Luda yã takada kↄ̃n Bokobaru yão 1 KƆRINTIDEENƆ 10

Làakarikɛna tãagbãgbãnazi

1 Ma gbɛ̃nↄ, má yezi wa dezinↄ yã kɛ̀kii dↄagu. Aↄ̃ tɛ̀ tɛ́luguuzi ń píngi, aↄ̃ táa ò wà bↄ̀ɛ Isia Tɛ̃aan ń píngi. 2 Luda ń batisi kɛ̀ tɛ́luguu pì guu kↄ̃n ísiaa pìo ń píngi Musa ìbanↄ ũ. 3 Aↄ̃ Luda pↄ́ble dↄ̃nkↄ̃ blè ń píngi, 4 aↄ̃ Luda í dↄ̃nkↄ̃ mì ń píngi, zaakɛ aↄ̃ Luda kpiii kɛ̀ kúńyo í mì. Kpiii pì sↄ̃ bé Kirisi ũ. 5 Baa kↄ̃n beeeo aↄ̃ paridee yã e ká Ludanɛro, ben aↄ̃ gɛ̀ gↄ̃̀ kpáɛ gbáan. 6 Yã pì dɛwe sèeda ũ, lɛ wàton yã zaaa ni dɛ, lán aↄ̃ à ni dɛ̀ nàro. 7 Àtongↄ̃ dɛ tãagbãgbãrinↄ ũ lán aↄ̃ gbɛ̃kenↄ bàro. À kɛ̃na Luda yãn wà bè: Gbɛ̃nↄ vɛ̃̀ɛ wèe pↄ́ blee, wèe í mii, ben aↄ̃ fɛ̀ɛ wèe pãpãa kɛɛ. 8 Wàtongↄ̃ dɛ pãpãkɛrinↄ ũ lán aↄ̃ gbɛ̃kenↄ bàro. Aↄ̃ pãpãa kɛ̀, ben aↄ̃ gàga gurↄ dↄ̃nkↄ̃ zĩ gↄ̃ↄn bↄrↄ baro awɛɛ'aagↄ̃. 9 Wàton Dii yↄ̃ wà gwa lán aↄ̃ gbɛ̃kenↄ bàro. Aↄ̃ à yↄ̃̀ wà gwà, ben mlɛ̃̀nↄ ń sóso aↄ̃ gàga. 10 Àton wisↄ̃ↄ ká lán aↄ̃ gbɛ̃kenↄ bàro. Aↄ̃ wisↄ̃ↄ kà, ben ga malaika ń dɛ́dɛ.

11 Yã pì ń lé sèeda ũ wamↄwa kɛ̀ wá kú gurↄ zãannↄnɛ, ben wà kɛ̃̀ takadan lɛ wà wa gbao làakari yãnzi. 12 Gbɛ̃ kɛ̀ èe daa á zɛna gbãa, à làakari kɛ lɛɛnazi. 13 Yↄ̃agwana kee e a lero, séde kɛ̀ è baade píngi lee baasiro. Luda náanɛ vĩ, eé tó wà a yↄ̃ wà gwa dɛ a gbãa lɛ́laro. Yↄ̃agwana guu eé a gba zɛ́ à mɛna fↄ̃ à bↄn.

14 Beee yãnzi ma gbɛ̃ yenzideenↄ, à mì kɛ̃ tãagbãgbãnaa. 15 Mɛ́ɛ yã ooare làakarideenↄ ũ. À yã kɛ̀ mɛ́ɛ ooaree laasuu lɛ́ a zĩnda à gwa. 16 Togo aubarikadee kɛ̀ weè sáabu kpáo, tó wá mì, wa bà kú Kirisi aruoroo? Burɛdi kɛ̀ weè lílikↄ̃rɛ, tó wá sò, wa bà kú Kirisi mɛ̀oroo? 17 Zaakɛ burɛdi kↄ̃̀ↄ domɛ, baa kↄ̃n wa parikɛɛo wa mɛ̀ dↄ̃nkↄ̃mɛ, wa baade a baka vĩ kↄ̃̀ↄ dↄ̃nkↄ̃ pì guumɛ. 18 À gwa Isarailinↄa. Gbɛ̃ kɛ̀ sa'opↄ blè bà kú kↄ̃n Luda gbãgbãkiioroo? 19 Ma bè diamɛ? Mɛ́ɛ bee tãa sa'opↄblee nɛ́ pↄ́ken yↄ́? Ke aↄ̃ tãanↄ nɛ́ pↄ́kemɛ? 20 Lɛnlo, ma bè pↄ́ kɛ̀ wà saa òo, wà ò tãaamɛ, èe kɛ Ludaanlo. Má yezi a bà gↄ̃ kú kↄ̃n tãaoro. 21 É fↄ̃ à Dii togo í mi kↄ̃n tãa pↄ́oro. É fↄ̃ à Dii pↄ́ ble kↄ̃n tãa pↄ́oro. 22 Ke wá yezi wà Dii nↄ̀sɛgↄ̃aanↄ fɛɛmɛ? Wa gbãaa kà à ũn yↄ́?

23 Eè be, yã píngi zɛ́ vĩ. Lɛmɛ, mↄde yã píngi àre vĩro. Eè be, yã píngi zɛ́ vĩ. Lɛmɛ, mↄde yã píngi kaarana vĩro. 24 Gbɛ̃ke zĩnda yã tón dↄnɛ aɛro, sé à gbɛ̃daaa yã. 25 À nↄ̀bↄ kɛ̀ wèe yaa yàran só yãke gbekana sai a laasuu yãnzi, 26 zaakɛ tↄↄtɛ kↄ̃n pↄ́ kɛ̀ kúnnↄ píngi nɛ́ Dii pↄ́mɛ. 27 Tó Yesusaidee a sisi pↄ́bleea, tó à kɛ̀are, tó a gaa, à pↄ́ kɛ̀ wà kpàawaa ble yãke gbekana sai a laasuu yãnzi. 28 Tó wà gà wà bèare sa'opↄbleemɛ, àton blero laasuu yãnzi kↄ̃n gbɛ̃ kɛ̀ òare yãnzio. 29 Mɛ́ɛ beee oo adee laasuu yãnzimɛ, èe kɛ a pↄ́nlo.

Gbɛ̃ pãnde laasuu yãnzin mɛ́gↄ̃ ma zĩnda vĩziroↄ́? 30 Tó ma pↄ́ blè kↄ̃n sáabukɛnao, bↄ́yãnzin wè ma zaa bo pↄ́ kɛ̀ ma sáabu kɛ̀zi pì yã musuu? 31 Yã kɛ̀ ée kɛɛ píngi, ée pↄ́ bleen yoo, ée í miin yoo, àgↄ̃ à píngi kɛɛ Luda tↄ́bↄna yãnzi. 32 Àton tó Yudanↄ ke Girikinↄ ke Luda sↄsi gbɛ̃nↄ fu a yãkɛna yãnziro. 33 Lɛn mɛɛ̀ kɛ lɛ. Yã píngi guu mɛɛ̀ aĩa kɛ, lɛ ma yã ká baade pínginɛmɛ. Mɛɛ̀ ma zĩnda pↄnnaa wɛtɛro, sé parii pↄ́, lɛ aↄ̃ e wà bↄ yãnzi.