1 U lan e duw ni ragag nge l’agruw ko gagiyeg rok Ahaz ni Pilung nu Judah, me mang Hoshea nib mo’on ni fak Elah e pilung u Israel, me yog e thin u Samaria ni mereb e duw. 2 Me denen nib togopluw ngak SOMOL, machane de bod gelngin ni denen rok fapi pilung ni yad ba m’on rok ko gagiyeg u Israel. 3 Me mael Shalmaneser ni Pilung nu Assyria ngak; me par Hoshea nga tan pa’ Shalmaneser ngi i pi’ e walbuw ni yu duw. 4 Machane me reb e duw me l’oeg Hoshea e pi mal’og ngranod ngak So ni Pilung nu Egypt, ni yad be ning e ayuw rok, me tal i pi’ fare walbuw nga Assyria. Nap’an ni nang Shalmaneser e ren’ey, me yog, min kol Hoshea ngan tay nga kalbus.

5 Ma aram me yan Shalmaneser nge mael nga Israel me kol yu Samaria. Me yan i gaman e dalip e duw nap’an fare mael, 6 ni aram e duw ni mereb ko gagiyeg rok Hoshea, me kol fare pilung nu Assyria yu Samaria u tan e mael, me fek piyu Israel nga Assyria ni yad bogi kalbus, me tay boch i yad ngar pired u lan fare binaw nu Halah, ma boch e ra pired u to’oben fare Lul’ ni Habor u lan fa re gi nug nu Gozan ma boch e ra pired u lan fapi binaw nu Media.

7 I waer yu Samaria ni bochan e denen yu Israel nib togopluw ku SOMOL ni Got rorad, ni ir e ayuwegrad u pa’ fare pilung nu Egypt nge pow’iyrad nga wuru’ yu Egypt. Yad be tay fan yug boch e got, 8 ma yad be un nga yalen fapi girdi’ nike tulufrad SOMOL u nap’an ni be yan e tirok e girdi’ i yan nga m’on, ma kar’uned ko yalen nike fil fapi pilung nu Israel. 9 Piyu Israel e ra ngongliyed bogi ban’en nde m’agan’ SOMOL ni Got rorad ngay. Ra ubungyed e yungi tagil e meybil rok e pi’in ndar nanged SOMOL u lan urngin e pi yochi binaw rorad, ni mus ko bin th’abi achig e binaw nge mada’ ko bin thabi ga’ e binaw. 10 U daken urngin yang e ted ngu tanggin urngin kaen e gek’iy nib taglul’ ni kar n’ufed e yu raba’ i malang riy ngalang nge bogi liyos ni ya’an fare got ni bpin ni Asherah, 11 ma kar urfiyed e incense u daken gubin fapi altar rok e pi’in ndar nanged SOMOL, ni yad be un ko pin’en ni be rin’ e pi girdi’ nike tulufrad SOMOL nga wuru’ fare nam. Kar puged e damumuw rok SOMOL nga urngin e ngongol rorad nib kireb 12 mdar folgad ko n’en keyog SOMOL ngorad, ndab ra tedfan e pi liyos.

13 Ma ke l’oeg SOMOL e pi mol’og rok nge pi profet ni ngar ginanged yu Israel nge yu Judah ni ga’ar, “Mu paged e pi ngongol romed ni kireb mi gimed fol ko pin’en ni kugog ni ngan rin’, ni bay u lan fare Motochiyel ni gu pi’ ngak e pi chitamangimed kakrom, ma ku ir e gu pi’ ngomed u daken e pi profet ni tapigpig rog.” 14 Machane dar folgad; yad ba gelan’ ni bod e pi chitamangirad kakrom, nda i pagan’rad ngak SOMOL ni Got rorad. 15 Miyad siyeg ni ngar folgad ko pi gafal rok, miyad pi’ keru’rad ko fare m’ag ni ngongliy SOMOL u thilrad e pi chitamangirad kakrom, miyad sabalbalyang ko pin’en ni be ginangrad riy. Mu ur tedfan e pi liyos nib m’ayfan ngki m’ayfarad, miyad un nga yalen e pi nam ni bay u to’obrad i yan, ni da ku ra folgad ko n’en ni yog SOMOL ngorad ni ngar folgad riy. 16 Ra th’abed urngin e motochiyel rok SOMOL ni Got rorad ngar ngongliyed l’agruw i wasay ni ya’an fak e garbaw ni pumo’on ni ngu’ur tedfan; mu kur ngongliyed ya’an fare got ni bpin ni Asherah, mu’ur tedfan e pi t’uf, mu’ur pigpiggad ngak fare got ni Baal. 17 U ra pi’ed pifakrad ni pumo’on nge ppin ni bogi maligach ni mo’oruf ngak e pi got rok e pi’in ndar nanged SOMOL; mu’ur fithed laniyan’ e pi sathuw nge pi’in yad ma yog e n’en nra buch nga m’on, mar pi’ed yad ni polo’ ko tin kireb ni yad be ngongliy u p’eowchen SOMOL, ma aram e ri yad be pug e damumuw rok. 18 Me damumuw SOMOL ngak piyu Israel me chuwegrad u p’eowchen, me par ni kemus ni go’ yu Judah e digey.

19 Machane ku mus ngak e girdi’ nu Judah ndar folgad ko pi motochiyel rok SOMOL ni Got rorad; ya ra uned ko pi yalen nike un e girdi’ nu Israel ngay. 20 Me fek SOMOL owchen rok urngin piyu Israel, me gechig nagrad me pi’rad nga pa’ e pi to’ogor ni buchan’ nma’ngach nge yan i taw ko ngiyal’ nike tharbegrad u p’eowchen.

21 Nga tomuren nike ki’eg SOMOL yu Israel rok yu Judah, me tay yu Israel i Jeroboam nib mo’on ni fak Nebat nge mang pilung rorad. Me Jeroboam e k’aringrad ngar paged SOMOL me waliyrad nga fithik’ e denen ni ubchiya’. 22 Miyad lek kanawo’en Jeroboam ma dar talgad i rin’ urngin e pi denen niki rin’ Jeroboam, 23 nge mada’ ko ngiyal’ ni chuwegrad SOMOL u p’eowchen, ni bod nike yog u daken fapi tapigpig rok ni pi profet nra rin’. Ma aram min fek e girdi’ nu Israel ni kalbus nga Assyria ni ka aram e gin ni yad bay riy.

24 Me fek fare pilung nu Assyria e girdi’ ko fapi binaw nu Babylon, Kuth, Ivvah, Hamath, ngu Sefarvaim, nge tayrad ngalan fapi binaw nu Samaria nga ron’ed luwan fapi girdi’ nu Israel ni kani kalbus nagrad u reb e nam. Miyad fek e pi binaw ney ngar pired u rom. 25 Nap’an nra pired u rom ni som’on ma dar liyorgad ngak SOMOL, ma aram me l’oeg e gamanman ni layon nge thang e fan rok boch i yad. 26 Minog ngak fare pilung nu Assyria ni fapi girdi’ ni yan i tayrad ngalan fapi binaw nu Samaria e dar nanged e motochiyel rok e got ko re nam nem, ma aram fan nike l’oeg fare got e gamanman ni layon ni be thang e fan rorad. 27 Ma aram ma ba’aray e n’en ni yog fare pilung: “Mu paged reb fapi prist ni kadfeked nib kalbus; mu paged nge sul e ngaram nge par u rom, ya nge fil ngak e girdi’ fare motochiyel rok fare got ko re nam nem.” 28 Ma aram me yan ba prist nu Israel nni chuweg u Samaria me yan nge yan i par nga Bethel, ko gin ni i fil ngak e girdi’ rogon ni ngu’un liyor ngak SOMOL.

29 Machane fapi girdi’ ni karbad ra pired nga Samaria e dar talgad i ngongliy e tirorad e liyos, mar ted e pi liyos nga langgin e fapi tagil’ e meybil nike toy yu Israel. Ra bu’ulung fapi girdi’ miyad ngongliy e liyos ni yibe meybil ngay u lan e pi binaw ni yad be par riy: 30 fapi girdi’ nu Babylon e ra ngongliyed e liyos ni yad ma meybil ngay ni ya’an fare got ni Sukkoth Benoth; ma girdi’ nu Kuth e liyos ni ya’an Nergal; ma girdi’ nu Hamath e liyos ni ya’an Ashima; 31 ma girdi’ nu Ivvah e liyos ni ya’an Nibhaz nge Tartak; ma girdi’ nu Sefarvaim e ra pi’ed pifakrad ni maligach ni mo’oruf ngak fa gali got rorad ni Adrammelek nge Anammelek. 32 Pi girdi’ ney e ku ra tedfan SOMOL ma ku ra mel’eged u fithik’rad gubin mit e girdi’ ni ngar pigpiggad ni prist ko yungi tagil’ e meybil rok e pi’in ndar nanged SOMOL ma yad be pi’ e maligach ni fan ngorad u rom. 33 Ma aram mar meybilgad ngak SOMOL, machane ku yad be meybil ngak e tirorad e got ni bod rogon yalen ko pi nam nrabad riy.

34 Mus ko daba’ ma ka yad be rin’ e pi yalen ni kakrom rorad nem. Darir meybilgad ngak SOMOL ara ra folgad ko pi motochiyel nge ni ke tay SOMOL chiylen ngak e pi’in owchen Jakob, ni tunguy fithingan ni Israel. 35 I SOMOL e ke ngongliy ba m’ag u thilrad ma ke ga’ar ngorad: “Dab mu meybilgad ngak yug boch e got; dab mu siro’gad fa mu pigpiggad ara mu pi’ed e maligach ngorad. 36 Thingar mu folgad rog, i Gag fare SOMOL, ni gu fekmed nga wuru’ yu Egypt nga feni gel gelngig nge fanag manging’; ngam siro’gad ngog mi gimed pi’ e pi maligach romed ngog. 37 Thangri gubin ngiyal’ ma gimed be fol ko pi motochiyel nge tin ku gu yoloy ni fan ngomed ni ngam rin’ed. Thingar dab mu folgad rok yug boch e got, 38 ma thingar dab mu paged talin fare m’ag ni gu ngongliy u thildad. 39 Thingar mu folgad rog, i gag fare SOMOL ni Got romed ma gu ra ayuwegmed u pa’ e pi to’ogor romed.” 40 Machane pi girdi’ nem e dar motoyilgad, ma dar talgad i ngongliy e pi yalen rorad ni kakrom.

41 Ma aram ma fapi girdi’ e ur liyorgad ngak SOMOL, ma ku yad be meybil ma yad be tayfan e pi liyos rorad ni yad ma meybil ngay; ma ke mada’ ko daba’ ma pi’in owcherad e ka yad be rin’ ni ka aray rogon.