Luda yã takada kↄ̃n Bokobaru yão 1 KƆRINTIDEENƆ 11

1 Àgↄ̃ ma yãkɛna dadaa, lán mɛɛ̀ Kirisi pↄ́ dada nà.

Nↄgbɛ̃nↄ pↄ́kuna ń mìa yã

2 Ma a sáabu kpà kɛ̀ ma yã ègↄ̃ dↄↄagu yã píngi guu, bensↄ̃ á kɛatokↄ̃nɛpↄ kɛ̀ má dàareenↄ kũna. 3 Má yezi àgↄ̃ dↄ̃ kɛ̀ Kirisi bé gↄ̃gbɛ̃ píngi mì ũ, gↄ̃gbɛ̃ bé nↄgbɛ̃ mì ũ, bensↄ̃ Luda bé Kirisi mì ũ. 4 Gↄ̃gbɛ̃ kɛ̀ èe adua kɛɛ ke èe annabikɛyã oo kↄ̃n pↄ́o kuna a mìa e a mì kpɛ bↄↄmɛ. 5 Nↄgbɛ̃ kɛ̀ èe adua kɛɛ ke èe annabikɛyã oo mìgbã e a mì kpɛ bↄↄmɛ, à dɛ lán à mì potoopo bàmɛ. 6 Tó nↄgbɛ̃ e pↄ́ kú a mìaro, à a mìkã kɛ̃ɛ. Zaakɛ mìkãkɛ̃ɛna ke mìbona dɛ nↄgbɛ̃nɛ wíyã ũ, à pↄ́ kú a mìa. 7 Èe kↄ̃ sío gↄ̃gbɛ̃ pↄ́ kú a mìaro, kɛ̀ à dɛ Luda taka kↄ̃n à gakuio ũ yãnzi. Nↄgbɛ̃ sↄ̃ bé gↄ̃gbɛ̃ gakui ũ. 8 Zaakɛ Luda e gↄ̃gbɛ̃ bↄ nↄgbɛ̃ guuro, nↄgbɛ̃n à bↄ̀ gↄ̃gbɛ̃ guu. 9 Èe gↄ̃gbɛ̃ kɛ nↄgbɛ̃ yãnziro, nↄgbɛ̃n à kɛ̀ gↄ̃gbɛ̃ yãnzi. 10 Beee yãnzi kↄ̃n malaikanↄ yão dↄ, séde nↄgbɛ̃ gae pↄ́ kú a mìa a zã iko sèeda ũ. 11 Dii guu nↄgbɛ̃ kuu a zĩndanɛ gↄ̃gbɛ̃ sairo, gↄ̃gbɛ̃ sↄ̃ kuu a zĩndanɛ nↄgbɛ̃ sairo. 12 Zaakɛ lán nↄgbɛ̃ bↄ̀ gↄ̃gbɛ̃ guu nà, lɛn dↄ gↄ̃gbɛ̃ è bↄ nↄgbɛ̃ guu lɛ, bensↄ̃ pↄ́ píngi è bↄ Luda kiiamɛ.

13 À yã pì laasuu lɛ́ à gwa. Nↄgbɛ̃ aduakɛna mìgbã maaↄ́? 14 Á dↄ̃ a zĩndanɛ kɛ̀ mìkã gbã̀a dɛ gↄ̃gbɛ̃nɛ wíyã ũroo? 15 Mↄde tó nↄgbɛ̃ vĩ, à dɛnɛ gakui ũmɛ, zaakɛ Luda nↄgbɛ̃ gbà mìkã à kúalamɛ. 16 Tó gbɛ̃ke yezi à lɛokpakↄ̃a kɛ, àgↄ̃ dↄ̃ kɛ̀ wapinↄ kↄ̃n Luda sↄsinↄ, wá yã pãnde kũnaro, sé beee.

Dii pↄ́blee

(Mat 26:26-29, Maa 14:22-25, Luk 22:14-20)

17 Yã kɛ̀ má yezi mà daare tiaa guu, mɛ́ a sáabu kpáro, zaakɛ a kakↄ̃ana è zaaa iare dɛ à maaala. 18 Káaku gĩa má mà, tó a kↄ̃ kàkↄ̃a, eè bↄ kↄ̃ kpɛɛ gãli kↄ̃n gãliomɛ. Ma yã pì sì kpado. 19 Séde kɛ̃kɛ̃kↄ̃ana gↄ̃ kú a tɛ́, lɛ wà yãpuradeenↄ dↄ̃ a tɛ́. 20 Tó a kↄ̃ kàkↄ̃a, èe kɛ Dii pↄ́bleen eè blero, 21 zaakɛ a baade è wã a pↄ́bleezimɛ. Nↄaa è gbɛ̃kenↄ dɛ, wɛ̃ɛ è gbɛ̃kenↄ dɛ. 22 Á bɛɛ vĩ à pↄ́ ble, à í minloo? Ke eè kya ká Luda sↄsin à wí da pↄ́saideenↄamɛ? Mɛ́ oare diamɛ? Mɛ́ a sáabu kpán yↄ́? Kài! Mɛ́ a sáabu kpá yã beee musuro.

23 Yã kɛ̀ má sì Dii kiia, má dàareen yɛ̀: Zĩ kɛ̀ wà Dii Yesu kpàḿma, à gwãavĩ pìa à burɛdi sɛ̀, 24 ben à aubarika dàn à lìlikↄ̃rɛ, ben à bè, a mɛ̀ kɛ̀ à kpà a yãnzin yɛ̀, àgaegↄ̃ beee kɛɛ a yã dↄnaagu yãnzi. 25 Lɛmɛ dↄ kɛ̀ aↄ̃ pↄ́ blè wà yã̀a, à togoo sɛ̀ à bè, Luda bà kuuna kↄ̃n gbɛ̃nↄ dufu a aru gãzĩn yɛ̀. Tó ée mii, àgaegↄ̃ mii à yã dↄnaagu yãnzi. 26 Zaakɛ tó a burɛdi pì sò, tó a í pì mì, ée Dii gaa baaru kpaa ai àgↄ̃ gá mↄ́mɛ.

27 Beee yãnzi tó gbɛ̃ burɛdi pì sò, tó à Dii í pì mì, burɛdi kↄ̃n í pìo yãdasai, à taari kɛ̀ Diinɛ à mɛ̀ kↄ̃n à aruo yã musumɛ. 28 Baade a zĩnda yã gwa, gbasa à burɛdi pì só, à í pì mi, 29 zaakɛ tó gbɛ̃ sò, tó à mì Dii mɛ̀ gbádↄ̃sai, à yã dà a zĩndalamɛ. 30 Beee yãnzi gyãreenↄ kↄ̃n aafiasaideenↄↄ pari a tɛ́zi, bensↄ̃ gbɛ̃ kɛ̀ aↄ̃ kɛ̀ sainↄↄ kɛ̃sãnaro. 31 Tó wé wa zĩnda yã gwa, Dii é wa taari ero. 32 Tó à wa taari è, èe wa totoomɛ, lɛ yã tón vɛ̃ɛwa kↄ̃n andunaoro yãnzi. 33 Beee yãnzi ma gbɛ̃nↄ, tó a kↄ̃ kàkↄ̃a, ée Dii pↄ́ blee, àgae kↄ̃ dã. 34 Tó nↄaa e gbɛ̃ dɛɛ, à pↄ́ ble a bɛ, lɛ a kakↄ̃ana tón yã iarero yãnzi. Mɛ́ yã kɛ̀ gↄ̃̀nↄ bↄkↄ̃tɛare, tó ma mↄ.