1 Kwamla laḡandimo kaka ḡalibona sa nawa sa wai ḡaviya. Diyowab bi ena tauwaiḡaviya babadidi bi Islael edi tauwaiḡaviya matabudi Deivida i giukamaḡedi a nawa Amon. Bi tana Yelusalemmo i miya gwasa, ḡome Amon lavedi ai ḡaviyedi bi a ḡosa kovidi bi Laba Malagaina a moito galame.

2-4 Laḡan ḡesau aubiganemo, Deivida ḡalibona vanuwina noke dabanemo ena ani kenamo i kena moito bi i moimoito nawa, te waivini mulemulel i kita yovoḡe i asiasiwa. Waivinina nawanawalai i vai bi edi vaivai luvanemo i asiwa bi i kaka visuvisu munaḡe. Taunana aubaina te Deivida oloto ḡesauna i giukamaḡe te waivinina i lau mulimuliye. Bi olotona i tava munaḡa bi Deivida i giuwena gado, “Tana Besiba mwanena Ulaiya Ḡiti olotona bi tamana Eliyem.” Kamaina bi Deivida oloto i giuwe te i nawa waivinina i waidoli natome lisinemo bi vaitena a kena. Mulinemo te waivini i munaḡa ena vanuwemo. 5 Bi waivini mayana vai te bwaga, kamaina bi Deivida ena giu i giukamaḡena gado, “Tagu ba e bwaga.”

6 Taunana aubaina Deivida giu i giukamaḡe Diyowab lisinemo bi i giuwena gado, “Ulaiya Ḡiti lavana kwa giukamaḡe lisigumo.” Kamaina bi Diyowab, Ulaiya i giukamaḡe Deivida lisinemo. 7 Kamaina bi Ulaiya i nato Deivida lisinemo. Bi Deivida i waitalayena gado, “Diyowab ena tauwaiḡaviya vaitedi bainewa? Bi bainewa sa waiḡaviya?” 8 Kamaina bi Deivida, Ulaiya i giuwena gado, “Kwa nawa em vanuwemo bi kaḡem kwa koḡedi* Diu edi vaivaimo lava i nawanawa bi i tavana ba kaḡena sa gei koḡa kaka ya sola nawa vanuwemo. bi kwai yawasi.” Sauginemo Ulaiya, Deivida ena vanuwa i gosegose kamaḡe ba ḡome ḡalibona ena puyo i giukamaḡe Ulaiya ena vanuwemo. 9 Bi Ulaiya mote i nawa ena vanuwemo bi tana ḡalibona ena vanuwa mataetinemo Deivida ena tauyava matabudi vaitedi a kena.

10 Kamaina bi lava ḡesaudi ḡalibona a giuwena gado, “Ulaiya mote i nawa ena vanuwemo.” Deivida, Ulaiya i giuwena gado, “Ei, tam kuna nawanawana kuna tava munaḡa bi bai aubaina mote kuna nawa em vanuwemo?”

11 Ḡome Ulaiya, Deivida i giuwena gado, “Mote i visu te waianina bogesina, Islael bi Diuda edi tauwaiḡaviya vaitedi palaimo sa miyamiya. Bi kota egu tauwaiḡaviya badana noko wapumo a lauḡalavu bi sa miyamiya. Bi tagu yà nawa egu vanuwemo yà kani, yà tego bi mwanegu vaitena ka kena, mba ani kitana mote i visu.”

12 Kamaina bi Deivida, Ulaiya i giuwena gado, “Tam niga ḡome kwa miya bi laḡan wailabuinemo kaka yà giukamaḡem kwa munaḡa.” Ulaiya Yelusalemmo i miya te laḡan wai labunemo kaka i nawa. 13 Ḡome te Deivida, Ulaiya i giuvai bi vaitena a kani, a tego bi Deivida, Ulaiya i waitego bu'uwi. Bi i munaḡa ena gabumo taupaula vaitedi a kena bi mote i nawa ena vanuwemo.

14 Olaolalemo Deivida, Diyowab ena pepa i gilumi te Ulaiya i vai nawe Diyowab i vite. 15 Mba pepana noponemo Deivida i gilumana gado, “Diyowab, niga lavana Ulaiya kwa nawe ḡaviya diyaotidimo bi laumatamo ko gose kamaḡe bi temi koi mulisuwasuwa. Mba mai kauwinemo kaka tana sai peki.”

16 Kedi ḡaviya a ganapaniyedi Laba malagainemo, ḡome Diyowab i kita te bamo modomodonemo kedi ḡaviya pokapoka sa wai ḡaviya, ba Ulaiya ḡome i sako. 17 Bi malagainemo ḡaviya a lau potiyovo te Diyowab ena tauwaiḡaviya vaitedi ai ḡaviya bi Deivida ena tauwaiḡaviya ḡesaudi ai pekidi bi kota Ḡiti olotona Ulaiya vaitena ai peki.

26 Kamaina bi Besiba i vaiye te mwanena Ulaiya i peki ba tana i wai nuwaboyae. 27 Mba wainuwaboyana mulinemo Deivida lava ḡesauna i giukamaḡe te i wai doli natome ena vanuwemo. Ḡome waivinina i naḡi bi i wai natuna te gomana olotona i bewa. Deivida kauwina i voiyena ba Bada mote i wai nuwavisu.