3
Hi pisen ni xa Iesu be eilep mak mu mili avu Mosis tetiamu
1 Tuxoli e hinoxoli xil, Hi xa de ut nesao tekes xir tengan mei rimos vituei e rihe moletin eo nan xil. Ihos pupu tengan munem usil Iesu Kristo, ngan xa Hi tesila texoni eloheoh nan mi xir, e tepol texoni vatixar na pris xil e rin te neketen nar pe met Hi. ✡ Hib 4:14; 6:20; 7:26; 8:1; 9:11 2 E Iesu tepol vuol ni holesok xil vus xa Hi teling xati tengan ipol ni. Ngan ak texoni Mosis, xa “tepol vuol ni holesok xil e nim na Hi,” (Nam 12:7) xa koute teni be moletin nan xil. 3 E moletin xa pol ni nim tei, lasa merereen mini mili merereen xa lapisen ni ve nim kestang. E nggusil rin ak, momal tengan merereen xa lasa ni mi Iesu ili ngan xa latesa ni mi Mosis. 4 Be reitin xa nim xil vus, moletin tei tepol ni. E Hi, xi vari tepol ni holesok xil vus. 5 Mosis tepol sen holesok xil vus xa tehos tehusil nenemien na Hi texoni moletin te polien hos tei e nim na Hi. E tesep usil holesok xil xa ti lisep usili e melele xil xa ti imei. 6 Kristo mun tepol sen holesok xil tehusil nenemien na Hi. E xi tepol texoni Natneli xa be eilep mak mu mili Mosis e nim na Hi. E xir vari iaxa rabe nim nan ak xosxa ulixir nakan ti, e nenemien nar ixeih e holesok xil xa di raling nenesien nar di en. ✡ Kol 1:23; Hib 3:14
Selxatien tengan rinanem male ni rae Hi ti e naha xa ien bei tengan vapol ni e meulien nar
7 Bos tengan riteong ni selxatien na Ninin Eo melele xa biteni bit,
“Xosali, xosxa mulong rae Hi,
8 munanem male ni ti naxoni avu namim xil xa tetiamu di latepol ni e melele xa latekavitou ni,
e naxoni ngan ti mun xa latepol ni e uruvuol tengan lasak pisi.✡ Eks 17:7; Nam 20:2-5
9 Hi tesep usil xil tehit,
‘E rute ak, avu namim xil latehit lasak pis inou tengan lapus ti xa natete visal xil mu natnara ti visal xil,
tave ti neta xa latepus holesok xil vus xa natepol ni ni metexil huram hanutap lu (40) ngamu.
10 Tesak ni, ieok teat ngan xil vus te melele nen ak.
Vehakut, latepol ni vatixil texeih xat inou,
e latehit linakil ti suse xil xa ieok bei tengan nitel xil liha en.
11 Tesak ni, ieok teat xil e natehit xati
12 Tuxoli e hinoxoli xil, muxuxou kuhi tengan xamim kekes munahur ti nenemien xil xa misa xa nasak ni neketen namim namot e munakavitou ni Hi ti xa meul. 13 ‘Xosali’ xa latesep usili xiak di tamu be melele xa radi en taxeak. Ve rin ak, mesal da tamu tengan muhiles meulien namim. Ma, vehakut xamim kekes ti musel xat xamim mun tang tengan munamaen tesaen ti naluvos xamim e nasak ni xamim ti munanem male ni rae na Hi. 14 Vengan xosxa risoh ixeih e neketen nar ha ituxoh hoxalit meulien nar, ma ripisen ni xa di rabisti del Kristo reitin. ✡ Hib 3:6 15 Ngan ak nggoni naha xa Vanuvei Eo biteni bit,
“Xosali, xosxa mulong rae Hi,
munanem male ni ti naxoni ngan xa avu namim xil tetiamu latepol ni e melele xa latekavitou ni.” (Sam 95:7-8)✡ Hib 3:7-8
16 ?Visi xil iaxa latelong rae Hi e latekavitou ni? Tehe ngan xil vus xa lateti pe he Mosis xa Hi teleh rerat xil ra kantri te hal Isip. ✡ Nam 14:1-35 17 ?E visi iaxa Hi ien teat xil huram hanutap lu (40)? Ien teat moletin xil xa latepol tesa, ma tesak ni xil kekes latekiri e latelel e uruvuol. ✡ Nam 14:29; 1Kor 10:10 18 ?E mi visi iaxa Hi tehit xati xa linava ti e rute xa teling xati tengan liha lingel kuhi en? Tehit xati temak mi ngan xil xa latelong ras raen. ✡ Nam 14:22-23; Sam 95:11; Hib 3:11 19 Misak ni, rapusi xa xil latnava ti e rute ak vengan xa iexil ti tenavei tengan laling neketen nae en.