucwe Juda agena cuha deelna Jisas uqa Juda agena cuha jo dunuh limei je maadi iwaladen. 22 Uqa agena loo je iwaladec dana oso cunug maadeinwe odi qee maadel qa uqa dana oso, Anutna gagadic odocca madenawe, odi iwalaadi maaden. Eunu uqa je eu maadi mamaden dana cajaca age wawaga cacaden bilein, uqana iwaladec je eu wawaga qon.

23 Ono deel euna bahic dana oso uqa buga me qeeca bilen, buga eu gegehinca uqana jo ibuldon. 24 Uqa utai Jisas madon, “O Jisas Nasaretdec, hina eetanu odigigana? Hina fadalgecnu hogafo? Ija hina cel dananu dugina. Hina dana gun eu Anut suldocob nen,” don. 25 Euqa Jisas buga me qee eu cahacdudu madon, “Je culuga. Dana cuculdi qisacdoga,” don. 26 Odocob buga me qee gegehinca eu dana odudeceb uqa titi hudeceb qelelen. Odocob geh bahic euimei dana eu cuculdi qisacdon. 27 Odocob dana cajaca cunug tumatumaimeig agedodoc madocobmadocobi sisilein, “Eu eeta? Dana i je haun iwalgena! Uqa Anutna gagadic odocca buga me qee gegehinca eundec dih maadeceb age co toodu odogina,” ein. 28 Odocob Jisas hutan hatuhatu mahucwe ihoc len, Galili hatuna alildu bilein euha cunug doin.

Jisas Pita momoig me muden

(Matju 8.14-15; Luk 4.38-39)

29 Jisas mahucwe Juda agena cuha jo eu culdimei cocobi Saimon Andruca alena jona len. Uqa gami Saimon Andruca, Jems Jonca age jo dunuh lein. 30 Ono Saimon momoig uqa hag deweg daincaca hulen cabalna nijen. Odocob Jisas ono li caleceb mahucwe uqa caja hag nijennu madoin. 31 Odocobil Jisas caja cemenug limei eben hewi cesuldocob cajen. Odocob hag deweg dainca hulen eu culdeceb caji sab saciadumei cewel uaden.

Jisas dana caja matica me maden

(Matju 8.16-17; Luk 4.40-41)

32 Odocob wesu men cam toneceb age hag aqecca buga me qee hewadecca eundec cedadi Jisasca ahoin. 33 Odocob dana cajaca age jobon ben euna bilein age cunug Jisas bilen jo eu amegna cegulimeig bilein. 34 Jisas uqa hag gug filfil nijein mati bahic me maden. Uqa buga me qee dana deweneganadec hewadein mati bahic ititacadeceb dana cuculadi belein. Buga me qee age Jisasna gug doin eunu uqa eundec cahacadeceb je qee madelein.§

Jisas Galili hatuna cocobi nuen

(Luk 4.42-44)

35 Qasil bahic walag qee danec tu ninijen Jisas caji jo culimei cudun tiliec bahicna, dana oso qee bilec, euna nuimei ono uqa Anut inondudu bilen. 36 Odocob Saimon uqaca bilein eundecca Jisas wawali toodoin. 37 Uqa gulucdumeig madoin, “Dana cunug wawalhi cobogina,” doin. 38 Odocobil Jisas maaden, “Ija me je qasali maadigennu caji lem. Eunu ija jobon cunug alilgi bilegina eundec dana cajaca me je qasali maadigennu ege jobonjobon coboqale,” aden. 39 Odimei Jisas uqa Galili hatuna jobonjobon cocobi Juda agena cuha jonana me je qasali mamadi maadimei buga me qee eundec uqa dana deweneganadec ititacadeceb dana cuculadi belein.

Jisas dana oso uqa lepra hagca me muden

(Matju 8.1-4; Luk 5.12-16)

40 Saen euna dana oso deweg lepra hagca Jisasca humei uqa amegna gob cecehi Jisasnu cuha fefei ninidudu madon, “Hina ija me mitiga hecebfi ija me mitecem ijana hag culteceb ija Anut amegna cataniec bilecnu ihoc,” don.** 41 Odocob Jisas dana eunu walol docob eben huleldumei deweg qududodoi madon, “Ija me mihiga tena. Me maga!” don. 42 Saen eunadih lepra hag eu uqa dewegna culdeceb deweg hul hon. 43-44 Odocob Jisas uqa dana eu gagadic madon, “Dah maga, ceteh inu oso cain bahic sadudu cobogaun. Euqa li dewen nawel tawec ihanec dana eu hina dewen ihacdocom maleldugian. Odimeg Moses loo je wele maden eu toodumeg hina qila Anut amegna cataniec biliga dana cajaca cunug ihacadecnu Anut ihandogale,” don. Madu hedumei mahuc suldocob nuen. 45 Dana euqa uqa nunui feei je eu cunug saadi cobon, hatuhatu cunug je eu doin. Odonnu Jisas uqa camasac jobon osona lecwe qee. Uqa jobon hahagum maha danaca qee euna biloloi. Euqa dana cajaca age hatu nahanaha cunugdec uqa cemenug hoin.

*1:1: Jisas uqa calenna uqa dana cajaca Anutna me je qasali maaden. Anut uqa Jisas uqana cebac bilecca, uqana cal mecca, uqana ceseli cajecca euna dana cajaca cahahaadecnu ihoc eu Anutna me je.

†1:3: Age je Matju 3.1na nijia eu feiga.

‡1:6: Age je Matju 3.4na nijia eu feiga.

§1:34: Jisas uqa Anut Melah, odocob uqa dana Anut uqana dana caja cahahaadecnu wele nesili ehuden. Grik jena age dana eu Krais ein, odocob Hibru jena age dana eu Mesaia ein. Age Mak 1.1 feiga. Juda dana age Anut uqa dana eu suldocob hugian eunu doin. Euqa age dana eu kingwe calimei uqa Rom dana Juda agena hatunadec ititacadeceb Isrel age besiadec haun biluqagan ec cisdoin. Euqa Jisas uqa cabi oc i odi odocnu qee hol. Eunu uqa buga me qee age uqana gugnu madecebil dana cajaca age docnu qee gale dol.

**1:40: Age je Matju 8.2na nijia eu feiga.