4
Kutukutu be poyapoya tamo tamo adi livalakaibala
(Madiu 13:1-23; Luke 8:4-15)
1 Aiyuwoina Yeisu ikaluvilamna ina Galili labutabutaina goi ivatowo ivatulúkwana. Ivaatulúkwana go, boda gagaina sitaligógana simamaima Tauyana yaina. Tauna itaoya iiwo ina oga tayamo idoidoiye goi isowoya, itusobu go, bodayadi liliudi labutabuta goi sikaaiyaka.† Mak 3:9; Luk 5:1-3. 2 Tauyana vatulúkwana badabadaidi ivatuulukoidi go, madabokina moe livalakaibala goi. Ina vatulukwanayana goi idigo kana,
3 ‘Ame konōve: Tobágula tayamo ina ina tánuwo goi witi kutukutuna isivagaegaedi. 4 Isivagaaegaedi, e maniyedi sisou enao goi. Tuwo mánuwo sisou sima sikanidi. 5 Ago kutukutuyadi maniyedi sisou manamanáiyala goi go, mainao sitabo unana poyapoya giyaina. 6 Tutayana níyala ituko, iidimoidi simémala unana lamdi sitetalamo. 7 Go kutukutuyadi maniyedi sisou taliboibo goi taiyao sitabo, sibíbina go, taliboiboyadi sididimatedi, tauna geya sikeuwoita. 8 Go kutukutuyadi maniyedi sisou poyapoya dedevina goi sitabo, sibíbina, sikéuwo gagaina. Kutukutu badabadaiidi! Niga dibayoya ana tuta maniyena teti (30), maniyena siksti (60), maniyena andedi (100).’
9 Tauyana kana,
‘Avatauwa komi neta ma taaiyami, e guna livala konoovedōko.’† Mad 11:15, 13:43; Mak 4:23, 7:16; Luk 14:35; Nuw 2:7,11,17,29, 3:6,13,22.
10 Tutayana Yeisu ina bóbwara isayata go, anetava ikaaiyaka, e ina tovakitaunayao be kidi yawou aiyuwoyadi taiyao sima Tauyana yaina goi ina livalakaibala manudi silumadádana. 11 Tauyana idigo kana,
‘Yaubada nanamsa bogina ivinimi bei itoboinemi ina nuwogau ina kalibúbuna manuna koyagoi. Go avatauwa neta nava Yaubada ina kalibúbuna goi geya sisiuta, e kaga liliuna livalakaibala goi sinovedimo, tauna geya siyagoiyeta. 12 Moe bego tokabivalavala tayamo ina livala imalatomota, kana,
“Sigitagita go,
geya sigitadokoneta.
Sitaiiyakeka go,
geya siyagoiyeta
govila bei situgavila,
e simekoigu
bei idi goyo ana nuwotao sibabane.” ’† Mak 8:18-19.
Aiseya 6:9-10
13 Tuwaina idigo kana,
‘Manakae? Guna livalakaibala ame geya koyagoiyeta ae? Gobe manakaemi bei livalakaibala liliudi koyagoidi? 14 Livalakaibalayana ana talígava ame nakae: Kutukutuyadi tobágula isivagaaegaedi moe nakae Yaubada ina livala. 15 E tomota maniyedi amo poyapoyayana enao goi nakae tutayana kutukutu sisou. Amoko goi tobágula livalayana isivagaegae. Tutayana livalayana sinove, mainao Kaleya ima livalayana boi tobágula iibaguli tomota yaidi goi, e ikabi inave. 16 Tomota maniyedi amo manamanaiyalayana nakae tutayana kutukutu sisou sitabo. Tutayana ame tauyadi Yaubada ina livala sinove, mainao madi uyáwana siuuyaone. 17 Livalayana siuuyaone go, nuwodi goi geya ikaseta nakae poyapoya kakaaraiina goi lam geya ikaseta. Tuwo tuta kaakupina tauna ikaaiyaka. E tutayana livalayana pasina mou be yogedageda sibabanedi, mainao sikapusi. 18 Tomota maniyedi amo poyapoyayana talibooibina nakae tutayana kutukutu sisou sitabo. Ame tauyadi Yaubada ina livala sinove go, 19 niga idi kaiyaka ana nuwokubukubu, esaesa ina tubanibani be nakae kónana adi yala atedi goi sisiu, e taliboibo nakae livalayana sididimate, tauna geya sikeuwoita. 20 Tomota maniyedi amo poyapoyayana dedevina nakae tutayana kutukutu sisou sitabo. Ame tauyadi Yaubada ina livala sinove, e siuyaone be nakae keuwoidi dedevidi sikeeuwoedi; maniyena teti (30), maniyena siksti (60), maniyena andedi (100).’
Rampa ana livalakaibala
(Luke 8:16-18)
21 Tuwaina Yeisu kana,
‘Manakae? Rampa niinimina takabi vada goi tasiuye bego bayao goi tavatum o baseko ogalaoina goi tavaisiu, gea geya? Geya, go sem rampa ana kaba yata yatana goi tayato ae?† Mad 5:15; Luk 11:33. 22 Moitamo. Moe nakae yau guna sinapu livalakaibala goi. Kaga nakona vamoounina livalakaibala goi bei avagitakoe. Kaga nakona nuuwogauna livalakaibala goi bei akaiwoduwe bego koyagoi. 23 Avatauwa komi neta ma taaiyami, e guna livala konoovedōko.’† Mad 11:15, 13:9,43; Mak 4:9, 7:16; Luk 8:8, 14:35; Nuw 2:7,11,17,29, 3:13,22.
24 E tuwaina Yeisu kana,
‘Korugwausīmi kaga konove yau yaigu bego kokabikaone. Nakonakae guna vatulúkwana konovedoko, e nakae Yaubada nanamsa tuwaina ivinimi go, nanamsayana bei ivaituwe yaimi. 25 Avatauwa neta guna livala sinoovedoko, nanamsa tuwaina Yaubada bei ivinidi. Ago avatauwa neta livalayana sinooveyamo, ava nanamsa ikaaiyaka tauyadi yaidi, Yaubada bei ikuliuye.’† Mad 13:12, 25:29; Luk 19:26.
Vévana ana livalakaibala
26 Tuwaina Yeisu kana,
‘Yaubada ina kalibúbuna tomota yaidi moe nakae vévana koroto ina tánuwo goi ibagulidi. 27 Sabamgo be maliyalina, ina masisi be ina taoya goi geya inuwonuwoneta vevanayadi manudi geya. Toinidi sitabotabo go, adi tabo be adi bíbina geya iyagoidita. 28 Poyapoya ilovina adi tabo be adi bíbina be adi kéuwo manudi. 29 E namliyeta keuwoina imatuwo, tobagulayana ivatowo bei idibayoya.’† Iyl 3:13.
Livalakaibala Yaubada ina kalibúbuna manuna:
Yaubada ina bodayauwo isáila
Yaubada ina bodayauwo isáila
(Madiu 13:31-35; Luke 13:18-19)
30 Tuwaina Yeisu kana,
‘Yaubada ina kalibúbuna sinaena goi ina bodayauwo adi vaituwo kaga goi bei akatutuko? Ava livalakaibala itoboine bei alivalakaibalae, e bei imavada yaimi? 31 Ana kaigigita alova tayamo kutukutuna giyaina toina nakae. Kutukutu liliudi poyapoya ame goi geya tayaamo alova kutukutuna giyaina nakae. 32 Go tutayana tabaguli, bei itabo ibíbina, e alova liliudi itabosavedi; nakae laonina gagaidi iyatoidi. Tauna laoninayadi goi mánuwo itoboinedi idi vátala siyowóidi.’
33 E livalakaibala badabadaidi amo nakae tutayana Yaubada ina kalibúbuna valena tomota ilatuuwokoidi. Go nakonakae tomota itoboinedi sinove, e nakae ilivalaakaibale. 34 Lava liliuna livalakaibala kaka goi boda ivatuulukoidi, go sem ina tovatotowanayao aditava yaidi livalakaibalayadi itaaligeidi.
Yeisu yágira be aivaya iloviinaedi tetelina
(Madiu 8:23-27; Luke 8:22-25)
35 E amo maliyalinayana goi asa bogina ikalavilavi go, Yeisu ina bóbwara ilukavave. Ilukavave, Tauyana oga goi ikaaiyaka ina tovatotowanayao ilatuwokoidi idigo kana,
‘Kōma kosowōya, Galili Bwaena tayaodamāne tāna ta dadava.’
36 Tuwo boda labutabuta goi sikalavedi go, oga goi sisowoya, sikailova oga maniyedi taiyao. 37 Sikailova sinonoina go, ulibomatu gagaina ikalisou Bwaeyana goi itowo. Tuwo aivaya siseulalágata, e ogayana bogina sivakayaaodei. 38 Kina go Yeisu oga valemli goi ikaaiyaka, dabana logédava goi iyato bogina ikanaamatáiya. Tuwo ina tovatotowanayao sima siwoini sidigo kadi,
‘Tovatulúkwana! Manakae? Geya kunuwonuwoneta bego tavailai?’
39 Tuwo itaoya yágira be aivaya ilovinaedi idigo kana,
‘Tuwo! Kudaūmwara!’
Tuwo yagirayana ilakapuwe nakae Bwaeyana ikadaúmwara gagaina. 40 Go ina tovatotowanayao ilatuwokoidi idigo kana,
‘Kaga komatoitae? Manakae? Nava geya konumisedokoiguta ae?’
41 Tauyadi simatoita gagaina go, taudiva sibobóbwara kadi,
‘Iyaa! Ame ava koroto? Yágira be aivaya niyana sikabiikaone?’
†4:9 Mad 11:15, 13:43; Mak 4:23, 7:16; Luk 14:35; Nuw 2:7,11,17,29, 3:6,13,22.
†4:23 Mad 11:15, 13:9,43; Mak 4:9, 7:16; Luk 8:8, 14:35; Nuw 2:7,11,17,29, 3:13,22.
†4:25 Mad 13:12, 25:29; Luk 19:26.
†4:29 Iyl 3:13.