1 Kaimia* Mt 18:15; 1 Ko 10:12; 2 Te 3:14-15; 2 Ti 2:25; Je 5:19-20 paluma, koo mendeme nyakamanya mende minao makande pitamopa koo doko pia kandeno doko, nyakama Oli Sipitisa paleta endakali dupame andiki pyoo baa dee tolasalapape. Dopa pitaminopa makande pingi mendeme nyakama apata makande pitame lao kandao tange isoo kalyepape. 2 Nyakama-kisa* Jo 13:34; Lo 8:2; 15:1 kenda pipae setamo dupanya nisoloo pyoo kalyepape. Dopa pitamino dokome Kataisanya mana doko watao minatami. 3 Akali* 1 Ko 4:7 kenge nasingi mendeme namba kenge singi akali mendena lao masilyamo dokome baa tange minakasilyamo. 4 Akali* 1 Ko 11:28 mendai lao dokome emba tangenya kalai dupa kandokondape pyoo kandao katape. Dopa pitino akali dokome akali mendenya kalai dupa kandatala emba epena lao masala naenya, emba tangenya kalai dupa kandatala emba epena lao masete. 5 Doko* Lo 14:12 aipuma? Akali mendai mendai lao dokome baa tangenya kenda pipae doko soo katata.

6 Wai* Lo 15:27; 1 Ko 9:11,14 Pii Epe dokonya mana nyoo kalyamo akali dokome baanya auu pingi setamo dupa pitakanya yangi mokosoo mana lamaingi akali doko maina.

7 Embame* Dit 30:15-20; Jop 13:9; Osi 8:7 emba tange minakasala nayape. Endakali mendeme Gote kandao kilya nakandenge. Akali mendeme eenya nee wai pokatamo mendai dokaitaka andatamopa mandita. 8 Baame* Jop 15:35; Pot 11:18; Jo 3:6; 6:63; Lo 6:21-22; 8:13; 1 Ko 15:35-49 baanya mona koome auu kaenge ee dokonya wai pokatamo kandao doko, mona koo dokome etete koyasingi nee doko mandyuu maita. Oli Sipitisanya auu kaenge ee dokonya wai pokatamo kandao doko, Oli Sipitisa dokome lete etete katenge nee doko mandyuu baa maita. 9 Naimame* 2 Te 3:13 kalai epe dupa pyaanya maka nakayamana. Naimame kainasa maka nakayatamano kandao doko, mandipenge gii doko ipatamopa nee epe dupa manditama. 10 Dokonya* 1 Te 5:15 naimame pipenge jetamoli pyoo endakali yango dupa pitaka kandao mana epe minamana. Jisasa lao masoo miningi palu doko etete nisokondape pyoo nisemana.

11 Nambame* 1 Ko 16:21; Kl 4:18 nyakamanya pepa andake pyoo pyekelyo dake kanjepape. Doko namba tangenya kingimi pyekelyo. 12 Akali* Ga 5:11; Pl 3:18; Kl 2:18 nyakamanya elya pingi kambu kepalapa lao kyoto joo lelyamino akali dupa endakalimi epe lamo lao kandapimili lao lelyamino. Dopa lelyamino doko Kataisa ita pokonya kumiamo dokonya pii doko lao masoo minatala tanda nanyemana lao lelyamino. 13 Elya* Lo 2:21-22 pingi kambu kepalapa lelyamino akali dupa tangeme mana setapae dupa watao minala naelyamino. Nyakamame dupanya pii doko watao minao elya pingi kambu kepatamino dokonya alyasale joo katamana lao masetala dupame akali nyakama elya pingi kambu kepapimi laka lao masilyamino. 14 Dopaka* 1 Ko 1:31; 2:2 doko, namba waka mendenya alyasale joo katato doko kapa etete napatana, naimanya Kamongo Jisasa Kataisa ita pokonya kumiamo dokonya iki alyasale joo katatoo lao masilyo. Kataisa ita poko dokonya kumiamo dokome isa yuu koo singi dake nambanya lengelyaapi dokonya pyao kumasetea. Namba isa yuu koo singi dakenya lengelyaapi dokonya pyao kumaseteaka. 15 Elya* 1 Ko 7:19; 2 Ko 5:17; Ga 5:6 pingi kambu kepengepi kepala naengepi doko angi mende daa. Goteme endakali enenge injisingi doko iki angi. 16 Makande* Wee 125:5 doko watatamino endakali dupa pitaka kandao Goteme kondo kayapala dupanya mona lyuu lasakamaina! Endakali dupa Gotenya Isataele tata.

17 Nambame* 2 Ko 4:10 Jisasanya kalai doko pyoo tanda neo dokonya namba-kisa kombe palelyamo. Dokonya tenda endakali mendeme kenda pipae mendapua namba-kisa setala nayapenge.

18 Kaimia paluma, naimanya Kamongo Jisasa Kataisanya mona epe palenge doko nyakamanya mona dokonya palyekena. Kiniaka.