Filemombaa Tere
Poolnoŋ Filemombaa Tere ano.
Jeŋ-asa-asari
Eja qabuŋayawo Filemon ii Kolosi sitinoŋ laligoŋ uuta meleema zioz gawoŋ meŋ weleŋqeqeya qata Onesimus galeŋ kono kileŋ kok koma Room sitinoŋ keno. Kanoŋ kema Poolwo metulaŋgoŋ qaaya moma uuta meleema Poolwo Buŋa gawoŋ meri kapuare mirinoŋ orooŋgi rari. Onesimuswaa kambaŋa qaono Poolnoŋ Tere koi Filemombaajoŋ ooŋ Onesimuswaa boronoŋ ama wasiro Kolosi eleeno. Tere kokanoŋ uuta meleenoti, iikawaa bujuya isaama Filemombaa uuta ii kokaeŋ kuuro: “Gii mono weleŋqeqegaa qinjita mesaoŋ iwo uumotooŋ ama koma horoŋ muna uumeleeŋ alaga kaaŋa kooroŋganoŋ nano iwaajoŋ aisooŋ laligowa.”
Buk kokawaa bakaya waŋa 4 ii kokaeŋ:
Qaa mutuya 1-3
Poolnoŋ Filemon mepeseeja 4-7
Onesimuswaajoŋ Filemombaa uuta kuuro 8-22
Terewaa qaa kota waŋa 23-25
1
1 Oo wombo alana ano neŋana Filemon. Pool niinoŋ Jiisas Kraistwaa gawoŋa meŋkejeŋiwaajoŋ ama gbadooŋ noŋgi kapuare mirinoŋ rajeŋ. Uumeleeŋ alana Timoti iinoŋ niwo raro niinoŋ giwo qaa amiŋ mobojoŋ tere koi oojeŋ.
2 * Kol 4.17Kaaŋagadeeŋ emba somata uumeleeŋ naaŋnana Apia ano Arkipus uumeleembaa manjaqeqe ejanana ano uumeleeŋ kanageso goo mirinoŋ ajorooŋkejuti, niinoŋ oŋoojoŋ tere koi oojeŋ.
3 Anutu Maŋnana ano Poŋ Jiisas Kraist yoronoŋ mono kaleŋmoriaŋ oŋoni luaenoŋ laligowu.
Filemombaa uukaleŋaajoŋ Poŋ mepeseeja.
4 Niinoŋ kambaŋ so qama kooliŋ gii romoŋgoŋ gomakejeŋiwaa so Anutuna daŋgiseŋ kokaembaajoŋ jeŋ muŋkejeŋ: 5 Gii Poŋ Jiisas moma laariŋ jopagoŋ muŋ Anutuwaa ejemba soraaya kuuya jopagoŋ uukaleŋ oŋoma laligojaŋ.
6 Daŋgiseŋ jeŋ kokaeŋ qama kooliŋkejeŋ: Momalaariganoŋ mono kotiiŋ powowoŋ kolooro saanoŋ kooronananoŋ nama nonowo momalaariwaa qaaya jeŋ seiŋ laligowaga. Kaeŋ Kraistwo qokotaaŋ naniŋ kaleŋ awaa awaa nonomakeji, gii mono iikawaa kania korebore moma sorogowaga. 7 Oo uumeleeŋ alana, gii ejemba soraaya keraqeeaŋgo qeŋ oŋona afaaŋgoŋ laligoju. Niinoŋ uujopaga iikawaajoŋ ama mamaga aisoowe iikanoŋ noo uuna naŋgoŋkeja.
Filemonoŋ Onesimus koma horowaatiwaajoŋ qisija.
8 Giinoŋ kaeŋ laligoŋ Kraistwo qokotaari saanoŋ awasaŋkaka kolooŋ ku-usuŋ qaganoŋ nama iwoi ambaatiwaajoŋ jeŋ kotoŋ gombenaga. 9 Ii kileŋ Anutunoŋ uutanoŋ jopagoŋ noronjiwaajoŋ ama saanoŋ jeŋkootona mesaoŋ qisiŋ welema gonjeŋ. Gii Pool noo silina mojaŋ. Niinoŋ eja waŋa koloojeŋ ano Kraist Jiisaswaa gawombaajoŋ ama kambaŋ kokaamba kapuare ejaga kaaŋagadeeŋ koloojeŋ.
10 * Kol 4.9Nii kapuare miri kokanoŋ alaga qata Onesimus aitoŋgoŋ ilaaŋ mube uuta meleema momalaariwaa merana kolooro. Kawaajoŋ kete iwaa je meŋ iwaajoŋ ama qisiŋ welema gonjeŋ. 11 Iinoŋ wala weleŋ qeŋ laŋ mondoŋ injarere laligoŋ qemasologeŋ ama goma laligoroto, kambaŋ kokaamba letoma gii ano nii awaagadeeŋ ilaaŋ norono gawoŋaa hoŋanoŋ asugiŋkebaatiwaa so kolooja.
12 Iinoŋ neenaa wombo merana kolooja ano neenaa wombona kaaŋa wasiŋ mube eleema goonoŋ kaja. 13 Niinoŋ Oligaa Buŋawaajoŋ ama kapuare mirinoŋ rajeŋ. Kawaajoŋ Onesimus somoŋgowe niwo laligoŋ goo kitiga ilaaŋ nombaatiwaajoŋ mojeŋ. 14 Kaeŋ mojento, ilaaŋ nombaatiwaajoŋ mende kuuŋ gonjeŋ. Siiŋganoŋ jero ilaaŋ nona sokonagato, giinoŋ weleŋqeqega nombaga me aŋgoŋ kombagati, iikawaajoŋ “Ooŋ!” mende jena neenodeeŋ somoŋgoŋ mumambaajoŋ amamaajeŋ.
15 Onesimusnoŋ kokaembaajoŋ ama gomesaoromaeŋ? Iinoŋ kambaŋ torodaamoŋ seleeŋgeŋ laligoŋ mombo eleema kaŋ giwo kambaŋ tetegoya qaa laligowaa. 16 Wala weleŋqeqe omaya kolooŋ laligoroto, kambaŋ kokaamba ii uuguŋ eja qaita moŋ kolooja. Uuta meleema mono wombo alanaraga kolooja. Niinoŋ iwaajoŋ siiŋ mamaga mobe giinoŋ eja ii iina Pombaa buŋa kolooro iwaajoŋ nii nuuguŋ siiŋ honoŋa qaa momakebaga.
17 Giinoŋ niwo ala-ala ama laligojotiwaajoŋ niinoŋ kawe koma horoŋ nonagati eeŋ, mono Onesimusnoŋ karo iikaaŋa koma horoŋ muba. 18 Iwoi moŋ ama boliŋ gono me iwaanoŋ tosa moŋ goonoŋ eji eeŋ, ii mono noo tosaga jena ewa. 19 Nii Pool neenaa boronanoŋ kokaeŋ oojeŋ, “Niinoŋ ii metogomaŋa.” Niinoŋ ilaaŋ gombe uuga meleena tosaga somata ii kumbaatiwaajoŋ geeŋga kaaŋiadeeŋ noo buŋa jeŋ tegoŋ aona sokonaga. Kawaajoŋ saanoŋ kokaeŋ jewenaga: Onesimuswaanoŋ tosa ii mono jena geeŋgaa tosaga ewa. 20 Oo uumeleeŋ alana, Pombaa Buŋa gombeti, ii mono meleema ilaaŋ nombagatiwaa siiŋa mojeŋ. Kraistwo qokotaajaŋi, iikawaa so mono Onesimus koma horona noo uunanoŋ afaaŋgoŋ qeaŋgowaa.
21 Qaana teŋ kombagati, ii moma laariŋ qaana ooŋ goo kaniaga kokaeŋ ero mojeŋ: Qaa jejeŋi, ii mono uuguŋ awaa soro ama sororogowaga. Kiaŋ. 22 Qaa moŋ koi: Oŋonoŋ qama kooligi Poŋnoŋ nii wasiŋ meleema nono oŋoonoŋ kamambaajoŋ mamboma jejeromoŋromoŋ anjeŋ. Kawaajoŋ mono miri uuta moŋ noojoŋ mojoqojojoŋgona raba.
Yeizozo ano kotumotue qaa tetegoya
23 * Kol 1.7; 4.12Alana Epafras iinoŋ Jiisas Kraistwaa gawombaajoŋ ama niwo kapuare mirinoŋ rama yeizozoya ano goonoŋ kaja. 24 * Apo 12.12, 25; 13.13; 15.37-39; 19.29; 27.2; Kol 4.10, 14; 2 Tim 4.10-11Neŋauruna gawoŋ motooŋ meŋkejoŋi Maak, Aristarkus, Deemas ano Luuk yoŋonoŋ kaaŋagadeeŋ yeizozogia aŋgi goonoŋ kaja.
25 Poŋ Jiisas Kraistwaa kaleŋmorianoŋ mono uŋagia kotuegoŋ oŋowo ewa. Kiaŋ.