1 Yooba, ni iurur mat pio, mi ni ulaaŋa tio.

Tana nio aŋmoto tomtom sa som.

Pa aŋpase pa Yooba tau. Ni ta iwe kembei siiri mbolŋana pio be aŋke lela mi aŋbot ambai.

Tana irao aŋmoto koŋ pizin na som. ✡ Mbo 118:6; Yo 8:12; Ro 8:31

2 Sombe koŋ koi bizin timaŋga pio,

mi tikamam be tipun yo ma aŋmeete,

nako titutkat kumbun, mi timelmel su toono.

3 Mi sombe malmal kan boozo timar ma tiliu yo be tipun yo,

na toŋgo! Irao aŋmoto zin na som.

Pa sombe malmal ipet mi koŋ koi bizin timaŋga pio,

na nio ko aŋpase pa Merere men tau.

4 Koroŋ tamen ŋonoono ta nio leleŋ pa ilip mi aŋso aŋwi Yooba pa.

Mi ina ta kembei: Mazwaana ta so aŋbotmbot su toono na,

leleŋ be aŋbotmbot kolouŋana pa Yooba lela urum kini leleene, mi motoŋ lala pa mbulu kini ndabokŋana mi kampeŋana kini.

Mi aŋso aŋsuŋ pini be ipazal yo mi iso yo pa zaala tabe aŋto. ✡ Mbo 11:7, 23:6

5 Sombe pataŋana sa ipet pio, na ni ko iturke yo lela muriini potomŋana bekena aŋbot ambai.

Ko iwit yo mi iur yo sala kor, mi iwe seraara mbolŋana pa koŋ koi bizin.

Tana zin ko tirao be timbuulu yo na som.

6 Ŋonoono, iŋgi koŋ koi bizin tiliu yo i.

Tamen Yooba ko iuulu yo ma aŋlip pizin.

Tana kalŋoŋ ko izalla, mi aŋpakuri raama menmeen yo,

mi aŋkam patoronŋana pini lela urum kini.

7 O Yooba, iŋgi aŋtaŋroro u. Leŋ tiŋiizi tio ti.

Pa nio mbesooŋo ku tau. Tana lelem isaana pio, mi uulu yo.

8 Nio leleŋ pu mi aŋso aŋute katu mi mbulu ku.

Tana iŋgi aŋkam kinkiini be aŋute u mi aŋbot kolouŋana pu.

9 Yooba, nio mbesooŋo ku.

Tana ketem malmal pio pepe, mi piŋgis motom pio pepe.

Anutu, nu tuŋ ŋonoono. Ta muŋgu mi imar na, nu uluulu yo.

Tana ziiri yo pepe, mi pizil ndemem pio pepe.

10 Sombe tamaŋ ma anaŋ tipizil ndemen pio,

na Yooba itunu ko ikam yo mi mataana pio.

11 Yooba, paute yo pa zaala ku.

Muuŋgu pio mi so yo pa zaala ku ndeeŋeŋana.

Pa iŋgi koŋ koi bizin tirre yo, mi titirtiiri mbulu tio. ✡ Kam 33:13; Mbo 25:4+

12 Mi tiŋgalŋgal sua pakaamŋana pio,

mi tikamam sua pamotoŋana pio.

Tana zem yo la naman pepe! ✡ Mt 26:59+; Ŋgo 6:13

13 Mi nio aŋurla kat ta kembei:

Kampeŋana ki Yooba ko imbotmbot se tio ta kembei ma irao swoŋ.

14 Tana pase pa Yooba mi ur motom pini.

Moto pepe. Mender mbolŋana mi zza i.

Pa ni ko iuulu u. ✡ Mbo 31:24, 62:5+; Ep 6:10