1 ฟวยจ เซ เอลีฟัต อัฮ แม อื ละ โยป ตอก เฮี, “โยป, กอก แลน ปเลี่ย เฮี เมอะ, มัฮ ปุย ป ซ โลยฮ ละ เปอะ? ปะ ซ โฮว ซาวป เปอะ ยุ เตปด่า เมอ นึง อื. 2 ปุย ดัฮ ง่อต ลอน รพาวม ตุก แตะ มัฮ ปุย งาว ปอ ยุม แตะ. ป เกือฮ ติ แตะ กุยจ วัว รพาวม นึง ป เกิต ละ แตะ, มัฮ โรฮ ปุย ลโมวะ ปอ ไลจ ไฆร แตะ. 3 อาึ กอ ยุ ปุย งาว ป ซ ริ จเลิน ยุฮ แตะ, เญือะ เซ ปังเมอ ไลจ โลม พราวป นึง ลอก อื รซอม ซะ ฆอก. 4 โม กวน เฌือต อื โฮลฮ โตว อาวต ไมจ อาวต มวน. เญือม ฟอง ปุย อื นึง ซัน เนอ ไก โตว ป เรอึม เกือฮ โปน ตุต แตะ. 5 เปลิ ป ซมา ลโลวง อื นึง ชิจ ยุฮ แตะ เซ, โม ป ฮิว นึง ฆวต โซม แตะ เอีจ โซม อื ฮา อื ปอ โอยจ อื. ปัง มัฮ ป เอีจ ฆรุง โวง โน่ง อื ไม่ เตือ อื นึง กัต, เอีจ ซาวป ตื โรฮ ปุย ตุย ฮา อื เตือง โอยจ อื โรฮ. โม ป ฆวต ไอฮ ลอน โอเอีฮ, ซาวป ง่อต ตอก ซ โฮลฮ แตะ คาวคอง อื. 6 กัน ตุก เปละ นัน พาวม ปุย มัฮ โตว ป ฮอยจ เน่อึม นึง เตะ รกาื. เม่ะมั่ก ซักคระ ปุย ปุ โรฮ มัฮ ป เกิต เน่อึม ฆรึม เตะ. 7 รปอฮ งอ แจง ปอย ฮาวก ฮอยจ ก ฮลาวง อื ตอก ออฮ, ปุย ปลัฮเตะ แจง โรฮ มัฮ เกิต อื ละ อาวม แตะ เม่ะมั่ก ตอก เซ โรฮ. 8 มัฮ มัฮ อื อาึ เฮี, อาึ ซ ซาวป ยุ พะจาว. ไลลวง ป เกิต เนิ อี, อาึ ซ มอป โรฮ ละ พะจาว โครยญ เจือ, 9 นึง มัฮ อื ป เกียฮ ยุฮ กัน ระ เนอึม โฮฮ ฮา เกียฮ คาวไจ เอะ อื, ไม่ เกียฮ ยุฮ อื ป ซัมคัน ปอ โอ เยอะ เญาะ โอยจ เมีญ. 10 พะจาว เอีจ เกือฮ รอาวม เฮละ ฮอยจ นึง ปลัฮเตะ ไม่ เกือฮ อื รอาวม เฮละ เซ ฮอยจ นึง ชิจ นึง ม่า. 11 พะจาว เอีจ เกือฮ ปุย ตุ ปุย เตียม โฮลฮ แปน ป ระ ป คาว, เอีจ เกือฮ โรฮ โม ป ไลจ รพาวม โฮลฮ แม รพาวม ไมจ มวน แตะ. 12 พะจาว เอีจ คัตคัง โรฮ กัน ยุฮ โม ป เฮียง บ่วก ละ ซ เกือฮ อื กัน ยุฮ อื เซ โอ แปน ป ฟวยจ. 13 ป คิต ป ง่อต โม ป เฮียง บ่วก เซ, พะจาว เกียฮ เกือฮ อื แปน ตอก แฮวะ ซราว เคริ โกะ อื ไอฮ, โอเอีฮ ป ตะ โม ป ไมจ พันญา ยุฮ เซ เกียฮ เกือฮ โรฮ อื แปน ป โอ ไก ป มัฮ. 14 ปุย ตอก เซ ปัง มัฮ เมือ ซเง่ะ อื ซ เฟียก ละ อื ตอก เมือ ก ซาวม อื โฮ. ปัง มัฮ เมือ ง่อน ซเงะ ซ ซาวป บู่เบื่อ โอเอีฮ ตอก เมือ ง่อน ซาวม โฮ. 15 โม ป โอ ไก ตัว เปิง เงอ, พะจาว ปังเมอ เกือฮ อื โปน ฮา ยุม แตะ. เกือฮ โรฮ โม ป วิต โซม ม่วยญ จัน โปน ฮา อัมนัต ป โคมเฮง อื. 16 มัฮ เซ ป ไก ลั่ก ซโอว รพาวม โม ป ตุก ป ญัก ฆาื อื, กัน โอ ซื โอ ไซ ยุฮ ปุย เยอ, แปน โรฮ ควน โอ โกะ อื เกียฮ อัฮ โอเอีฮ ฆาื อื.

17 “ปุย เมาะ ป โฮลฮ พะจาว เพอึก เฟียต เตอ, เอีจ โฮลฮ รพาวม ไมจ มวน แตะ เบือ อื. มัฮ เซ ป โอ ไมจ พามัต กัน เพอึก เฟียต พะจาว ป ตึก นึง ระ อัมนัต แตะ เซ ฆาื อื. 18 เญือม เกือฮ อื เอะ ไก เบราะ เบิ อี, พะจาว เพาะ โรฮ อื เนิ. พะจาว ปัง ปุฮ เฟียต เอะ เกียฮ เยื่อ แม อื ละ เอะ. 19 พะจาว ซ เรอึม เลาะ ลาึน ปะ เกือฮ โปน ฮา เม่ะมั่ก แตะ ติ โฮน ติ โฮน แม. ปไฮะ ปฮอน เญาะ ซ ลอก โตว ปะ ติ เจือ เนอึม. 20 เญือม เกิต ไปลญ อาวป เออึป กิฮ พะจาว ซ เกือฮ ลั่ง ปะ ไอม. เญือม รุป ปุย ปุ แตะ พะจาว ซ เกือฮ ปะ โปน ฮา ยุม แตะ. 21 พะจาว ซ เฆีญ ปะ เกือฮ โปน ฮา โม ป อัฮ ลปุง กอยจ ราวม ละ เปอะ. เญือม ฮอยจ ป โตะ ป ตอง, ปะ เญาะ ซ โฮลฮ เปอะ โตว ฮลัต นึง. 22 เญือม ฮอยจ ป โตะ ป ตอง ไม่ ไปลญ อาวป เออึป กิฮ เซ, ปะ ซ โฮลฮ ลั่ง เปอะ ญวยฮ ดา ไมจ มวน. ปะ เญาะ ซ โฮลฮ เปอะ โตว ฮลัต นึง โกะพริ ไฮะฮอน. 23 เญือม ยุฮ เปอะ ชิจ เญาะ ซ ไก โตว ซโมะ แจ นึง ละ เปอะ. โกะพริ อาวต เพระด่าวก ปุ โรฮ เญาะ ซ โฮลฮ ยุฮ ป โซะ ละ เปอะ. 24 ปะ ซ โฮลฮ เปอะ อาวต เฮน อาวต ฮลอง นึง พากัง ยุฮ แตะ เซ. เญือม แลน เปอะ คอง เลียง แตะ ซ วิต โตว ฮา ไพรม แตะ ติ เนอึม. 25 โม จัตเจือ เปอะ ซ โฮวน เนอึม, โม กวน เฌือต เปอะ ซ พรุฮแพร ตอก ไรป ป กวยฮ นึง ปลัฮเตะ โฮ. 26 ปะ ซ ฟวยจ กัน ยุฮ เปอะ เญือม เอีจ กวต เนอึม แตะ, ตอก โรฮ มัก ปุย เฮงาะ เญือม เอีจ เคราะ ไมจ อื โฮ. 27 เมาะ ป เอีจ อัฮ อาึ ละ เปอะ เซ เอีจ มัฮ ป ซาวป เอะ คิต ง่อต แลน โตะ รพาวม แตะ, แจง มัฮ อื ป เนอึม. ไมจ เปอะ ง่อต ที ไม่ เกือฮ เปอะ ติ แตะ ยุง, ละ ซ ไก เนอึม ป มัฮ อื ละ เปอะ,” อัฮ เซ ละ โยป เอลีฟัต เตอ.