1 Sandee gii dokonya enda dutupa yongama wamba sakatatala welepi opale tunduma pipaepi mendapua wamba depa lanya seteamino dupa mandyuu malu dokonya peami-pyaa. 2 Pupala kandeaminopa kana doko nyoo kapya latae sia-pyaa. 3 Dokopa enda dokaitame malu dokonya kolandatala Kamongo Jisasa kutiaminopa nasia-pyaa. 4 Dopa* Lu 9:29; Ap 1:10-11 piamosa enda dupame mona etete longo lao masoo kateaminopa akali lapoma yonge pee kyoo lao polepole pipae pingi mendalapo nyakama kateami dosa ipao kalyuu piambi-pyaa. 5 Dokopa* Lu 9:22 enda dupame paka kayapala yuu kandanatae siaminopa, akali dolapome dokaita lamaiyoo, “Nyakame aipuma akali saka katenge doko endakali kumapae setenge panda dakenya kutilyamipi? 6-7 [Baa* Mt 16:21; 17:22-23; 20:18-19; Mk 8:31; 9:31; 10:33-34; Lu 9:22; 13:32-33; 18:31-32 sakatalamo. Dakenya nasilyamo.] Wamba baa Galili kateamo gii dokopa baame nyakama langyoo, ‘Akali mendeme Endakalinya Ikiningi doko endakali koo pingi dupa laitaka pitamopa dupame baa ita pokonya pyao yukuotami. Dopa petataminopa, baa kumapala koto teponya sakatatana,’ leamo doko masalapa,” leambi-pyaa.

8 Dopa lateambinopa enda dokaitame pii wamba Jisasame leamo dupa masiami-pyaa. 9-11 Masetala* Mk 16:1; Lu 8:2-3; Jo 20:1-2* Mt 8:10 Makatala tange enda Matia dokopi, enda Joana lenge dokopi, Jemesa endangi Matia dokopi, dee enda waka mendatupa nyakama-pipa kateamino dupapi dupame malu doko yakinatala pilyoo ipupala kandeamino dupapi siamino dupapi dutupa pitaka akali kingi ita mende-kisa dee mendai dutupapi endakali wakapi dupa lamaiyami-pyaa. Enda dutupame aposele dutupa pii lamaitiaminoaka doko, dokaitame sepala mee pii kyakao lelyaminona latala kiningina lao masala nayami-pyaa. 12 [Dopaka doko, Pitame sakatala alo pyao pupala malu dokonya pongatala elyo pyao kandeamopa wamba Jisasanya yonge doko lapalapame ambo pyatae doko iki mee kakopae siamo kandea-pyaa. Kandatala andaka pilyoo pao pituu piamo doko lao moname longo lao masoo pea-pyaa.]

13 Gii dokopaka akali dupanya lapoma yuu taono yakane Emeasa lenge dokonya paanya peambi-pyaa. Yuu taono Emeasa doko Jetusaleme tengesale kilomita kingi ita-kisa dee lapoma joo singi-pyaa. 14 Akali dolapome kaitinisa pao pituu piamo dupanya lao laloo pyoo peambi-pyaa. 15 Dokopa* Mt 18:20 Jisasame akali dolapo watanyetala awapa peami-pyaa. 16 Peaminopa* Lu 24:31; Jo 20:14,20; 21:4 mendita mendeme akali dolaponya lenge nyiamosa doko Jisasa lamona lao nakandeambi-pyaa. 17 Dokopa baame dolapo pisoo, “Nyilyambome aki pii mende laloo pyoo pelyambipi?” lea-pyaa. Dopa leamopa akali dolapome katapala mona kenda kayao enomba kumiambi-pyaa.

18 Dopa petala akali dolaponya mende kenge Kiliopasa lenge dokome baanya pii yanu pyao, “Endakali Jetusaleme katenge dupa pitakame kuaka alembopi gii dupanya pipumu dupa kandao soo katapumana emba iki nasipipi?” lea-pyaa. 19 Dopa* Mt 2:23; 16:14; 21:11; Lu 7:16; 13:33; Ap 2:22; 3:22 lateamopa baame akali dolapo pisoo, “Dupa aki mendapuape?” lea-pyaa. Dokopa akali dolapome pii yanu pyakamaiyoo, “Akali Nasatete tange Jisasa lenge doko-kisa pipumu dupa lao lelyambano. Baame kalai pupu lapaepi pii pupu lapaepi dupa endakali pitakanya lengelyaapipi Gotenya lengelyaapipi dupanya panao pyoo katea. Baa akali potopesa mende lamo. 20-21 Kini,* Lu 1:54,68; 2:38; 19:11; Ap 1:6 wambao naima Isataele dupa baame pyoo nyala epeana lao masoo kateama. Dopaka doko, naimanya isingi akalipi pitisa mupapi dupame kapomaneme baa kosimi latala pyao kumasina lao maiyami. Maitiaminopa dupame baa ita pokonya pyao yukuoteaminopa, indupa koto tepo jilyamo. 22-23 Indupa* Lu 24:1-11 naima tata dokonya enda mendatupame yongama wamba Jisasa malu dokonya kanja pupala Jisasa kutao kayapala pilyoo ipao pii dapa lao naima mona sakatasalamino: ‘Goteme enjele mendalapo panasimosa naima kanjemano. Enjele dolapome, “Baa saka kalyamona,” lambino,’ lao enda dupame naima mona sakatasalamino. 24 Dokopa* Jo 20:3-10 naimanya akali mendatupame malu dokonya kanja pupimino doko enda dutupame pii wamba lamino mendai dokoaka kandatala baa kanja nayalamini lamona,” leambi-pyaa.

25 Dokopa Jisasame akali dolapo lamaiyoo, “Nyilyambo akali mona napalenge joo kalyambino. Wamba potopesa dupame pii leamino dupa pitaka yapa kiningina lao masala naenge nyilyambo mona kandanatae lamo. 26 Kataisa* Lu 9:22; 18:31; 24:44; Ap 3:24; 1 Pi 1:11 dokome tanda nyiamo dutupa etete nanyina kayapenge jiape? Dee baanya kenge andake etete nanyina kayapengeakape?” lea-pyaa. 27 Dopa* Dit 18:15; Wee 22:1-21; Ais 53:1-12; Lu 16:29,31; Jo 13:31; Ap 3:13 latala baame baa tange kandao Mosese mauwapi potopesa dupa pitakapimi pii pepa pyanya seteamino dupa pitakanya tenge dupa akali dolapo lamaiya-pyaa.

28 Kaitini* Mk 6:48 pao akali dolapo paanya peambino yuu Emeasa lenge dokonya tengesa pyakameaminopa Jisasa baa waka mendasa paanya pele lao pea-pyaa. 29 Dopa piamopa akali dolapome Jisasa minanjoo, “Yuu kualanya niki landa pyatelyamona, emba nalimba-pipa palimana kaya,” leambi-pyaa. Dopa leambinopa baa akali dolapo-pipa palimana lao andaka kolandea-pyaa. 30 Kolandatala* Lu 9:16; 22:19 dolapo-pipa nee nalanya petenge toko dokonya pituu, Jisasame betesa mende nyepala Gote embame yaka pilino lao loma setala konjia-pyaa. Konjepala akali dolapo maiya-pyaa. 31 Dokopa* Lu 24:16; Ap 8:39 akali dolaponya lenge tii peteamopa baa Jisasa lamo lao kandeambi-pyaa. Dokopa baa dolaponya enombasa alu pia-pyaa. 32 Alu peteamopa nyilyambolapo lao pituu, “Naima kaita ipumanopa baame pii mendapua pepa pyapae singi dokonya lao tenge dupa nalimba langyomo dokopa nalimbanya mona etete yangalyalamona,” leambi-pyaa.

33 Dopa latala nyalambo yapa sakatao Jetusaleme pilyetala, akali kingi ita-kisa dee mendai dutupapi dee disaipele mendatupa awapa kambu pyao peteamino dupapi dutupa kandeambi-pyaa. 34 Dokopa* 1 Ko 15:4-5 dokaitame akali dolapo lamaiyoo, “Kamongo doko kiningi etete sakatalame lamo. Saimoneme baa kandatalame lamona,” leami-pyaa. 35 Dopa leaminopa dolapo kaitinisa peambinopa opale piamo dupapi dee baame betesa mende konjiamopa nyilyambome Jisasa lamo lao masiambino dokopi dupa dokaita lamaiyambi-pyaa.

36 Akali* Ap 10:40-41; 1 Ko 15:5* Jo 21:5,9-13 dolapome pii dokonya lao lamaiyoo peteambinopa Jisasa nyakamanya kainanya ipao katapala, “Nyakama mona lyuu lao pilyepapena!” lamaiya-pyaa. 37 Dokopa* Mt 14:26 dokaitame baa kandatala timango mende lamo lao masetala pakame kumiami-pyaa. 38 Dopa piaminoaka doko, baame dokaita lamaiyoo, “Nyakama aipuma pakame kumao namba kiningi Jisasana lao masala naelyamipi? 39 Nyakamame* 1 Jo 1:1 nambanya kingi mokopi dupa kandalapa! Nambaka kalyo! Nyakamame namba kingimi minasoo kandalapa! Namba timango pili kandao doko, yongepi kulipi nambanya palipumopa kandelyamino dopale napalipyalina,” lea-pyaa. 40 Dopa latala baame baanya kingi mokopi dupa dokaitame minasoo kandena lao laitaka pia-pyaa. 41 Dokaitame* Lu 1:14; Jo 21:5 kandatala mona etete yaepao tama piamino dokome baa kiningina lao masala nayaminosa baame dokaita pisoo, “Nee mendapua silyape?” lea-pyaa. 42-43 Dopa* Jo 21:9-10,13 leamopa dokaitame wapaka yangapae mende baa maiyaminopa, baame nyoo neamo kandeami-pyaa.

44 Dee* Lu 9:22; 24:25-27; Ap 28:23 baame dokaita lamaiyoo, “Wamba namba nyakama-pipa awapa katao langioli pyoo Mosesenya piipi, potopesa dupanya piipi, Losuu Wee dupanyapi dupanya nambanya lao pii pepa pyao setamino dupa pitaka kiningi etete jiana,” lea-pyaa. 45 Dopa latala pii wambatae pepanya pyapae singi tenge dupa masina lao baame dokaita masingi sakatasakamaiya-pyaa. 46 Dopa* Osi 6:2; Ap 10:40; 1 Ko 15:3-4 petala baame dokaita lamaiyoo, “Pepa pyapae dokome Kataisa kandao: ‘Baa tanda nao kumapala koto tepo dokonya malunya sakatata. 47 Dee* Mt 28:19-20; Mk 16:15-16; Lu 2:38; Ap 1:4-8; 10:40; 1 Ti 3:16 endakalimi Jetusaleme dakenya katao kalai doko tee pyao petala Kataisa dokonya kenge doko minao endakali tata waka dupa pitaka kandao, “Goteme nyakamanya koo dupa kunanya nepakenalena mona kapilyalapa,” lao pii lamaitami.’ 48 Nyakamame* Jo 15:27; Ap 1:8 dutupa kandatala panao lamaipenge akali joo kalyamino. 49 Dopana,* Jo 14:16,26; 16:7; Ap 1:4; 2:1-4 nambanya Takangeme epe mende nyakama ditona leamo doko nambame nyakama dina lelyo. Ketae kaitinya katenge dokome nyakama pupu lasetamo gii doko nyakamame yuu taono dakenya malisoo kalyepape,” lea-pyaa.

50 Maitakao Jisasame Jetusaleme yuu doko yakinatala dokaita laminao pao yuu taono Betani dokonya tuu latala dokaita-kisa baanya kingi pee latae katao Goteme dokaita nisina lao loma sia-pyaa. 51 Dopa* Mk 16:19; Lu 9:51 lao katao dokaita yakinatala kuki umbisale pateamopa Goteme baa kaiti-kisa lanyia-pyaa. 52 Dokopa* Jo 14:28; 16:22* Ap 1:12-14 dokaitame baa lao tama petala pilyoo Jetusaleme pao pituu mona etete yaepao peami-pyaa. 53 Pupala Jetusaleme losuu anda andake dokonyaka katao Gote lalyoo kateami-pyaa.