1 Anutu, zin wal tau titoto zaala ku som, ta tiseseeze motoŋ.

Tana mender pio mi so zin ta kembei: Nio leŋ uunu sa isaana som.

Tatke yo pa zin wal pakamkaamŋan mi wal sananŋan naman.

2 Pa nu ta Anutu tio. Tana aŋpase pu be we siiri mbolŋana pio.

Parei ta pizil ndemem pio?

Mi parei ta gedgeede koŋ koi bizin, mi tikototo yo ma tikamam pataŋana pio?

Re. Iŋgi aŋbotmbot raama leleŋ ipata kat.

3 Ur mat pio mi so yo pa sua ku ŋonoono.

Naso kam peeze pio,

mi pazal yo be aŋmiili ma aŋsala mini pa abal ku potomŋana Sion.

Pa ina nu murim kat ta tina. ✡ Mbo 25:5, 27:1; Yo 8:12; 2Kor 4:6

4 Anutu, nio leleŋ be aŋkoŋuru artaal ku mi aŋmender la kerem uunu.

Pa nu potortor leleŋ, mi kamam ma leleŋ ambai kat.

Mi nio ko aŋse kombom, mi aŋbo mboe be aŋpakuru.

Pa nu ta Anutu tio.

5 Mi parei ta iŋgi leleŋ isaana mini ma kembei?

Parei ta leleŋ ipata?

Nio aŋbotmbot ta kembei, na ambai som.

Tana ko aŋur motoŋ pa Anutu mi aŋpase pini,

mi aŋpakuri mini.

Pa ni Merere tio mi ulaaŋa tio.