1 ฟวยจ เซ โยป โลยฮ อื ตอก เฮี, 2 “เฮฮ เฮฮ, อาึ ฆวต เกือฮ แลน ปุย แฆ รพาวม ตุก แตะ เฮี, ไม่ อาึง อื แลน เม่ะมั่ก อาวม เมอะ เฮี นึง ไง่ แฆ. 3 รพาวม ตุก อาึ เฮี เชียน ลอน เอิน ฮา ไฮมจ นึง เกาะ เอิน. มัฮ เซ ป โคะ อัฮ อาึ ลปุง โฮฮ โปน ฆาื อื. 4 ตี ทนู ยุฮ พะจาว ป ระ อัมนัต เซ เอีจ ลอก อาึ. รอาวม เยื่อ ปิต นึง อื เซ เอีจ เลียก ฮอยจ กไน เยอะ. พะจาว เอีจ เกือฮ ป ฮลัต อาึ นึง ฮอยจ แวต เตอะ ตอก โม ตฮัน โฮ. 5 บรัง พริ ดัฮ เอีจ โฮลฮ โซม ไรป ซงา จัว อัม ซ แบรฮ ลั่ง? โมวก เญือม เอีจ ชุง อื เปือม ไรป กอง ปุย ละ แตะ อัม ซ โบฮ ลั่ง? 6 ดัฮ ซ ปอน โตะฮงา งา, ดัฮ โอ ดุฮ กิฮ นึง อัม ไก ป ปุน ปอน เนอ? ดัฮ ปอน ตอม ดัฮ โอ ปอน ไม่ ซโมง อื อัม ซ โลฮ? 7 โอเอีฮ ตอก เซ อาึ แจง โอ เกียฮ ปอน เนอ, นึง มัฮ อื ป โซม ป ปอน เอีจ เตือ เอีจ ออป อาึ นึง.

8 “เฮฮ, เฮฮ, อาึ ฆวต เกือฮ เนอึม ติ แตะ โฮลฮ ตัม ป ปัว แตะ, ปัว เนอึม พะจาว เกือฮ ละ แตะ ตัม ป รไม่จ เจอะ โฮลฮ เซ. 9 อาึ ฆวต เกือฮ พะจาว ลอต ยุฮ ไลจ ไม่ โกะ โอะ เฮี, ฆวต เกือฮ เอิน ยุฮ แปฮ ยุม ไม่ เยอะ นึง อัมนัต ระ แตะ. 10 มัฮ ยุฮ อื เนิ ตอก เซ, โฮลฮ เดียก รพาวม บาึง แตะ นึง. ปัง ตึก นึง โซะ ป อาวม แตะ ญุ่ก อาึ ซ ฟวยจ ลั่ง พาวม นึง, อาึ อื ไก โตว เญือม เลฮ เตียง ป อัฮ พะจาว ป ซง่ะ ซงอม เซ ละ แตะ ติ ชวง เนอึม.

11 “อาึ เญือะ ไก โตว เรียง ปอ ปุน โอต แตะ โอเอีฮ ละ ซ เกือฮ ติ แตะ ลั่ง ไอม. มัฮ เมอ ป ซโอว รพาวม อาึ ไม่ อื ป ไอม อาึ คา ติ แตะ ละ อื ตอก เฮี เยอ? 12 โกะ อาึ อัม มัฮ ซโมะ ป โอ เกียฮ อาวม ป โซะ? เนะซอัง อาึ อัม มัฮ ไร ซเงี? 13 ป เนอึม นึง อื อาึ ไก โตว ตอก เกียฮ เรอึม ไอฮ โกะ แตะ เญี่ยะ เนอึม, อาึ เอีจ ลอยจ เนอึม กัมกึต เตอะ.

14 “เมาะ ป โอ ไก รพาวม เลียก พาวม นึง ปุโฮมว แตะ, เอีจ มัฮ ปุย โอ ไก รพาวม ฮลัต นึง พะจาว, ป ตึก นึง ระ อัมนัต แตะ เซ. 15-16 โม ปุโฮมว อาึ ปังเมอ โอ เนอึม รพาวม ละ อาึ, มัฮ ตอก อื โกลง ป ปัตๆ โยะๆ โฮ. เญือม ลวยจ นัมแคง ไม่ ฮิมะ นึง เดือะ อื, โกลง เซ ซโกว เอิน รอาวม นึง ปอ ลอง แตะ ฆาื อื. ระ พราวป เอิน ปอ วิฮ ฮอง อาวต แตะ. 17 เญือม เอีจ กอยจ โอเอีฮ ละ อื รอาวม เซ ปังเมอ เน่ฮ แนฮ ปุ ปุ, เญือม เอีจ มัฮ อื เมือ ฮรวน เนอ รอาวม เซ ไฮจ ซออฮ เอิน. 18 โม ป โฮว ดิ นึง คระ โกลง เซ โฮว ซาวป ญุ รอาวม ปอ ไฆร แตะ ฮา คระ. โฮว ไป โฮว มา นึง ลาึน ซออฮ เซ, ลอต เอิน ยุม ฆาื อื. 19 โม ป โฮว ดิ นึง คระ ย่วง เทมา ซาวป รอาวม, โม ป โฮว นึง คระ เมือง เชบ่า รกวน แนฮ ยุ อื. 20 เญือม เอีจ ฮอยจ อื โบ โกลง ซออฮ เซ, ปุย โม เซ ตัง โคน ตัง เงอึต นึง โอ แตะ โฮลฮ โอเอีฮ ตอก รไม่จ แตะ โฮลฮ. ไลจ เอิน รพาวม ฆาื อื. 21 ปเลี่ย เฮี โม เปะ ตอก โรฮ เปอะ โกลง เซ ละ ยุ อาึ อื. เมือต เปอะ เอีจ ฮอยจ ยุ เม่ะมั่ก ซักคระ อาวม อาึ เฮี, โม เปะ เกือฮ เอิน เปอะ ติ แตะ ฮลัต เตีจ โตวฮ ฆราึง ฆาื. 22 อาึ อัม ไก เญือม ปัว โม เปะ เกือฮ คาวคอง ยุฮ เปอะ เนิ อี? อัม ปัว โม เปะ นุน ปุย ไฮญ รโตง โกะ แตะ? 23 อาึ อัม ปัว โม เปะ เรอึม แตะ เกือฮ โปน ฮา โม ป เกละยุ แตะ? อัม เอีจ ปัว โม เปะ โตฮ แตะ เกือฮ โปน ฮา ปุยไฮะ ปุยฮอน?

24 “เพอึก แลน โม เปะ อาึ เฮี เมอะ, อาึ ซ อาวต โฆย ละ ซ ง่อต แตะ. ปัว เปอะ เกือฮ อาึ ยุง, มัฮ เมอ ป พิต ยุฮ อาึ อื? 25 ลปุง ปุก ลอก ลปุง ซืไซ ไก เนอึม อัมนัต. ลปุง เก โม เปะ อาึ ปังเมอ โอ เกียฮ ไก ลักทัน แจง แน. 26 โม เปะ อัม แกต เปอะ ติ แตะ ปุน กัฮ ลปุง อาึ อื? เมือต แลน โม เปะ เมีญ เปอะ ลปุง ปุย ตึก นึง เม่ะมั่ก แตะ เฮี มัฮ เยือ ตอก กาื โฮ. 27 โม เปะ เอีจ เมาะ เอิน เปอะ ป โจก เบ่อ นึง กวนดอย ละ ซ เกือฮ เปอะ แปน ครา แตะ. เมาะ โรฮ เปอะ ป โชะ ปุโฮมว ซดิ แตะ ละ เกือฮ เปอะ แปน นัม กา ยุฮ แตะ. 28 ปเลี่ย เฮี, แลน ที แลน นา อาึ เฮี, เดอึม เปอะ ซ ยุ มัฮ อาึ เฮี ปุย โอ อัฮ ลปุง จุ ไล. 29 ปัว เปอะ เฌาะ ง่อต โคระ แม เญี่ยะ เมิฮ. ปุ เญือะ ญวต อาึ พิต นึง, ปุ เญาะ เติ อาึ อื, อาึ เอีจ แจง นึง โอ แตะ พิต นึง กัน เฮี เยอ. 30 อัม มัฮ โคะ เปอะ อาึ อัฮ ป โอ เนอึม, อัม มัฮ โคะ เปอะ อาึ โอ ยุง ป พิต ไม่ ป ปุก เกอ?” อัฮ เซ โยป เปอ.