Misee
Ná-Sɛʋɛi
Sɛʋɛi lɔɔzeigi
GALA goo wo nui Miseeni ka ti ɠɛni ma ta GALA goo wo nui Ezayi, é nɔnɔ ma wotii ɠɛɛni gaamai zu, é zo kona undɔfela puunaanigɔi (740) ma, é zeeli kona undɔfelai (700) ma, aisa Yesu Kilista ʋa zɔlɔɔ eteai zu. Ʋelei nɔ Ezayi kɛɛni la, é ɓɔɛni Zuda masadai zu nuɓusɛiti pɔ, siɛgi zu naati ti ɠɛni la kpɔɛi maazu ta Asiili yooi zu zalaʋusuiti.
Misee ɓɔɛni goomɛni nuiti pɛ pɔ, ga ta-yooi, mɔun ge la ma ga ta-laa wolai Zeeluzalɛme, toɠa ʋaazu zosu, eɠɛʋelei é ɠɛɛni la ga Samali, Izelayɛle ná-masadai ma laa wolai, é looni bu, é zo kona undɔfela puufelegɔ maazu felegɔi (722) ma, é zeeli kona undɔfela puufelegɔ maazu ɠilagi (721) ma, aisa Yesu ʋa zɔlɔɔ eteai zu. É ti looni ɠizu ga, faaɓaagi é ʋaazu, faa ɲɔiti ti ti ɠɛɛni, naa zuɓoloi ɠana ti ʋaazu kɔmɔsu, mɔun ge la ma mɛɛ ga telebotala vaiti ti ti ɠɛɛzu ga ɓɔɠɔ.
GALA goo wo nui ɠa pɔ ga, GALA ge faiti daazale, naa ɠɛa ga ti ʋilɛga laawu ta nu wolaiti, ta nuɓusɛiti ta-ɠundiɠi wolaiti, ta zobobɛ nu wolaiti, ta totuɠɔiti, ta tukpɔɠaaleʋe nuiti, ta zalaɠa ɠula nuiti. É sakpegi wuzeɠeni ɓalaa GALA goo wo nuiti daalɔɠɔma, niiti ti ɠɛni nuɓusɛiti kakasu ga minazeɠe kpɔɛiti, ti ɗa ɠɛ ma, zobo ge la mɔ ná, faa nɔpɛ ge ʋa valibo niima vaiti su.
Misee ná-tɛnɛ gooiti maaʋele ma, toɠa pɔ ga zɔiti ti woilosu gooi ma, ti ɠigaiziɛ ti ziimazeɠe pagɔ wo, ti ɠolo nɔ GALA ziimai ʋɛ, ti unfemai wo, ti zɔiti nɛɛ ʋɛ (6:8). Naama lɛnɛ gooiti ka GALA ná-kizo fai ma wooi wo fai ʋilɛni polu, GALA ge ʋaazu kɛɛzu ga niinɛ, ʋelela ʋelei ná-nuɓusɛiti bɛ.
Misee ná-sɛʋɛi ɠɔɠɔlogɛ keela woo felegɔ ma, ti ʋilɛsu ɓɔɠɔ ʋolu, ti ɗa ɠomi: GALA ka bosu ga toɠa ʋaazu ná-nuɓusɛiti tukpɔɠaaleʋezu, é ti maaɠolo (gaaɠwɛsu 1 é zeeli gaaɠwɛsu 3 ma, gaaɠwɛsu 6:1 é zeeli gaaɠwɛsu 7:7 ma), kɛlɛ é minazeɠeni bɛ ɓalaa, ga toɠa kizo (gaaɠwɛsu 4 é zeeli 5 ma, gaaɠwɛsu 7:8 é li gaaɠwɛsu 20), é ti ʋu su ʋolu, é ti lɔ kundiɠi wu, nii a ɠula Davide mavofodai zu (gaaɠwɛsu 5:1-4a).
1
1 Wooiti ka ga niiti Ɠɔoɠɔ GALAGI ti laazeelini Mɔleesɛte nui Misee ma, Zuda masa saʋagɔiti ta-yeeɠɛɠalaiti, Yɔtame, ta Aɠaze ta Ezeekiase. Kulakɛlɛmai naati ti ʋilɛni taa wolaiti ba, ti ga, Samali ta Zeeluzalɛme.
GALA ná-tukpɔɠaaleʋeai Izelayɛle laalɔɠɔma
2 Nuɓusɛiti pɛ à woilo!
Zooi ta wɔiti wo zooi ɠa, à ɠida bu!
Maliɠii Ɠɔoɠɔ GALAGI ɠa yɛsu seizu ɲadegai,
é zeele wooi wo wo laalɔɠɔma!
3 Wɛlɛ Maliɠii ɠana ɠula seizuʋɛ,
é yei, é ɗa ɠɔɠɔziɛ zalaɠa ɠula adaʋɛti su.
4 Gizeiti ti ɗa ɓusɛ kɔɠɔwu,
pɛtugiti sulaa ɗa lao,
eɠɛ kedoi ɠaa ɠa ɠɛ wuunsu abui ɠa,
eɠɛ ziɛ a ɠɛ gizei yeizu.
5 Naa pɛ ka ga Zakɔɓe mavofodaiti ta-lɔ koloɠologi,
Izelayɛle ʋɛlɛyeɠei ná-kotoi maaʋele ma.
Ɓɛ ɠa é Zakɔɓe liizu tɔ koloɠologi ma?
Ná-taa wolai Samali laade ɓaa?
Ɓɛ ɠa é Zuda liizu ani ɠɔɔ vaiti ma?
Zeeluzalɛme laade ɓaa?
6 Maliɠii ɠɛni ma: «Naa ma, nà Samali ɠɛɛzu ga kɔtu ziɠigi dɔɓɔi zu,
ti ɗa leezɛn ɓelei la ma,
nà ná-kɔtuiti kilikili, ti la nɛmɛi zu,
gè kpale ná, ma wuulaagiti ti maaɠala.
7 Ná-kɔɔɠɔ gani kpɛtɛaiti su ɠa ɠaleɠale,
ná-tɔnɔ ɲɔiti pɛ ti ɠala.
Ná-vololiba zaɠaaiti, gè naati suɓulukpulu,
tɔɔzei naati ti ɓɛtɛni ga ná-koloɠologi ma ɠulanumai,
ta ʋaazu ɠɛɛzu ga koloɠologi taɠiligaa ma ɠulanumai.»
GALA goo wo nui ná-gɔlɔi
8 Naa ɠa é kɛɛzu gè ɠaalɛizu, gè ɗa wɔlɔ,
gè ɗa ziɛ ga ɠɔɠɔa ɲakai, kɔ̀ba ɲakai,
gè ɗa kpeei loo eɠɛ koʋei,
gè ɗa kpalagi wo eɠɛ saa wɔnigi.
9 Mazɔlɔɔ maanɔɠɔi seeliai Samali ma, é la ɠulaa su pɛ.
É zeelia Zuda yooi ma ta Zeeluzalɛme taa ziɠidaʋɛ,
ʋɛ nà-nuɓusɛiti ti zeini ná.
10 À mina daazeeli Gate taazuʋɛ, à mina wɔlɔ!
Ɓɛte-Leafela nuiti à ɠilikili fufiligi zu!
11 Safiil nuiti, à leʋe ga ɠɔba ɲakai ta wa-unfegi!
Saanan nuiti ti la zoosu ti ʋa ɠula taa ʋa.
Gɔlɔi ɠa wosu Ɓɛte-Ɠayɛsɛle taazuʋɛ,
kpɔba zobo ge la mɔ ná.
12 Malɔte taaʋeaiti sasu ɠa ɓalizu ta-ɠulanumaiti ma vaa zu.
Mazɔlɔɔ nimiza vai Ɠɔoɠɔ GALAGI teʋegai
é zeelia Zeeluzalɛme taa ziɠidaʋɛ ma.
13 Lakise laaʋeaiti, à wa-ɠɔɔɠɔ wotoloiti ta sooiti kɛʋele ɓɛtɛ.
Wo ʋokɔɠɔni Izelayɛle ná-wooʋaladai ma,
wo Zeeluzalɛme lɔ tɔ koloɠologiti su.
14 Naa ma, Zuda nuɓusɛiti à bali ma wa Mɔleesɛte-Gate nuiti.
Akeziɓe taa wolai la ɠɛa ga
kula faa zu ani Izelayɛle nuɓusɛiti ta-masagiti bɛ.
15 Maliɠii ɠa wo lɔɔzu nu niinɛ yeezu Maleesa nuiti.
Izelayɛle ɠundiɠiiti ti-lɔɠɔ ɠulaai,
ta ʋelazuʋɛ ɠaiziɛ Adulame ʋugi zu.
16 À wɔungiti bo, wo ti ɓuye ma, Zeeluzalɛme taaʋeaiti,
kpaanagi ɠɛ wo unma, eɠɛ ɗuai nɔungi,
à wo yiima lointi ta-wɔlɔi wo,
mazɔlɔɔ ta liizu ga tiye duɔlai zu, ti maaɠooza wo ʋa.