1 โอ พะจาว, ปัว ปะ เรอึม แตะ นึง เอีจ ไฆร โอยจ โม ป ฆวต ไอฮ เนอึม จีวิต พะจาว. โม ป เนอึม รพาวม ลลาึง ปุย ปลัฮเตะ เฮี เญือะ ไก โตว. 2 ปุย เตือง โอยจ อื อัฮ ตื ลปุง โอ เนอึม ละ ปุ แตะ. ดักดอย อื เคียต ซาวป อวต ลื ปุย ละ ซ จุ แตะ ปุย ไลจ, เนอึม โตว รพาวม ละ ปุย.

3 มวยญ ป ซาวป อวต ลื ปุย ไม่ ดักดอย ป อวต ติ แตะ ระ ตอก เซ, ปัว พะจาว เกือฮ อื อาวต โฆย. 4 มัฮ อัฮ ฮะ ไม่ โม ป อัฮ ตอก เฮี, “เอะ แจง ซ เป เยอะ เบือ ดัก แตะ เฮี, เอีจ มัฮ ดัก ป ยุง ลปุง ป เกียฮ, มัฮ ปุย บุย ป ซ ระ แม ฮา เอะ เอ?” อัฮ อื ตอก เซ โม เซ เยอ.

5  พะจาว อัฮ อื ฆาื อื ตอก เฮี, “อาึ ซ โกฮ ละ ปเลี่ย เฮี เอิน, โม ป ตุก ป ญัก ป รักเริ นึง โคมเฮง ปุย แตะ เซ, อาึ ซ เรอึม เมอะ. อาึ ซ เกือฮ โฮลฮ อาวต นา ก ชุมเย่น เฮน ฮลอง อื, เอีจ มัฮ นา ก รไม่จ อื โฮว อาวต นึง เซ,” อัฮ เซ.

6 ลปุง พะจาว มัฮ ป ซง่ะ ซงอม เนอึม. ซง่ะ มาื ป เอีจ โล ปุย นึง เบิ่ง อาแลฮ โฮน ตอก ออฮ, ลปุง พะจาว ซง่ะ ซงอม โรฮ ตอก เซ.

7-8 โอ พะจาว, ปุย ฆอก ปุย เบร โฮว ไร ลอป รวิต รเวียง เอะ, ปุย ปลัฮเตะ เฮี อวต ลื กัน ฆอก กัน เบร. ปัว ปะ เฆีญ เอะ, ไม่ เรอึม เปอะ เกือฮ เอะ โปน ฮา ปุย ตอก เซ.