1 U lan e duw ni ragag nge medlip ko gagiyeg ni i tay Pekah ni Pilung nu Israel ni be’ nib mo’on ni fak Remaliah, me mang Ahaz e pilung nu Judah, nib mo’on ni fak Jotham 2 ni rliw’ e duw yangren, me yog e thin u Jerusalem ni ragag nge nel’ e duw. De falwok ko ga’ rok kakrom i David ni Pilung; ya rin’ e tin nde m’agan’ SOMOL ni Got rok ngay 3 ni lek kanawo’en e pi pilung nu Israel. Mus nga ba pagel ni fak me pi’ ni maligach ni mo’oruf ngak e pi liyos, ni be yan u ya’an e n’en nib sonogor ni i ngongliy e girdi’ nike tulufrad SOMOL nga wuru’ fare nam u nap’an ni be yib piyu Israel i yib ngay. 4 I pi’ Ahaz e pi maligach mi i urfiy e incense ko yungi tagil’ e meybil u daken e yochi burey, nge tanggin gubin yang e taglul’ ko yuke gek’iy.

5 I Rezin ni Pilung nu Syria nge Pekah ni Pilung nu Israel e ra maelgow ngak yu Jerusalem ngar kolew, machane de yag ni ngar gelgow ngak Ahaz. 6 Ma ku ngiyal’nem e ki gel lungun e pilung nu Edom ko fare binaw nu Elath me tuluf e pi yu Judah ni ur pired u rom. Me par e pi Edom u Elath ke mada’ ko chiney. 7 Me l’oeg Ahaz boch e pumo’on ngranod ngak Tiglath Pileser ni ir e pilung nu Assyria, ni ba’aray e thin nnog ngak: “I gag e tapigpig rom ni gub yul’yul’. Moy ngam ayuwegneg u pa’ fa gal pilung nu Syria ngu Israel, ni yow be mael ngog.” 8 Me fek Ahaz e silber nge gol u lan fare Tempel nge chubgil u tafen e pilung, me pi’ nib tow’ath ngak fare pilung. 9 Ma fulweg rok Tiglath Pileser ko wenig rok Ahaz, e yan nge pi salthaw rok ngar maelgad ngak yu Damaskus ngar koled, miyad thang e fan rok Rezin ni Pilung, mar feked fapi girdi’ nga Kir ni yad bogi kalbus.

10 Nap’an ni yan Ahaz ni Pilung nga Damaskus ni ngar mada’gow Tiglath Pileser ni ir e pilung, me guy fare altar u rom me pi’ rogon ya’an fare altar nge yan ngak Uriah ni prist, nge rogon ntoy, nge urngin e yochi ban’en riy. 11 Ma aram me ubung Uriah ba altar nri bod ya’an fare altar nge mu’nag u m’on ni nge sul Ahaz. 12 Nap’an ni sul Ahaz u Damaskus, me guy fare altar nike m’ay, 13 ma aram me urfiy e pi gamanman ni maligach nge grain ni maligach u daken me pu’og e wayin ni maligach nge racha’ ko maligach nma gapaseg thilin Got nge girdi’ nga daken fare altar. 14 Fare altar ni bronze ni kani pi’ ngak SOMOL e bay u thilin fare altar ni kab be’ech nge fare Tempel, aram me kaneg Ahaz nga ba’ ni lel’och ko fare altar rok nib be’ech. 15 Ma aram me yog e tin nge rin’ Uriah ni ga’ar: “Mu tay e re altar rog ney nib ga’ ngu’um pi’ e maligach ni mo’oruf ni gubin e kadbul u daken nge fapi maligach ni grain ni gubin e blayal, nge fapi maligach ni mo’oruf nge maligach ni grain rok e en ni pilung nge girdi’, ma ku er rogon e maligach ni wayin rok e girdi’. Min pu’og nga daken e racha’ ko urngin e gamanman ni kani pi’ ni maligach. Machane ngan tay fare altar ni bronze ni fan ngog ni nggu fith lanyan’ Got riy.” 16 Me rin Uriah e n’en keyog fare pilung.

17 Me wereg Ahaz ni Pilung fapi cart ni bronze ni fen e maruwel u lan fare Tempel me chuweg fa yu raba’ i basin ni immoy u daken fapi cart. Miki fek fare teng nib bronze u daken keru’ ragag nge l’agruw i ya’an e garbaw ni pumo’on nib bronze nge tay nga daken ba def ni malang. 18 Miki chuweg Ahaz u lan fare Tempel fare gin’en u m’on ni tagil’ fare chiya ko pilung miki ning fare mab ni yi go’ en ni pilung e ma yan riy nga langgin fare Tempel, ni bochan e nge felan’ fare pilung nu Assyria.

19 Gubin e tin i rin’ Ahaz ni Pilung ma kani yoloy ngalan e babyor ni Chepin e Pilung nu Judah. 20 Me yim’ Ahaz min k’eyag u lan e low ko yam’ rok e Pilung u lan fare Binaw rok David, me yan Hezekiah nga luwan nib mo’on ni fak nge mang pilung.