Tɛnɛgi é veeni masagi ya
31
1 Masagi Lemuwɛle* Lemuwɛle: Nu la masagi nii ɠwɛɛ. Masagi Lemuwɛle laawooiti, kalagi niiti dee…: Tati pelei taɠili ɓalaa ka ga nii: Masa masagi Lemuwɛle laawooiti, niiti dee…. Ni naa ʋe tama, Lemuwɛle ɠɛni mu ga Isemayɛle mavofodai gila. Wɛlɛ 30:1 zu, ta suɠulazuʋɛ. laawooiti. Kalagiti dee ti woni da.
2 Lee ɠa nà bo è ma, dòun zunu?
Lee ɠa nà bo è ma, kòozu loin?
Lee ɠa nà bo è ma, dòun zunu, gè minazeɠeni ga gè sɔlɔɔ?
3 Mina è-zuvikɛi ve anzanuiti zea,† Nii ɠa ɓɔɛzu, é ʋilɛ anza ʋɛlɛi wu anzanu mɔinmɔingiti ba masa pɛlɛi wu, niiti ta la zoo ti masagi zeɠe siɛ ʋele ʋa. Wɛlɛ ʋɛti: 5:9-11; 1Ma 11:1; Neɠ 13:26.
ta ɗa-ʋeleiti, naati zea, niiti ta ɗa masagiti kaka.
4 É la zolooni masagiti ma, Lemuwɛle,
é la zolooni masagiti ma, ga ti ʋa dɔɔi ɓɔle,
ɓaa naati, niiti ti kundiɠilai ɠɛɛzu, ti ʋa gaazulati gani ɓɔle.‡ Wɛlɛ ʋɛti: 16:10, 12; Guy 72:1-4; TbN 10:16-17.
5 Mazɔlɔɔ a ti zona, ti mina yeema tɔgi laawooiti ma,
ta ti mina maawɔin nuiti ta-ɠaamai maavalibo.
6 Nu gaazulati kpɔle anii ve naa ya, nii undaa ʋaazu ʋilisu,
ta dɔɔi ve maawɔin nui ya.
7 É kpɔle, é yeema ná-baladai ma,
é mina ɠitoo ná-maanɔɠɔi zu.
8 Laalao è ɓɔɛ, è naati maalobo, niiti ti la zooga ti ʋa ɓɔɛ,
è naati kpein maalogi wo, niiti kɛlɛbai wogai ga tiye.
9 Laalao è ɓɔɛ, è tukpɔi ɠaaleʋe ga telebodai,
è maanɔɠɔi nui maalobo ta bala nui.
Anzanu zɔɓelamai ná-fai
10 Undaanɛɛ nu ɠa ga naa, nii a anzanu zɔɓelamai zɔlɔɔ,
tosuʋɛ wɔɔlɔʋɛ kɔbu ani ʋagɔiti sɔngɔi ʋa.
11 Sinigi laaʋɛ da,
ani ʋagɔ nɔpɛ ge la ʋalaga ná-pɛlɛi wu.
12 É la ɗa ga kazemazu vaa nɔpɛ kɛ ga sinigi,
kɛni faa ʋagɔi nɔ, sii ma voloiti pɛ su.
13 Toɠa ɗa baala deɠai ɠaiziɛ ta gezei,
é ɗa boti ɠɛ ga zeeiti ga koozunɛɛi.
14 Eɠɛ yaaɠo ɓatoi,
toɠa ɗa zeɠe ga ɠɔnɔgi ɠoozama.
15 Toɠa ɗa wuzeɠe ga kpidiɓidigi,
é daamianigi ve ná-pɛlɛyeɠei ya,
é ná-deveiti fe ná-botiɠɛ anzanuiti zea.
16 É ɠisiɛ kpalagi ta zu, é geya,
é leezɛn ɓelei leʋe ba, ga ná-botii zulɔnɔgi.
17 Toɠa ɗa botii ɠɛ ga suvikɛi pɛ,
zea la ʋalaga ɠɔ.
18 Toɠa pɛtɛsu ga zeavaiti su ɠa ɓɛtɛzu,
toɠa ɗa ɠaazuɓa, é ɗa botii ɠɛ kpidii, abu zezei ɠa.
19 Toɠa ɗa kenagi zo ga yeei, é ɗa gezei ɓali,
é kena kpakui zo ga yeeɓeɠaiti.
20 Zeei maalegɛ maanɔɠɔ nuiti ta-ɓɔba vai ma,
toɠa ga faanɛɛ ɠɛ nu bala nuiti bɛ.
21 É la lua kɔɔlɛ ʋa, é ʋilɛ ná-pɛlɛi ʋa,
tɔɔzei seɠe ʋagɔiti ta ti pɛ zea.
22 Toɠa ɗa dasuzeɠeiti kpɛtɛ tɔ ɓɔɠɔi,
geze ɓɔi seɠeiti ta§ geze ɓɔi seɠeiti ta: Seɠe zɔngɔ ɓaaɓaagiti kɛni ga tiye, ti ɠɛni ga zobodai ma ʋoogi. Wɛlɛ ʋɛti: 7:16; Zen 41:42. zea.
23 Sinigi ɠa ga seizumaanɛɛgi ɛsɛ pɛ ge kwɛɛ, ti ɗa unfe ma,
tiya ɠa ta ɗa zei taa vaawo bosuʋɛti.
24 Toɠa ɗa seɠeiti fɛlɛ, é ɗa ti ʋɔdi,
é ɗa saamaɠiligiti fe yaaɠoiti zea.
25 Zɛbɛi ta unfemai, ta bɛ ga maaɠili zɔɔlai,
toɠa ɗa ɲɛɛ laa ɠakama, a ɠɛna ɠisiaa ʋelela ʋele vaiti su.
26 Toɠa ɗa ɓɔɛ ga ɠimalai,
soogɛ kalagi wosu ga wooɠɛɠiladai.
27 Toɠa ɗa wɛlɛ fai kpein ma, é ziɛzu ná-pɛlɛyeɠei wu,
é la looɠoga botii ʋa.
28 Ná-dointi ta ɗa wuzeɠe, ti ʋa ti ɗa maamusɛ.
Maamusɛ vai ɠa ɗa ɠɛ ga guyei sinigi la.
29 É ɠɛ ma: «Anzanui mɔinʋɛ, ti-losuʋɛti bɔɔlɔai,
kɛlɛ ɗɔun ɗa, è ɓudɛʋɛ ti pɛ maazu.»
30 Zaalai ɠa ga yaava ani, padai ɠa ɗa leʋe,
kɛlɛ anzanui é luazu Ɠɔoɠɔ GALAGI ʋa, naa ɠa maanɛai ga é maamusɛi zɔlɔɔ.
31 À kpɔlɔzuʋɛ ma lɔnɔgi ve zea!
Wo maamusɛ vaiti bo, taazuʋɛ ɲɛgɛlɛin é ʋilɛ kɛɛwotiiti pɛ ba!
*31:1 Lemuwɛle: Nu la masagi nii ɠwɛɛ. Masagi Lemuwɛle laawooiti, kalagi niiti dee…: Tati pelei taɠili ɓalaa ka ga nii: Masa masagi Lemuwɛle laawooiti, niiti dee…. Ni naa ʋe tama, Lemuwɛle ɠɛni mu ga Isemayɛle mavofodai gila. Wɛlɛ 30:1 zu, ta suɠulazuʋɛ.
†31:3 Nii ɠa ɓɔɛzu, é ʋilɛ anza ʋɛlɛi wu anzanu mɔinmɔingiti ba masa pɛlɛi wu, niiti ta la zoo ti masagi zeɠe siɛ ʋele ʋa. Wɛlɛ ʋɛti: 5:9-11; 1Ma 11:1; Neɠ 13:26.
‡31:4 Wɛlɛ ʋɛti: 16:10, 12; Guy 72:1-4; TbN 10:16-17.
§31:22 geze ɓɔi seɠeiti ta: Seɠe zɔngɔ ɓaaɓaagiti kɛni ga tiye, ti ɠɛni ga zobodai ma ʋoogi. Wɛlɛ ʋɛti: 7:16; Zen 41:42.