4
Raraŋ Aetaniacna meikramtaɨra wɨk aŋgɨnandet
1 Ib 12.15Raraŋ Aetaniaca ai motocmo wɨktɨtɨkna auŋa aŋgɨ taŋna baburina. Ainda moca aia ndoritake matau wat, moca ma wateknanna, nena ramoot ianna an iroa mo te, ma an auŋa mbukna mɨnna wanaiŋ. 2 Na aia kam wembaŋ laŋmo waracrinan, an kirar toco Israelnanda waracrinan. Na mina warac kamainda waracrina, na mina Raraŋ Aetaniacna kammo mba rɨpacatke. Ainda moca an kam wembaŋ laŋa mina waracrinanna ma minmo mba otacatke.
3 Ŋap 95.11, na Ib 3.11, na 3.14Na aia meikramtaɨra Raraŋ Aetaniacmo rɨpacrenanna, ma aimo mana wɨktɨtɨkna auŋmo watcarica aia anna mbuknandet. Na atua Raraŋ Aetaniaca an auŋna ndamŋica ma gaindopat,
“Ainda moca aku nikkatta gaindopatna,
‘Gidik tamuŋ,
mina aukna wɨktɨtɨkna auŋa mba mbukitndai.’ ”
Na anna gidik, an reacna kamma ma Mosesna mɨn mbuŋa larurinan. Na aia lamŋirinan, atu ŋgoinna Raraŋ Aetaniaca gan tiacarpaikca tɨkrinan, ma ndona aiŋirmo kocnaia morina. 4 RL 2.2, na NA 20.11, na 31.17Ainda moca mana timbigta kapna kam tɨp ianna an ra parmbaiapa mbut mbuniŋmo gaindopatna, “An parmbaiapa mbut mbuniŋna ra, Raraŋ Aetaniac, ma ndona moatna reikca moa maiatke, ma an ramo wɨk matɨkat.” 5 Ŋap 95.11Na an kam tɨp mbuŋa outta aia watrinanna ma gaindopatna, “Mina aukna wɨktɨtɨkna auŋa mba mbukitndai.” 6 Na anna aimo wandacrinan, Raraŋ Aetaniacna wɨktɨtɨkna auŋa maeacreke, na meikramtaɨr ndeida anna mbukna mɨn. Na an meikramtaɨra atua mina kam wembaŋ laŋmo waracrinan, na mana kammo ipuŋrinan, mina anna mba mbukatke. 7 Ŋap 95.7-8Na iŋmbai mbuŋa iarir wɨtca taŋgatke, an wiwitna mɨnna, Raraŋ Aetaniaca ma Gagrirta Ramoot Dewitna up mbuŋa kamma gainda tirca gaindopatna, “Mandeaca ne Raraŋ Aetaniacna upna kamma warac te, ne kai garuru teac.” Na Dewitna mɨn mbuŋa Raraŋ Aetaniaca ma gaindopat,
“Mandeac,” anna aimo ainda wandacrina,
kabena ra ianna ma babuatnanna meikramtaɨra mana wɨktɨtɨkca mbukna mɨn.
8 TW 31.7, na Ios 22.4Na atua Iosua minmo wɨktɨtɨkca neaŋ te, Raraŋ Aetaniaca iŋmbaia ma kabena ra nake, mba mbopitndai. 9 Ainda moca aia lamŋirena, Raraŋ Aetaniacna meikramtaɨrta wɨktɨtɨkca maeacreke. Anna ma Raraŋ Aetaniacna Wɨktɨtɨkna Rana kirar. 10 RL 2.2, na Ib 4.4Na aia lamŋirena, ramootta Raraŋ Aetaniacna wɨktɨtɨkna taupca mbuk te, ma ndona aiŋira korwica ma wɨktɨkca eacrena. Na an kirar kabea atua Raraŋ Aetaniaca ma ndona aiŋira korwica ma ndo wɨktɨkca eacatna kirar toc. 11 Ib 3.12, na 3.18-19Aintik ai toco gagraca aiŋa moca an wɨktɨtɨkca mbukna. Na ŋarikca ramoot ianna kammo nda ipuŋrena tɨpca raŋgai te, na an kirara Israelnaŋgepca atua morinan, ma anna raŋgai te, ma anna moca irikca ma taprekenandet.
12 Ais 49.2, na Ier 23.29, na In 12.48, na 1 Ko 14.24-25, na Epe 6.17, na KIEK 1.16, na 19.15Na Raraŋ Aetaniacna kamma ma eteacna watap, na ma aiŋa moa gagaraca eacrenan. Na ma wɨrwɨr ŋgoin, ma bugrimna mim mbuniŋapna wɨwɨrmo kundrinan. Na an kamma ma meikramtaɨrmo rɨŋga mina nikinik iroarmo ŋai ŋgoinna mbukrenan. Na ma taŋga rugutapa ŋeroŋa eacrenanmo rɨkca titaca, na gagrirta metambarapa gagrirta maimnaŋar mɨkca eacrenanmo mbukrena. Ainda moca ma aina iroar inkarapa, toŋtoŋgarmo muruŋ ndamŋirenan, na ma ritrinandet. 13 Iop 26.6, na Ŋap 33.13-14, na 90.8, na ML 15.11Na Raraŋ Aetaniaca moatna reac ianna mana lamnɨac ŋgoutta mba iŋgorocitndai, wanaiŋ ŋgoin. Reikca muruŋcamiŋa mana lamnɨacmo raek ŋgoin ndeacrenan. Ainda moca ai toco ndorita morena reikta kambmo Raraŋ Aetaniacna lamnɨac ŋgoutta tɨkca mbopnandet. Te, Raraŋ Aetaniaca ma ndo ŋgoinna aina tɨpemb kirarira ritrinandet.
Iesusa tamuŋna auŋ ndeacrena taup ndamoot paŋan aniac, na ma kam ŋgamma leacatna
Iesusa ma aina taup ndamoot paŋan aniac
14 Ib 3.1, na 7.26, na 10.23Ainda moca aina taup ndamoot paŋan aniaca maeacreke, na ma tamuŋna auŋ inik ŋgoinna mbukrina. Na ma Iesus, ma Raraŋ Aetaniacna Nuoc. Ainda moca Iesusna rɨtɨpaca aia mboprenanmo aia utiŋ gagra. 15 2 Ko 5.21, na Ib 2.17, na 7.26, na 1 Pi 2.22, na 1 Io 3.5Na aia taup ndamoot paŋan aniacap, na ma lamŋirenan, aia ndorita tɨpemb ŋgorikta makukarmo, mo irikna gargar kocor. Aintik aia tɨp ŋgoreacna makukca momoca wetwet ŋgoin. Na ma aina moca kadmairina. Ainda moca memetmbaca totowaiara aimo larurenan, an toco manmo muruŋcamiŋ ndarurina, na mamo towairina. Na ma ndo ŋgoinna tɨp ŋgoreacna makuk ianna mba mori. 16 Epe 2.18, na 3.12, na Ib 10.19-22Aintik aia Raraŋ Aetaniacna mbibiracna outmo taŋi rambuŋaina mɨn, na aia kai nanambi teac. Na ma kadmairena ramoot. Ainda moca aia man ndambuŋa taŋ te, aia watnandet, ma aimo kakadmaina opotaca monandet. Na aia makukap te, mana kakadmaica aimo otacnandet.
4:3 Ŋap 95.11, na Ib 3.11, na 3.14
4:4 RL 2.2, na NA 20.11, na 31.17
4:5 Ŋap 95.11
4:7 Ŋap 95.7-8
4:8 TW 31.7, na Ios 22.4
4:12 Ais 49.2, na Ier 23.29, na In 12.48, na 1 Ko 14.24-25, na Epe 6.17, na KIEK 1.16, na 19.15
4:13 Iop 26.6, na Ŋap 33.13-14, na 90.8, na ML 15.11
4:14 Ib 3.1, na 7.26, na 10.23
4:15 2 Ko 5.21, na Ib 2.17, na 7.26, na 1 Pi 2.22, na 1 Io 3.5
4:16 Epe 2.18, na 3.12, na Ib 10.19-22