1 Genuai Bidigo enabolo te tiwai po wali, 2 “Tǫde bidio, nago te Israelgo profet dabe wado ilao. Te profet augwaligo te nosali nai dabe pedelabo po obao. Tiali goli, augwaligo tibo po obao. Te po augwa homude nigilama wali. Nago augwaliba te po walama, te augwaligo ena Genuai Bidi eno poba naga olo bugagia muao wao. 3 Ena God Genuai Bidi, eno te po obao. Te wabo pabo po wabo tiwai ebo profet dabe te dolaibao. Augwaligo te nade subo nai tiwai me sugobeo. Menio. Augwaligo te pusubo po dabe, te augwa homude digi augwaligo nigilama, pusai dao. 4 Dage Israel dabego odiąo. Dagego te profet dabe te uni yowi dabe te dolali taun me delide bilalu wabo po tiwai po obao wali. 5 Augwaligo te taun bagulali obo alula pai elalubo te bugagia tonalusiąma, tama te obo ma nigibo sę egobeo. Tialima, ena Genuai Bidi, eno dwai dene maiabo sę dageba pedalubo sogo, tama eno te boi bidi dabe tagala palobo sogo da, teda dage Israel te boi hwįbode bomonama me dolalugobeo.” Te po wai. 6 “Te profet dabe augwaligo ną ebo mu menio, te nai dabe pedelaibao po augwaligo obaso da, te tibo naga waibao. Augwaligo te tama po weyu, ‘Dago te Genuai Bidigo po pusubao,’ wali. Tiali goli, eno augwaliba te po me mabeo. Tialima, magi elama augwaligo te homu eyu, te augwaligo po mu pedalugowe homu yaliwe?”

7 “Megi eno te tiwai po dage profet dabeba obao, dagego te po weyu, dagego te nade subo nai tiwai suali po olama, tama dagego te nai dabe pedelaiba po obao. Tialima, dagego te wabo mu po me wabeo. Te tibo po naga obao. Dagego te we bidi augwaliba te tiwai po waliyu, ‘Te e po da, Genuai Bidigo po obao,’ wali, tialima ena God, eno po me deli dageba me mabeo. 8 Tama tibaso, megi ena God Genuai Bidi eno dage profetba te tama po obao, dagego te we bidi augwaliba tibo po ola mobaso, te eno dageba wabo po ebo homu genuai elalubao. 9 Megi da, te we bidi augwaliba tibo po ola mabo profet dabe dageba eno dwai dene mabo sę yaibao. Te eno we bidi dabe augwali deliba sisinibo sogo, dage augwali dali me bidigobeo. Tama dagego nogi te tigidali Israel we bidigo nogi elalubo bukude me elalugobeo. Eno dage ela gudulama, tama dage te Israel tǫ kantri pedaiba ma begasa asogobeo. Te tiwai ebo dagego bugagia koneama, ena digi ena God Genuai Bidi da po waibao,” wali.

10 “Dage eno we bidi dabe tibo po ola mani tibo profet bidi dabe da. Dagego te tama po augwaliba walali, ‘Tigidali nai bugagia elalubao.’ Tiali goli, te tama me telalubeo. Tigidali nai bugagia me elalubeo. Te eno we bidi augwaligo dwai sę eyu, te augwaligo bomo meni yai obo te masigigo nigai tiwai yali. Te nosali dage profet dabe aselayu, dagego augwalibolo te ‘Dagego dwai sę yali,’ te po wasiąwai dao. Tede dagego te tedela yai pen te dwai obode pilama, tama te obo tonobo gasa sawi yai ebaso, te augwaliba dagego tama po walali, te obo boma pai elalubao wali. * Jer 6:14; 8:11 11 Tialima, megi eno dage profet dabeba te tama po walobao, te obo da, alua paibao. Eno te genuai tulubage tagala palama, te ais talua ge tulubage te oboba tulama, te bomai waligo te obo degelebaso, 12 tama te obo toga pelama, tulalueibao. Tama tigidali we bidigo dageba te tama po waibao, ‘Te dila pai obo da, agawe? Mu menio. Dagego te tedela yai pen pilaligo naga da tibo po ola mani dao,’ te we bidi dabego te po waibao,” wali.

13 “Tama tibaso, ena God Genuai Bidi, eno te tama po obao. Eno haliga sębę dwai mu elama, eno te genuai tulubage, me te talua ge ais tulubage, me bomai wali tagala palama, te obo dolomainu yaibao. 14 Tama eno te dage profet bagego te obode pilali pen tigidali aluama, dolaibao. Tama te obo dolaluali madi te pesage olo elalueibao. Te obo alubo sogo, te dageba degasa dulama, te dage tigidali ela mueibao. Tama dage tigidaligo te tama tebo sę ebo te bugagia konemainu yali, ena digi ena Genuai Bidi dao,” wali.

15 “Dage Israel we bidi dabeba eno haliga sębę dwai mu ebao, tama eno te obo dolama, tama te obode pen pilali profet dabeba dwai dene mawaibao. Tebogo te eno haliga sębę usu naibao. Tialima, eno te tama po dageba walobao, te obo dolali, tama te pen pilali profet dabe, augwali me dolaibao. 16 Te profet dabego te Jerusalemba te tama po wali, tigidali nai bugagia elalubao, te megi te boi pibo sogo dao, te po walio. Tialima, te sogo te tigidali nai bugagia me elalugobeo. Tibaso, eno augwali dolaibao. Ena God Genuai Bidigo, eno te po wai dao,” wali.

17 Genuai Bidigo te tama po wali, “Tǫde bidio, nago te Israel we dabeba wado ilao, augwaligo te nosali pedelabo nai dabede po obao. Magi baso meni, te po da, augwa homude digi koliasa wabo dao. 18 Ena God Genuai Bidi, eno po te we dabede elalubao. Eno po te tiwai, ‘Dage we dwai dabe, te dage dolaibao. Dagego te yesi bubo sęgo te nogo mo ebo tiwai elama, te we augwali nogoba mubao. Tama dagego te yesi bubo ugwa hobolama, te augwali toboluba mubao. Augwaligo te nai dabe mubo te gasa we bidi augwali tonaluabo bomo somainu ebo dao. Dage we dabego dugade digi naga homu koneama, tama dagego we bidi dolobo dao. Dagego homugo te wiegi yai kolesaga da homu eba, agawe?’ te po wao,” wali.

19 “Dagego tibo po weyu, te we bidi augwaliba waliyu, dago te Godigo po pusubao po wali. Tiali goli, menio. Dagego eno nogi aiyaba elaluyu ebao. Dagego yesi bubo sę ebo kolesagade te we bidi meba ela muyu, te meba tau sobao. Te bidi meba eno homugo augwali isigobe da homu yali, te bidi dabe dagego ela mubao. Te eno homugo meba isimaina homu yali bidi dabe, te dagego augwali tau sobaso, te augwali bugagia bidali. Tama te we bidi augwaligo dagego te tama tebo kolesaga godolo ebao. Augwaligo dage te bret delagego abelebaso, me te dwasianu sasabi rais baligo abelebo si da, tama te kolesaga dagego yai dao,” wali.

20 “Tama tibaso, ena God Genuai Bidi, eno te po obao, dagego te we bidi augwali tonaluabo te yesi bubo mobo nigibo sę ebo dabe te eno homugo hagela elama, godolo me ebeo. Dagego te sę tonaluabo we bidi dabe gegebao, te bulu tomode te bidi dabego ba gegebo tiwai ebao. Te dagego nogode eno te mo dabe todoga sąnama, dagego te yesi bubo kolesaga me egobeo. Tama dagego te tonaluali we bidi dabe, augwali te dage dologode munu me bidigobeo. 21 Tama te yesi bubo ugwa dabe dagego tobolude kęąlubo, te tigidali eno peda sąwaibao. Te dagego bomo eno we bidide elaluali tagalomainu elama da, te dagego augwali tonalubo sę munu ma egobeo. Tama dagego te tiwai sę ebo bugagia koneama, ena digi ena Genuai Bidi da po waiyąo,” wali.

22 “Dagego te tibo po hauwa weyu, te dagego wiegi yai bidi dabego homu kolesaga dolobao. Tama dagego te dwai bidi dabe tau sobaso, te augwaligo dwai kolesaga ebo me tagalobeo. Te augwaligo dwai kolesaga tagalobaso da, teda augwali bugagia bidigi dao. 23 Tama tibaso, dagego te we bidi augwali tibo po ola mabo po te tiwai weyu, dagego te nąde subo tiwai nai suali po me wagobeo. Eno te ena we bidi dabe augwali dagego nogode ma selama, tama augwali te dagego bomo dologode munu ma bidigobeo. Tama dagego te tiwai tama bugagia koneama, ena digi ena Genuai Bidi da po omainu ebao,” te po wai.