8
1 “Te ena Genuai Bidi, eno po te tiwai ma obao. Te tama side te boi bidi dabe te isali bidi dabe pubulali gų pageba pelama, te Juda dabe king dabe me tobolu bidi dabe, te augwaligo dili dabe hodaibao, te pris dabego dili, me profet dabego dili, me te tigidali Jerusalem we bidigo dili te hodaibao. 2 Te Juda dabego te giliga, me polua, me hǫ dabe, te godolo homu mu yalio. Tama augwa te nai dabeba kidu sugunama, gedu haluasa po augwaliba weyu, te augwali tau somainu augwaliba hanalu wali. Te augwaligo te tobage kolesaga dabe augwaliba lotu weyu ebo sę dabe yali. Tama tibaso, te boi bidi dabego te Juda dabego tigi dili dabe selama, te tǫba sąyu, te yowigo di tabo tiwai yaibao. Te giligago, me poluago, me hǫ dabego te tigi dili sueibao. Tama te dili dabe selama, te ma pubulabo bidi dabe meni yaibao. 3 Te dwai we bidide te Juda hani dwasianu bage naga elaluali, tama te tǫba kantri dabeba ela gudulaibao. Tama te Juda dabego augwa bidabo wiegi yai ula te godolo homu me egobeo. Te augwali isabo homu naga yaibao. Ena Tigidali Bomo Elalubo Genuai Bidi, eno te po wai dao,” wali.
Te Juda dabego augwa dwai sę ebode hale me ebeo
4 Genuai Bidigo enabolo weyu, te po te we bidi augwaliba pusao po wali,
“Ena, Genuai Bidi, eno te po obao,” wali.
“Te bidi dabe augwali tula mubo sogo,
te augwali ma hodalubo meni da, agawe?
Te bidi dabe sunumidu pobadi,
te pabo sunumi geda mubo sogo,
te augwali begelama, ma geasa pabo meni da,
agawe? Menio.
Augwa te tama tiwai ebo dao.
5 Tialima, te Jerusalem we bidigo ena tagalama,
te augwali ma begasa asobeo.
Augwaligo ena sesemane sogo tudiba muyu ebao.
Te augwa tibo kolesaga wali pabo bomo eyu,
te augwali enaba ma begasa asabo homu me ebeo.
6 Eno augwaligo poba olo bugagia mubadi,
tiali goli eno augwaligo mu po wabo me odobeo.
Te bidi me deligo homu begeligi soyu, te po weyu,
‘Tegobao, eno genuai sęgę mu sali,’ po wabeo. Menio.
Tigidaligo augwa homu naga wali pabo homu yali,
te ami dabe hosde dugulama,
te hwįgi painogo udabo tiwai ebo dao.
7 Te tobage genuai ba me dwasianu bago te augwa
me badu me bidagasobo sogo koneama,
te taga pabo sogo me konebo dao.
Tiali goli, eno we bidi augwaligo te ena Genuai Bidi
eno bomai po homugo konebeo,” wali.
8 “Magi baso dage Juda dabego te tiwai po weyu,
‘Dago te wiegi yai homude koneani kolesaga elalubao,’
po weyu,
‘magi baso meni, te Genuai Bidigo agai bomai po
dabolo mawai da,’ obao.
Dagego te tama po wagio, magi baso meni,
te bomai po ola mabo tisa dabego te bomai po
hasegelama, te tibo po naga asębo dao.
9 Te kolesaga koneai bidi dabego Genuai Bidi ena
tudiba mubao.
Magi baso augwa te homu eyu,
augwa koneani kolesaga genuai elaluba homu
ebawe?
Te augwa hale dwai mu selama,
te dwai sogo gegeyu, te hasa bade tola sabo tiwai
yaibao.
Tama augwa homu kolesaga dolaibao.”
10 “Tialima, eno te gasa bidi dabego te Juda dabego
we me tǫ sagasomainogo ilaibao.
Magi baso meni, tigidali we bidigo dwai sę haniani eyu,
te doado bage hauwa sainu yali.
Te olo bidi dabego me, te genuai bidi dabego me,
te kolesaga wali pali.
Te pris dabe me, profetgo me, te we bidi dabe tibo po
ola mayu yai dao.
11 Eno we bidi dabe genuai keni dabe elaluali,
tiali goli, te pris dabe me profet dabego te keni dabe
sulama,
te olo nai subo tiwai yalio,
tama augwaligo bugagia sisibeo.
Augwaligo te tiwai po te we bidi dabeba weyu yali,
‘Dage homu kone tuą pigio.
Da bugagia bidibao.’ Tiali goli, menio.
Augwali bugagia me bidibeo. * Ese 13:10
12 Te Israel dabe augwa yali dwai damuai kugumini
tiwai ebo kolesagade dwai hale yaliwe? Mu menio.
Augwa dwasianu hale me ebeo.
Augwa te tobage kolesagade hale me ebeo.
Tama eno augwaliba dwai dene menama,
te augwali mu dolaibao,
te gasa hani dolali tiwai yaibao.
Te po ena Genuai Bidigo po dao.” * Jer 6:12-15
13 “Ena Genuai Bidi, eno po dolo obao,
te eno augwali mu silimainu yaibao.
Augwali te ni wain, me ni fik, te du munu me walisiąma,
te augwa yabe sasia pabo tiwai yaibao.
Tialima, eno te boi bidi hani dabe tagala palama,
augwali aiyaba elalumainu yaibao.”
14 Te Juda dabego te tama po waibao,
“Magi baso da olo dugulalubawe?
Da sisinama, te bomai obo elalubo taun dabeba geme
duala sigi pelainao,
tama da te taun dabede isigi pinao.
Dago te Genuai Bidi, dena Godiba dago dwai sę yali,
tama agai te po weyu, da isimainao wali.
Te agai dabolo te bidi dolabo marasin mabo tiwai
menama,
te dago tumainu yali.
15 Te da bugagia bidaibao homu dago yali,
tiali goli, te da bugagia me bidibeo.
Te da bugagia usu ma elama bidabo sogo pedelaiba
homu yali,
tiali goli, te boi bidi dabe aselama,
da wi dwai mu ilai dao.
16 Te boi bidi dabe te Dan hanigo tǫ te not badu
pedelama,
te dago odali, te augwaligo hos dabe te homu hę
bomonama mu wabo odali.
Te hos dabe ga wabogo te tigidali tǫ pedai mumunu
yalio.
Te boi bidi dabe asiyu, te taun Jerusalem dolama,
tede bidibo we bidi me dolainu yali,
te dago tǫde elalubo tigidali nai mu dolama,
silainu yai dao.”
17 Te Genuai Bidigo te tiwai po wali,
“Odao. Te eno dwai hasamani dageba tagala palama,
te dage gąų kelaibao.
Tama dagego te hasamani dabe nagamenama,
dua bidimainu eyu,
te dage tagalomainu ebaso, usu egobeo. Mu menio,”
te Juda dabego te po wali.
Ena Jeremaia, eno ena hani dabe hobede mu yali
18 Eno hobede elama, tama haliga sęgę dwai mu elama,
tama eno homu kolesaga tigidali dolalio.
19 Hobede dao, te eno hani dabe tigidali tǫ kantride
bidalu,
te augwa gela weyu, te tama i obao,
“Te Genuai Bidi te taun Saionde king munu ma bidigobe
homu yaiba, agawe?
Magi baso agai da tau sabewe?”
Tialima, Genuai Bidigo po wei ponoyu, te tiwai po wali,
“Magi baso eno we bidi dagego te gasa tǫ kantri dabego
tibo dwai godigo piksa nigilama,
te augwaliba lotu waliwe?
Duga te tama tebo kolesagago te ena dwai haliga sębę
ilali.”
20 Te we bidi dabego te tiwai i wali,
“Wiegi yai sogo te siminama,
te augwaligo gide tau yali nai tigidali salio.
Tiali goli, Godigo da ma sisąbadi dao.” Te po wali.
21 Ena Jeremaia, eno suali, ena hani dabe dolali,
tibaso eno homu dwalio.
Eno haliga sęgę dwai mu elama,
te eno gela umagia mu wai dao.
22 Te tǫ Gileatde te wiegi yai marasin
me munalusiąyu eba, agawe?
Te augwa dokta me menisiąyu, ebawe?
Magi baso te eno we bidi hobedagia te usu ma
*8:22: Te vesde e tiwai po elalubao. Jeremaiago po begelama, teba wali. Te Juda dabego wiegi yai marasin te tǫ Gileatde sabo dao wali. Te Gag 37:25 tede suao. Tialima, Jeremaiago te tama koneani, te aga we bidi dabego te tobage gasi, te bidi augwa ebo dwai kolesagade pedalubao, tama te wiegi yai doktago me, te wiegi yai marasingo me, te augwali usu ma ilama pedelainu ebaso usu me egobeo, te po wai dao.