1 Indupa* Ap 24:17; Lo 15:25-26; 2 Ko 8:1-9; Ga 2:10 nambame Gotenya endakali Jutia yuu dokonya kalyamino dupa nisoo muni pyasepenge dokonya lelyo. Nambame Galasia yuu dokonya sosa wakale wakale kalyamino dupame pina leoliaka pyoo nyakamame pyepape. 2 Nyakama* Mt 28:1; Ap 20:7; 2 Ko 9:4-5 pitaka mendai mendai lawame muni nyetamili pyoo Sandee dii lao nyakamanya andaka pituu mokosepala yangi waka nyoo elyambu pyoo kalyepape. Namba ipato dokopa muni pyasalanya kutala nayatamina dopa pyepape. 3 Namba* 2 Ko 8:18-19 ipupato dokopa nyakamame akali mendatupa makande petataminopa nambame pepa mende wakale wakale maitala nyakamame nisoo muni maitami dupa mandyakamaiyoo Jetusaleme pena lato. 4 Dee* Ap 20:4 namba apata pupenge jetamo kandao doko, awapa patama.

5 Namba* Ap 19:21; 20:1; Lo 15:26; 2 Ko 8:1 Masetonia yuu ongonya pato lao masilyona, pato ongopa ongonya-kaita nyakama katatamisa ipato. 6 Ipupala* Lo 15:24; Ta 3:12 nyakama-pipa gii mendatupa katato lao masilyo. Koo kana palitamo gii dutupa pitaka nyakama-pipa katatope lao masala naelyo. Dee maitakao namba mendakaita pato dokopa nyakamame namba kaitini pato dupanya nisetami. 7 Doko,* Ap 18:21 namba pao pituu nyakama kandao yakinama napato. Kamongome yakana lao masetamo kandao doko, namba nyakama-pipa gii mendatupa katapuma laka lao masilyona katatama. 8 Dopaka* Lep 23:15-21; Dit 16:9-11 doko, ae Epesasa mee katao Pendekosa gii doko kandao nyoto. 9 Doko,* Ap 19:8-10; 2 Ko 2:12; Kl 4:3; Pa 3:8 nambame ae kalai andake pyoo dii longo mandipenge kaitini doko lumbapae sipumopa, dee tanga lao kaitini lyokalanya pingi endakali dupa longo kalyamino.

10 Timoti* Ap 16:1; 1 Ko 4:17 baa nyakama kalyamino ongonya epea kandeno doko, baa nyakamanya kaina dokonya paka nakayao mona epe palyoo katatamopana nyakama kandao kalyepape. Doko, baame Kamongonya kalai nambame pilyo dokonyaka pingi. 11 Dopana,* 1 Ti 4:12; 2 Ti 1:7 endakali mendeme baa kilya nakandalapape. Dee nyakamame baa namba katatosa pilyina lao mona minao auu pisakamaiyoo kaita ipupenge dupanya baa nisalapape. Nambame masoo miningi kaiminingi dupa-pipa baa malisoo kalyo.

12 Kaiminingi* Ap 18:24; 1 Ko 1:12; 3:6 Apolosanya pii doko dapa: nambame paa longosa kongo lao baa masoo miningi kaiminingi mendapua-pipa nyakama katatamisa epena lapuaka doko, baa epapu naipatoo lao kyoto jilyamo. Dopaka doko, maitakao baa ipupenge jetamo dokopa ipata.

13 Nyakama* Wee 31:24; Ep 6:10 lenge tao katao, masoo miningi doko kyoto joo minao, akali joo tupi joo kalyepape. 14 Pitamino dupa pitaka auu kayao pyepape.

15-16 Nyakamame* Lo 16:5; 1 Ko 1:16* Pl 2:29-30; 1 Te 5:12; Ip 13:17 akali Setepanasapi baa palupi dupa masilyamino. Akaya yuu dokonya dupame kandasoo masoo miniami. Dopa petala dupa tangeme Gotenya endakali dupa nisemana lao masetala nisokondape pyoo nisoo kalyamino. Kaimia paluma, nambame nyakama kyoto joo langilyona, nyakamame endakali dopale dupapi dee dupa-pipa lekeleke tao kalai mendai pingi dupa pitakapi dupanya piipi manapi dupa watao minalapape.

17 Setepanasapi Potyunetasapi dee Akaikasapi akali dutupa namba kalyo angenya epeami dokonya namba eteke pilyo. Nyakama kapa pao naipupenge jiamo dokonya dupame nyakama alo pyoo epeami. 18 Dupame* Pl 2:29 nambanya mona epe palisakao dee nyakamanya mona epe palisakao piami. Dopana, nyakamame akali dopale dupa masalapape.

19 Yuu* Ap 18:2,18,26; Lo 16:5; 2 Ti 1:15 Esia Potopinja dokonya sosa wakale wakale kalyamino dupame nyakama kandao auu pyoo kalyepape lelyamino. Akuilapi Pitisikapi dee dolaponya andaka endakali kambu pingi sosa dokopi dupame Kamongo lao masetala nyakama kandao auu pyoo kalyepape lakondape pyoo lelyamino. 20 Masoo* Lo 16:16; 2 Ko 13:12 miningi kaiminingi ae katapimi dupa pitakame nyakama kandao auu pyoo kalyepape lelyamino.

Nyakamame nyakama tangelapo mende auu pyoo katena laa laa pyoo, Gotenya endakali dupame pipengeli pyoo mende kopyoo nunu pii pii pyoo kalyepape.

21 Nyakama* Ga 6:11; Kl 4:18; 2 Te 3:17 auu pyoo kalyepape lelyo pii dake namba Polo tange kingimi pyekelyo.

22 Endakali* Lo 9:3; 1 Ko 11:27; Ga 1:8-9; Pl 4:5 mendeme Kamongo doko auu nakayatamo kandao doko, baa yuu koo dokonya pena. Kamongo, emba ipu!

23 Kamongo* Lo 16:20 Jisasame nyakama kandao mona epe palena. 24 Kataisa Jisasa-kisa nambame nyakama pitaka auu kayao kalyo.