Muⱪeddes Kalam (yǝngi yeziⱪ) Korintliⱪlarƣa «2» 13

Ahirⱪi agaⱨlandurux wǝ salamlar

1 Bu yeninglarƣa üqinqi ⱪetim berixim bolidu. «Ⱨǝr bir ⱨɵküm ikki-üq guwaⱨqining aƣzida ispatlinixi kerǝk».□ ■ 2-3 Mǝn ilgiri ikkinqi ⱪetim yeninglarda bolƣinimda burun gunaⱨ sadir ⱪilƣanlarƣa ⱨǝm ⱪalƣan ⱨǝmminglarƣa xundaⱪ eytⱪan, ⱨazirmu silǝrdin neri bolsammu ⱪaytidin aldin’ala agaⱨlandurup eytimǝnki (silǝr Mǝsiⱨning mǝn arⱪiliⱪ sɵzligǝnlikigǝ ispat tǝlǝp ⱪilip keliwatⱪininglar tüpǝylidin), mǝn barƣinimda ⱨeqkimni ayimaymǝn; dǝrwǝⱪǝ mǝn arⱪiliⱪ sɵzlǝwatⱪan Mǝsiⱨ silǝrgǝ nisbǝtǝn ajiz ǝmǝs, bǝlki aldinglarda intayin ⱪudrǝtliktur;□ 4 U dǝrwǝⱪǝ ajizliⱪta krestlǝngǝn bolsimu, lekin Hudaning ⱪudriti bilǝn yǝnila ⱨayat. Bizmu Uningda ajiz bolsaⱪmu, Hudaning silǝrgǝ ⱪaratⱪan ⱪudriti bilǝn, Uningƣa baƣlinip ⱨayat yaxaymiz.□ 5 Əmdi ɵzünglarni etiⱪadta barmu-yoⱪ dǝp tǝkxürüp kɵrünglar; ɵzünglarni sinap beⱪinglar! Silǝr Əysa Mǝsiⱨning ɵzünglarda bolƣanliⱪini (sinaⱪtin xallinip ⱪalmisanglar!) bilip yǝtmǝmsilǝr?■ 6 Əmdi silǝrning bizning sinaⱪtin xallinip ⱪalmiƣanliⱪimizni bilip ⱪelixinglarni ümid ⱪilimǝn.

7 Silǝrning ⱨeqⱪandaⱪ rǝzillik ⱪilmasliⱪinglar üqün Hudaƣa dua ⱪilimiz; bu, bizning sinaⱪtin ɵtti dǝp ⱪariliximiz üqün ǝmǝs — ⱨǝtta sinaⱪtin ɵtmidi, dǝp ⱪaralsaⱪmu, mǝyli — muⱨimi silǝrning durus bolƣanni ⱪilixinglar.□ 8 Qünki biz ⱨǝⱪiⱪǝtkǝ ⱪarxi ⱨeq ix ⱪilalmaymiz; nemila ⱪilsaⱪ u bǝribir ⱨǝⱪiⱪǝtni ayan ⱪilidu, halas.□ 9 Qünki biz ajiz bolsaⱪmu, silǝrning küqlük bolƣininglardin xadlinimiz. Xuningdǝk biz yǝnǝ xuningƣa dua ⱪilimizki, silǝr kamalǝtkǝ yǝtküzülgǝysilǝr. □ 10 Silǝrning yeninglarƣa barƣinimda Rǝb manga ƣulitix üqün ǝmǝs, bǝlki etiⱪadni ⱪurux üqün amanǝt ⱪilƣan ⱨoⱪuⱪimni ixlitip silǝrgǝ ⱪattiⱪ ⱪolluⱪni kɵrsǝtmǝslikim üqün, mǝn silǝrdin yiraⱪta bolƣinimda muxularni yazdim.■

11 Əng ahirda, ⱪerindaxlar, xadlininglar; kamalǝtkǝ yǝtküzülünglar, riƣbǝt-tǝsǝllidǝ küqǝytilinglar; bir oy, bir pikirdǝ bolunglar; inaⱪ-hatirjǝmliktǝ ɵtünglar; wǝ meⱨir-muⱨǝbbǝt wǝ inaⱪ-hatirjǝmlikning Igisi Huda silǝr bilǝn billǝ bolidu. □ ■ 12 Bir-biringlar bilǝn pak sɵyüxlǝr bilǝn salamlixinglar. ■ 13 Barliⱪ muⱪǝddǝs bǝndilǝrdin silǝrgǝ salam. 14 Rǝbbimiz Əysa Mǝsiⱨning xapaiti, Hudaning meⱨir-muⱨǝbbiti wǝ Muⱪǝddǝs Roⱨning ⱨǝmraⱨ-ⱨǝmdǝmliki silǝrgǝ yar bolƣay!

□13:1 «Ⱨǝr bir ⱨɵküm ikki-üq guwaⱨqining aƣzida ispatlinixi kerǝk» — bu Tǝwratning sɵzi, xundaⱪla Tǝwrattiki wǝ Injildiki muⱨim bir prinsiptur. «Qɵl.» 19:15, «Mat.» 18:16, «1Tim.» 5:19ni kɵrüng.

■13:1 Qɵl. 35:30; Ⱪan. 17:6; 19:5; Mat. 18:16; Yⱨ. 8:17; Ibr. 10:28.

□13:2-3 «ⱨazirmu silǝrdin neri bolsammu ⱪaytidin aldin’ala agaⱨlandurup eytimǝnki... mǝn barƣinimda ⱨeqkimni ayimaymǝn» — «ⱨeqkimni ayimaymǝn»: Pawlus «1Kor.» 5-babta, eƣir gunaⱨ sadir ⱪilƣan bir kixi üstidin «ǝtliri ⱨalak ⱪilinsun, xundaⱪ bolƣanda roⱨi Rǝb Əysaning künidǝ ⱪutⱪuzular, dǝp Xǝytanƣa tapxurulsun» degǝn ⱨɵkümni qiⱪarƣan. Pawlus muxu yǝrdǝ kɵzdǝ tutⱪini, gunaⱨⱪa patⱪan kixilǝr ohxax ⱨɵkümgǝ uqrixi mumkin, demǝkqi.

□13:4 «Bizmu Uningda ajiz bolsaⱪmu...» — bu ajayib ibarǝ toƣruluⱪ «ⱪoxumqǝ sɵz»imizni kɵrüng. «...bizmu Uningda ajiz bolsaⱪmu, Hudaning silǝrgǝ ⱪaratⱪan ⱪudriti bilǝn, Uningƣa baƣlinip ⱨayat yaxaymiz» — demǝk, rosullar sirttin ⱪariƣanda ajiz kɵrünsimu (wǝ bǝlkim ɵzlirini ajiz ⱨes ⱪilƣan bolsimu) u Hudaning Korintliⱪlar arisida Ɵz ⱪudritini kɵrsitidiƣanliⱪiƣa ixinidu, xuningƣa ixǝnqi kamil bolup, «Biz xu ⱪudrǝt bilǝn hizmitinglarda küqlük bolimiz» degǝndǝk bolidu.

■13:5 1Kor. 11:28.

□13:7 «bu, bizning sinaⱪtin ɵtti dǝp ⱪariliximiz üqün ǝmǝs — ⱨǝtta sinaⱪtin ɵtmidi, dǝp ⱪaralsaⱪmu, mǝyli — muⱨimi silǝrning durus bolƣanni ⱪilixinglar» — demǝk, Korintliⱪlar rǝzilliktin towa ⱪilƣan bolsa, Pawlus wǝ ⱨǝmkarlirining hizmiti ünümlük, mewilik wǝ xǝrǝplik kɵrünüxi mumkin — lekin Pawlusⱪa nisbǝtǝn, muⱨimi Korintliⱪlarning ɵzlirining roⱨiy ǝⱨwalidur. Bu naⱨayiti uluƣ sɵz toƣruluⱪ «ⱪoxumqǝ sɵz»imizni kɵrüng.

□13:8 «Qünki biz ⱨǝⱪiⱪǝtkǝ ⱪarxi ⱨeq ix ⱪilalmaymiz; nemila ⱪilsaⱪ u bǝribir ⱨǝⱪiⱪǝtni ayan ⱪilidu, halas» — bu intayin ǝⱨmiyǝtlik ayǝt toƣruluⱪ «ⱪoxumqǝ sɵz»imizni kɵrüng. Baxⱪa birhil tǝrjimisi: «Biz ⱨǝⱪiⱪǝtkǝ zit ixlarni ⱪilmastin, ⱨǝⱪiⱪǝt boyiqǝ ix ⱪiliximiz kerǝk».

□13:9 «Qünki biz ajiz bolsaⱪmu, silǝrning küqlük bolƣininglardin xadlinimiz» — «küqlük» wǝ «ajiz» roⱨiy tǝrǝptǝ eytilƣan, ǝlwǝttǝ.

■13:10 2Kor. 10:8.

□13:11 «riƣbǝt-tǝsǝllidǝ küqǝytilinglar» — muxu ibarǝ grek tilida bir sɵz bilǝnla ipadilinidu. «meⱨir-muⱨǝbbǝt wǝ inaⱪ-hatirjǝmlikning Igisi Huda» — grek tilida: «meⱨir-muⱨǝbbǝtning ⱨǝm inaⱪ-hatirjǝmlikning Hudasi» — demǝk, U meⱨir-muⱨǝbbǝt, hatirjǝmlik bǝrgüqi ⱨǝm Ɵzi ⱨǝrdaim meⱨir-muⱨǝbbǝttǝ wǝ inaⱪ-hatirjǝmliktǝ turƣuqi Hudadur.

■13:11 Rim. 12:16,18; 15:5; 1Kor. 1:10; Fil. 2:2; Ibr. 12:14; 1Pet. 3:8

■13:12 Rim. 16:16; 1Kor. 16:20; 1Tes. 5:26; 1Pet. 5:14.