1  ✡ Sale 51Bada, Neitan i giukamaḡe Deivida lisinemo bi i giuwena gado, “Mai maso malagaimo lava labu a miyamiya, ḡesauna waiguyauna bi ḡesauna wai yamoyamonina.” 2 Bi lava waiguyauna ba i wai sipu bi i wai kau gulata. 3 Bi lava wai yamoyamonina ba ena sipu waivinina ḡaubona, lauḡemotina i kune vai. Tana ena vanuwa lavedi vaitedi a ḡamo kauwe te i dididiga. Bi ena kanimo i wai kani bi ena tegomo i wai tego bi kota i bewabewana maibena natuna waivinina.

4 Laḡan ḡemota taomana i tava lava waiguyau ena malagaimo. Bi lava waiguyauna i wai lavabili te ena ḡamoḡamo ḡesauna mote i vunu bi i vononoḡe ena taomana aubaina. Bi geḡa te tana i miya moito te lava wai yamoyamonina ena sipu lauḡemotina i vunuvai te ena taomana aubaina i vononoḡi.

5 Ḡome te Deivida nuwana i laisikesikeina, lava waiguyauna lisinemo bi i giuna gado, “Bada matanemo yà giugiu te niga lavana mai i kauwana ba i visu te maso i peki.” 6 Tana lava wai yamoyamonina mote i launuwatoiye, i visu te sipu lau ewalidi wapedi 4 ya legaudi bi lava wai yamoyamonina ena sipu yai epaiyani.

7 Neitan, Deivida i giuwena gado, “Lavana ba tam bi niga mainana. Bada Islael edi Maimaituwa i giuwegu, ‘Tagu e vinem te Islael edi ḡalibona. Bi kota Sol ena ḡailisimo tagu ei yawasanim. 8 Bi Sol ena waibada e vitem bi kota mwanemwanena e vitem. Bi tagu kota e sakom te Islael bi Diuda kwai badayedi. Bamoda niga mwalidi lisimmo sima ḡaubo gulata ba tagu ḡemoḡemotina yai lautawi. 9 Bi tam bai aubaina egu giuvavasaḡa kuna laukasaḡaiḡaiye bi niga kauwina gebogebona kuna voiye? Ulaiya Ḡiti lavana tam kunai peki bi mwanena kuna naḡivai te mwanem. Tam Amon lavedi edi kepatemo Ulaiya kunai peki.* Mote Deivida otina Ulaiya i waipeki bi eta i voiye te Amon lavedi kepatemo ai peki, mba kamaina te Deivida i waipeki. 10 Tam mote ku voteyateyaegu bi Ulaiya mwanena kuna naḡivai te mwanem. Taunana aubaina niganana em dam lelesina ba laḡan matabuna mote nuwavisumo sima miya.’

11 “Maimaituwa niga mainana i giu, ‘Tagu ḡotona te em dam lelesinemo pilipili yà natomedi. Tagu kaka matammo mwanemwanem yà legaudi bi oloto ḡesauna yà vite te vaitena sa kena bi lava matabudi matedimo sa kita. 12 Tam kandavonemo kuna voiye te bena aiyai mote ima sibe. Bi tagu ba suwalemo yà voiye te Islael lavedi matabudi sa kita.”

13 Ḡome Deivida, Neitan i giuwena gado, “Tagu gebogebo Bada matanemo e voiye.” Bi Neitan Deivida ena giu i waimunena gado, “Kamaina, Maimaituwa em gebogebo i noḡotikamaḡe bi mote kuma peki.

14 “Bi tam vawaidoḡa kuna voiyena ba mote em vivila Bada lisinemo, taunana aubaina natum ya peki.”

15 Ḡome te Neitan i nawa ena vanuwemo. Bi Deivida natuna Ulaiya mwanena i bewabewana Bada i voiye te i sida gulata. 16 Bi mba sidanemo Deivida gomana aubaina i laupali Maimaituwa lisinemo. Tana i udi bi i sola nawa ena gabumo bi mote ena ani kenamo i kena bi dudubala matabuna senalemo i kenakena. 17 Deivida ena vanuwemo babada magumagulidi a miya moito te tana senalemo i wai patikune bi i kenakenana, a kanuwabigabiga, te maso i kena moito bi vaitena a kani bi geḡa te tana i daboka.

18 Laḡan wai 7-na mulinemo gomana i peki bi Deivida ena taupaula tana tainuwatauna a naile bi a giuna gado, “Gomana yawayawasaninemo tada Deivida te giugiuwena mote kalinada i vaivaiye, niganana gomana i peki bi bainewa ta tainuwatau, taunaḡa imai peki munaḡe?”

19 Deivida ena taupaula i kitedi ai ḡemotidi bi a wai giugiu bi mote i vaiyedi bi i noḡoti te gomana male i peki. Taunana aubaina Deivida ena taupaula i waitalayedina gado, “Gomana kaikana i peki?”

Bi tedi a giuwena gado, “Mm, i peki.”

20 Deivida senalemo† Diu lavedi edi vanuwa mote senalemo voivoiyedi bi tedi edi vanuwa ba doḡamo kelikelidi. i waipatikunena, i kena moito, i asiwa bi masi panepanedimo tunina i kailolodi bi i waigala kauwa. Bi i nawa Bada ena palai waiyawemo i lauduneye. Laudune mulinemo i munaḡa ena vanuwemo bi ena taupaula i giuwedi te kani a natome te i kani.

21 Deivida ena taupaula a giuwena gado, “Niga bai kauwina kuna voiye, laḡannemo gomana yawayawasanina, i kenakena ba kuna udi bi kuna ḡabaḡaba. Bi niganana gomana i peki, kaka tam kuna kenamoito bi kwa kanikani.”

22 Bi Deivida i giuwedina gado, “Laḡannemo gomana yawayawasaninemo tagu ei noḡota te bena Bada ya launuwatoiyegu bi gomana yai yawasani. Taunana aubaina tagu e udi bi e ḡabaḡaba. 23 Bi niganana gomana i peki bi bai aubaina yà udi. Mote ḡemoḡemotina gomana yàmai yawasani munaḡe, mba eta i doliye.”

24 Bi Besiba ma nuwaboyana i miyamiya bi mwanena Deivida i munaḡa tava te i kanuwabigabiga. Bi mwanena vaitena a kena te vesala i bwaga bi i wai natuna te gomana olotona i bewa. Bi Deivida gomenina i wai isana, Solomon. Bi Bada, Solomon i kita bi i ḡoe kauwe. 25 Taunana aubaina Bada taugiuwatana Neitan i giukamaḡe te Deivida ya giuwe te gomenina yai isana, Sedidaiya.‡ Isa Sedidaiya banina ba Bada ena ḡoe Solomon lisinemo.