15
Amulamun Iesu va en kot onen asuv Paelet keke hesan matien mini✡ Mat 27:1-2,11-26; Luk 23:1-25; Sion 18:28-40
1 En visokon semau, asuv keil onen pris keil, elda keil ten out Serusalem, ka tiser keil ten mengkatien onen Mosis ral meatin sav keil emun alah ruai en Kaonsel onen Siu keil. Aselus rahit usite onen Iesu ka umai en rendemien tas keke hemat. Sakini, apar kati ka amulamuni va min Asuv Paelet keke avamae lati mini.* Asuv Paelet vi meatin ten kavmen koa mul losil kat out Itumea, Sameria, ka Sudea koa mari meteimal Serusalem mul ien.✡ Luk 22:66; Mat 16:21; 27:41; Mak 8:31; 11:27; 14:43,53; Luk 9:22; 20:1
2 Paelet vis Iesu vit, “?Keik, kovi asuv houlu onen Siu keil?”
Iesu vit kesi vit, “Suval koa koviteni.”
3 Ka asuv keil onen pris keil amumon selusien houlu va kat Iesu. 4 Ka evus, Paelet viteni min Iesu vit, “?Kirviten etai tounah? ?Korlongtei tisaen keil houlu koa aviteni avit komumoni?”✡ Aes 53:7; Mak 14:60-61; Luk 23:9 5 Ka Iesu vati raeng eni mules. Ka Paelet mutimanin veni Iesu roviten etai mun selusien.
6 Vi sakien matu onen Asuv Paelet keke en avong ten Anien ten Mul Laui, hemae lat meatin tai koa meatin keil e vati va sital ran eim takeih. 7 (Ka en avong enek, lariken tai mul en eim takeih, isen Barabas. Avuli kati ral min lariken teisav keil veni amu vini meatin en rea tai veni avuroh kat kavmen.) 8 Sakini, meatin keil umai avis Paelet avit vamae lat meatin tai vamaluv vaha ran eim takeih musil sakien matu onen.
9 Ka Paelet vis keil vit, “?Emi vati mamae lat asuv houlu onen Siu keil vamaluv vaha?” 10 Kei visi mukonek ven lei kilea tuai keke asuv keil onen pris keil akur Iesu vaha mini veni amul avi elu eni.
11 Ka tei en asuv keil onen pris keil aling kati tuai keke avaleh rendemien onen vangi meatin keil keke avahis Paelet hemae lat Barabas vamaluv vaha.✡ Umen 3:14
12 Sakini, Paelet vis ris keil vit, “?Emi vati numon sa en meatin koa mivit vi asuv houlu onen Siu keil?”✡ Umen 3:13; 13:28
13 Keil aviso vina mini avit, “!Ti kati en aiveave!”
14 Ka Paelet vis keil vit, “?Kei mumon sa koa tisa?”
Ka keil aviso keih eris avit, “!Ti kati en aiveave!”
15 Sakini, Paelet mae lat Barabas min keil veni en rovattei vapurun rendemien one. Ka viteni min meatin keil tavaeen keke ilamun Iesu iha, itahi en viau koa sineite mul, ka iti kati en aiveave.
Meatin tavaeen keil amumon tohtohien en Iesu✡ Mat 27:27-31; Sion 19:2-3
16 Navong amutah Iesu evus, meatin tavaeen keil amulamuni va en teahu ten mari eim one, ka avise ruai en meatin tavaeen keil vasi umai out tas. 17 Keil amul amumon tohtohien eni. Akav koe en kaliko tai koa vilhili suval asuv houlu tai, ka amumon vatluvoluv en viau koa sin mul ien,† Suval sin tomah. ka aling kati en vatin.✡ Luk 23:11 18 Evus, aviso avit, “Mevouhou minuk, asuv houlu onen Siu keil.” 19 Evus, amutiv kati ka amuasi en vatin ral min ai tai. Tai, evus, tamun. Ka aretengeiril mini ka amul arohtoh uva netan mini.
20 Navong meatin keil tavaeen arohtoh mini evus, akulat ris kaliko onen asuv houlu rani, ka amusin risi en eisin kati omon. Evus, amulamuni avina keke avati kati en aiveave.
Amuti kat Iesu en aiveave✡ Mat 27:32-44; Luk 23:26-43; Sion 19:17-27
21 Ka en avong enek, meatin tai ka en out sav, mai netin Serusalem. Isen Saemon ten out Saerin, vi tata onen Aleksanda ka Rupas. Ka meatin tavaeen keil akeih kati vahous aiveave onen Iesu.
22 Amulamun Iesu vina en Hou Kolkota, koa aneite teni vi ‘asi ten avat.’ 23 En out enek, asan uaen koa avilesi ral min mir‡ Mir vi meresin tai koa amumoni en toeai tai, vasakin mahien onen meatin vaha netan, suval panadol. vamuni keke vasakin mahien onen vaha netan. Ka Iesu seseini.✡ Sam 69:21
24 Evus, meatin tavaeen keil amuti kat Iesu en aiveave ka ariti eisin omon ven keil. Ka navong Iesu mul murur, keil ason daes keke avales isei hekur eisin koa kave.✡ Sam 22:18 25 Navong amuti kati, meteiai ma neli tuai nesa. 26 Ka en aiveave onen, aling tisien tai nesa koa viteni vensa amuti kati vit, ‘Koanik vi Asuv Houlu onen Siu Keil.’ 27 Ka meatin keil tavaeen amuti kat tarhena elu emun en aiveave, tai en usiven matu ka tamun en usiven meil onen Iesu.✡ Mat 20:21; Mak 10:37 28 § Tei en tus matu ten Mak asorin selusien enek, “Sakini, selusien ten Tus Votut mai vi anatin koa vit, ‘Apuruni suval vi tarhena tai.’ ”(Aes 53:12)
29 Meatin keil amual vesesal ven out enek, amunge kat Iesu ka aselus kareni avit, “!Ekovei! ?Anatin keke keik kovit kokur keihoen keke ku rasilin Eim Votut ka kum risi en avong hetel enges?✡ Sam 22:7; 109:25; Rang 2:15; Mak 14:58; Sion 2:19 30 !Ka hetahos imok keke kikataun keik sasom enges! !Kisuvul ran aiveave!”** Koanek sakin selusien ten Sam 22:7-8 mai vi anatin.
31 Ka asuv keil onen pris keil ral tiser keil ten mengkatien onen Mosis emun amul arohtoh min Iesu. Amul aviteni min keil eris avit, “!Kei kilea vakataun meatin sav keil, ka sakras vakataun kei sasen enges! 32 !Munak vi anatin keke kei vi Mesaea, asuv houlu onen Siu keil, tahos keke hemita netan ran aiveave keitinek! Hesakini, ir rehelesi ka rehekur anatin eni.” Ka tarhena keilu mun lumul luselus kareni.
Matien onen Iesu✡ Mat 27:45-56; Luk 23:44-49; Sion 19:28-30
33 En taviai, mankoli mai mutaluh koe out vasi, ka meteiai tovuol rokol haoa etel.✡ Amos 8:9 34 Ka navong haoa etel enek evus, Iesu viso keih en selusien kati onen ten Arameak vit, “!Ilae! !Ilae! ?Lama sabaktani?” Sam keil 22:1 Aneite ten selusien enek vi, ‘!Ahi onak! !Ahi onak! ?Vensa kolokoveinau?’
35 Navong tei en koakeil amul en out enek araengoni, keil avit, “?Milonge? Kei mul vise provet Ilae-tsa.”
36 Ka tai en keil muloh vina, kur tounah koa suval soke eisin tai, ka rang rinduni en uaen takon.✡ Sam 69:21; Mat 27:34; Mak 15:23; Luk 23:36 Evus, lingi en kele ai tai ka mai sani vina ven Iesu vasimi. Evus, viteni vit, “Veitir mau ka rovales visi. ?Ilaetsa hemai hekulati hemita netan ran aiveave, vuo hermaitei?”
37 Ka Iesu mis roha, leh kor en eang, ka mat.
38 En hati avong enesek, kaliko koa matetel koa aleh koe hati out tai koa vi votut vis vi votut imok en Eim Votut, sipasi en ngolite nesa vita varei rokol ngolite netan.✡ Hib 10:19-20
39 Avat tai onen meatin keil tavaeen mules vati vesesal ven aiveave. Lesi mukave Iesu mat, ka vit, “Anatin eli, kei vi Natin Ahi varei.”
40-41 Ahin houlu avati keil soutin neli ran aiveave ka amul arapehai avalesi. Keil amusil Iesu umai en out Serusalem. Ka etel en keil, Meri ten out Makdela, Salome, ka Meri mama onen Iosev keilu Tiemes; mulamu telmusil Iesu navong mul en out Kaleli ka telkatauni.✡ Luk 8:2-3
Aling teiai onen Iesu va en valengeihat tatetahinien✡ Mat 27:57-61; Luk 23:50-56; Sion 19:38-42
42 Vesesal out vavong ka Sabat vamai. Sakini, Siu keil amul asak mesei veni. 43 Meatin tai, isen Siosep ten out Aramatea, metauen tovuol ien ka kei va vis Asuv Paelet ven teiai onen Iesu. Kei vi hetamen tai ten Kaonsel onen Siu keil koa avouhou mini. Kei mun, mul rosin avong koa hiasuvien onen Ahi hekistal en out netan.
44 Paelet mutimanin navong raengoni keke Iesu mat tuai. Sakini vise avat onen meatin keil tavaeen vamai veni ka visi vit, “?Iesu mat imok tuai?” 45 Navong avat enek viteni mini keke anatin mat tuai, Paelet mae lat teiai onen Iesu suk min Siosep.
46 Sakini, Siosep va, vul kaliko tamuoh tai, ka va kulat teiai onen Iesu ran aiveave. Evus, kav koe en kaliko ka lingi va en valengeihat tai koa arei meseini tuai. Evus, rein mari ahat vita mul koe voiteh ten valengeihat enek.✡ Umen 13:29
47 Ka Meri ten out Makdela ka Meri, mama onen Iosev keilu Tiemes, lumul soutin neli, ka lules out koa kei ling teiai onen Iesu mul ien.
✡^ Mat 27:1-2,11-26; Luk 23:1-25; Sion 18:28-40
*15:1: Asuv Paelet vi meatin ten kavmen koa mul losil kat out Itumea, Sameria, ka Sudea koa mari meteimal Serusalem mul ien.
✡15:1: Luk 22:66; Mat 16:21; 27:41; Mak 8:31; 11:27; 14:43,53; Luk 9:22; 20:1
✡15:4: Aes 53:7; Mak 14:60-61; Luk 23:9
✡15:15: Mat 27:27-31; Sion 19:2-3
†15:17: Suval sin tomah.
✡15:20: Mat 27:32-44; Luk 23:26-43; Sion 19:17-27
‡15:23: Mir vi meresin tai koa amumoni en toeai tai, vasakin mahien onen meatin vaha netan, suval panadol.
✡15:23: Sam 69:21
✡15:24: Sam 22:18
§15:28: Tei en tus matu ten Mak asorin selusien enek, “Sakini, selusien ten Tus Votut mai vi anatin koa vit, ‘Apuruni suval vi tarhena tai.’ ”(Aes 53:12)
✡15:29: Sam 22:7; 109:25; Rang 2:15; Mak 14:58; Sion 2:19
**15:30: Koanek sakin selusien ten Sam 22:7-8 mai vi anatin.
✡15:32: Mat 27:45-56; Luk 23:44-49; Sion 19:28-30
✡15:33: Amos 8:9
✡15:36: Sam 69:21; Mat 27:34; Mak 15:23; Luk 23:36
✡15:40-41: Mat 27:57-61; Luk 23:50-56; Sion 19:38-42