8
Iesu pisen esaeen mi atou xa tepol tesa tetel moletin tei* E rut vanuvei matu xil te Sion, tumulen te Sion 8:1-11 tovuol en.
1 Iesu be Vathu te Urvatiei te Olip del moletin nan xil e laba lapat en.✡ Luk 21:37 2 Ut milan, Iesu dilomun be Serusalem e ba be vioh te Nim Eo. Moletin xil holu lamei visali e lakapis xole. Ma, Iesu dotan e pispisi mi xil.✡ Mat 26:55 3 Melele xa di tamu pispisi, titsa xil te rae na Mosis del Farasi xil ladiamu ni atou tei xa latekameti di pat tetel tiramue tei xa tave tiramue nan xati ti. Ma ladel atou ak ba misoh pe met moletin xil. 4 Di, labiteni mi Iesu labit, “Titsa, atou ak, melele xa lakameti, xi dit pat del tiramue tei xa tave tiramue nan xati ti. 5 Rae na Mosis biteni xa rihov vin hisit atou xil xa lamak. ?E xouk, uhit naha?”✡ Lev 20:10; Dut 22:22 6 Xil lasis Iesu mak tengan vasak pisi e rin te sepinien nan tengan xos isa sepinien tova xa imaen xil ha lital xati ven.† Lanemi xa isa mesal mi xil tengan lital xati vengan xa xosxa Iesu ihit, “Ristokovein atou ak iha,” ma ita xoteh rae na Mosis. E xosxa ihit, “Momal tengan rihov vini,” ma ita xoteh rae na kavmen te hal Rom xa tamaen Siu xil ti tengan lavas vin moletin. ✡ Mat 22:15
E Iesu mitingeiril, e midis neta tei e tan ni vakuhen. 7 E xil dit lasi petinen tengan isa nenemien nan mi xil usil rin ak. Ma, Iesu mea misoh e biteni mi xil bit, “Visi e xamim xa tapol ni ti tesaen, xi vari iaxa ihov kokot ni.”✡ Dut 17:7 8 Di, mitingeiril mun e midis neta teimun e tan.
9 Melele xa titsa xil te rae na Mosis del Farasi xil lalonge mak, xil kekes labaha. Ngan xil xa lamatu ladiamu, di, tesav xil mun laba ba vuma … Iesu tasen tang da, e atou ak di tamu misoh pe meten.✡ Mat 22:22 10 Di, Iesu mea misoh e biteni mini bit, “?Atou, moletin xil laba xave? ?Midep? ?Ti xil tara ti ak tengan vahit umat ve tesaen nam?”
11 Atou bit rilomun ni mini bit, “Suv moletin tovuol.”
Ma Iesu biteni mini bit, “E inou mun ninavit neta ti nava xat rin nam. E utilomun uhe tim, e xosali iha, onapol ti mun nasa.”✡ Sion 5:14
Vat na Siu xil latake reitin ti e sepinien na Iesu melele xa bit rati xa xi be miehen na Hi mi moletin xil te ut etan
12 Melele xa Iesu di tamu e vioh te Nim Eo, misepin rilomun mi moletin xil bit, “Inou nabe miehen xa di mileluv e meulien na moletin xil te ut etan. E moletin xa di nggusil nou nakakao ti e maluxoluken, vengan xa miehen navan xa iti en ileluv kuh suse te meulien mini.”‡ E melengien eo kor te Wik te Horao ak, pris xil labe vioh te Nim Eo e lasahan laet xa mahulong xa kandel xil holu ladi en. Xos Iesu di bit lelen ni xa laet ak nggoni vole tei usil xi xa be miehen na Hi mi moletin xil te ut etan. ✡ Aes 49:6; Sion 1:4,5,9; 9:5; 12:46
13 Farasi xil xa lalong sepinien nan labiteni mini labit, “Xouk di obit rat sepinien xil ak e rin nam tasom tang. Misak ni, xamem masakras make reitin e sepinien nam.”✡ Sion 5:31
14 Iesu bit rilomun ni bit, “Reitin xa di nabit rat holesok xil holu e rin navan. E naha xa di nabit rati be reitin vengan xa nakil rute xa natexo en, e nakil rute xa niha en. E xamim mutakil ti rute xa natexo en mu rute xa niha en.✡ Sion 13:3; 16:28; 7:28; 9:29 15 Melele xa mulepis rin navan, munggusil nenemien na moletin xil te ut etan tang. E inou, di natalepis rin na moletin xil ti.✡ 1Saml 16:7; Sion 7:24; 12:47 16 E vahit ieok bei tengan nilepis rin na moletin tei, naha xa nihiteni ihe reitin. Vengan xa tave inou tasok ti xa nipol ni, e inou xamel Tata navan xa misil inou namei malilepis vituei ni rin ak.✡ Sion 5:30; 5:37; 8:29 17 E rae xil na Mosis xa xamim vari di munggusil xati biteni xa melele xa sepinien na moletin lu usil neta tei lupin, moletin xil likila like reitin xa naha xa lubiteni be reitin.✡ Dut 17:6; 19:15 18 Mak, ma inou nasepin e rin navan, e Tata navan xa misil inou namei, xi mun di misepin e rin navan.”✡ 1Sion 5:9
19 Ma, xil lasisi labit, “?Xosxa mak, tata nam da xave?”✡ Sion 16:3; 14:7
Iesu bit rilomun ni bit, “Xamim mutakil ti nou e mutakil ti Tata navan mun. Vengan, xosxa mukil inou, ma mukila mukil Tata navan mun.”
20 Melele xa Iesu bit holesok xil ak, de vioh te Nim Eo, sangas visal rute xa laling kuh mani te Nim Eo di en. E tave ti neta xa rute ak de sangas ni rute xa vat na Siu xil ladi vituei en, moletin tovuol vatal xati. Latatal xati ti vengan xa melele nan xati tamei ti mu.✡ Sion 7:30
Iesu bit usil maten nan
21 Di, Iesu bit rilomun ni mi titsa xil te rae na Mosis e Farasi xil bit, “Inou nihe reling xamim e, neta sav musak pisi tengan mulang ni nou, munakamet nou ti. Xamim muxulehi mupol ni tesaen e muhur huite teni e von maten tang. Mak, ma xamim musakras muve rute xa inou niha en.”✡ Sion 7:34,36; 13:33
22 Vat xil na Siu xil latakil ti koute te sepinien na Iesu. Ma, lasepin mi xil mun tang labit, “?Veneh ma xi biteni xa xir rasakras rave rute xa xi iha en? ?Itep? ?Ihas vin tasen ni xi tang?”✡ Sion 7:35
23 Iesu bit rilomun ni bit, “Xamim mube te ut etan ak tang. E inou, nabe te ut nesao. Xamim mube moletin xil te ut etan, e inou natave te ut etan ti.✡ Sion 3:31; 17:14 24 Mak, ma nabiteni xa xamim muhur huit tesaen namim xil e von maten tang. Vengan xa xosxa munake reitin ti en xa inou nabe xi,§ Vahit sepinien ak vahe, “inou NABE” (Eks 3:14) xa be his xati na Hi. Ve merereen nae, moletin xil latekes Hi ni ‘Iahova’ xa koute teni be Suv. reitin xa mumat itel xat tesaen namim xil.”✡ Sion 13:19
25 Xil latemanin ni sepinien nan e labit, “?Xouk obe visi vari?”
E Iesu bit rilomun ni bit, “Tetiamu mei duxol xosali, di nabit lelen ni mi xamim xa nabe visi. 26 Inou nikila nihit rat neta holu xa misa iha xat rin namim. E di nabit lelen ni mi moletin xil te ut etan naha xa Tata biteni minou vengan xa nakila xa ngan xa tesil nou namei be reitin.”✡ Sion 7:28; 12:49
27 Melele xa Iesu di bit usil Tata nan, xil latakil ti xa Iesu di bit usil Tata nan xa de ut nesao. 28 Mak, ma Iesu biteni mi xil bit, “Melele xa mupo rat Nat Moletin ihe nesao,✡ Nam 21:9; Sion 3:14; 12:32 mupus kila xa inou nabe xi.* Vahit sepinien ak vahe, “inou NABE” (Eks 3:14) xa be his xati na Hi. Ve merereen nae, moletin xil latekes Hi ni ‘Iahova’ xa koute teni be Suv. E melele nen ak mukila sung xa natapol ni ti neta vahusil nenemien navan tasok. E di nabit naha kestang xa Tata navan di pispisi minou.✡ Sion 5:19 29 E ngan xa misil nou namei, xi di minou e tastokovein nou ti. Vengan xa, vehakut, di napol kes ni neta xa xi besi xi ven.”✡ Sion 8:16; 16:32 30 Melele xa Iesu bit holesok xil ak, moletin xil holu lake reitin en xa xi be Mesaea na Hi reitin.✡ Sion 2:23; 7:31; 10:42; 11:45; 12:11,42
Iesu bit kila xa ngan xil xa lalong xat pispisien nan xil labe moletin nan xil reitin
31 Di, Iesu pusi xa rut Siu xil lake reitin en, ma biteni mi xil bit, “Xosxa muxulehi ni ngan taxa ti mulong xat pispisien navan xil, ma mupisen ni xa xamim mube moletin navan xil reitin.✡ Sion 15:7 32 Mukil naha xa be reitin, e reitinen ak isak ni xamim mei mumeluv reitin.”
33 E xil labit, “Xamem mabe vatimol na Ebraham, e matave slev na moletin ti vatova.† Sepinien nae tave reitin ti vengan xa mol‑Isrel xil ladi pe he kavmen te hal Rom. E, e histri nae, lateti pe he mol‑Isip xil, mol‑Babilon xil, mol‑Siria xil, mol‑Kris xil, e pe he moletin savsav xil mun. ?Mak, ma veneh vari obiteni xa xamem mei mumeluv reitin?”✡ Mat 3:9; Luk 3:8; Sion 8:39,56; Neh 9:36
34 Iesu biteni mi xil bit, “Reitin li nabiteni mi xamim xa moletin xil vus xa di lapol ni tesaen labe slev xil teni.✡ Rom 6:16,20; 2Pit 2:19 35 E slev tei, voninen tovuol e vatimol xati na masta nan. E nat masta ak, voninen xati e vatimol nan da vehakut.✡ Eks 21:2; Dut 15:12 36 Mak, ma xosxa Nat Hi pol ni xouk mei omeluv, ma omeluv reitin. 37 Nakila xa xamim mube vatimol xil na Ebraham. E neta sav xa mak, di musak pisi tengan mulang ni suse xa muvas vin inou vaxo en. E iemim bei tengan muvas vin inou vengan xa ut tovuol e tinemim tengan sepinien navan vaha vata en.✡ Sion 5:18; 7:19,25 38 Inou di nabit mesen naha xa natepusi e melele xa natete visal Tata navan. E xamim, ihos xa ti mupol ni naha xa Tata di biteni mi xamim tengan ti mupol ni.”
39 Xil labit rilomun ni labit, “Tata namem Ebraham.”✡ Mat 3:9; Sion 8:33
E Iesu biteni bit, “Xosxa xamim mube horamue xil na Ebraham reitin, ma sexien namim xil ixoni sexien nan xil. 40 Inou nabit mesen ni mi xamim reitinen xa Hi biteni minou. E xamim, musak tengan muvas vin inou. Ngan ak tave sexien xil na Ebraham ti. 41 E‑e. Sexien xil namim nggoni sexien xil na tata namim xati.”✡ Dut 32:6; Aes 63:16; 64:8
E xil labiteni labit, “!Ei! !Tave xamem ti iaxa mabe horamue xil te suse! Tata namem tei takes, xi be Hi vari.”
42 Iesu biteni mi xil bit, “Xosxa be reitin xa Hi be Tata namim, eheien namim vati e nou. Vengan xa inou natexo visal Hi, e xosali nade visal xamim inggak. Natamei ti vahusil nenemien navan, e Hi iaxa tesil inou namei.✡ 1Sion 5:1; Sion 13:3; 16:28; 17:8; 7:28; 17:8 43 E nakila veneh ma xamim musakras mulong kil naha xa nabiteni. Vengan xa iemim ti tavei mukil sepinien navan xil. 44 Tata namim be Temat vari e iemim bei tengan mupol ni naha xa xi ien bei xamim tengan mupol ni. Vengan xa xi misak ni moletin xil labas vin moletin sav xil e melengien xil tetiamu mei duxol xosali. Xi tara ti e rin te reitinen, vengan reitinen tovuol en. Melele xa miluvos, di misa sepinien nan xati, vengan xa xi be vat luvosen, e be tata na ngan xil xa di laluvos.✡ 1Sion 3:8; Sen 3:4 45 Mak, ma vengan naha xa inou nabiteni mi xamim be reitin, xamim mutake reitin e nou ti. 46 ?Visi e xamim mikila vahit rat naha xa inou di napol ni xa misa? Tovuol e xamim mukila vapol ni. ?Ma xosxa di nabit naha xa be reitin, veneh vari mutake reitin ti e sepinien navan xil?✡ 2Kor 5:21; 1Pit 2:22; 1Sion 3:5 47 Ngan xil xa labe horamue xil na Hi di lalong kil sepinien nan xil. E xamim mutave horamue xil na Hi ti, ma mutalong kil ti.”✡ 1Sion 4:6; Sion 18:37
48 Ma Siu xil lasepsisil Iesu labit, “!Ei! Mabiteni reitin melele xa mabit osa tova tang e onggoni ngan Sameria tei e temat tei de xouk.”✡ Sion 4:9; Mak 3:21-22; Sion 7:20
49 E Iesu bit rilomun ni mi xil bit, “Temat tovuol e nou. Inou namerere ni Tata navan, e xamim mutamerere ni nou ti. 50 Natasak pis ti tengan napet rat hisok vahe nesao. E tei da xa ien bei tengan vapet rat hisok, e xi iaxa ilepis rin namim.✡ Sion 5:41 51 Reitin li nabiteni mi xamim xa ngan xil xa lalong xat pispisien navan xil linapus ti maten vatova.”✡ Sion 5:24
52 Vat na Siu xil labiteni mini labit, “Taxeak makil kuhi sung xa temat tei de xouk. Vengan Ebraham temat, e provet xil na Hi mun latelel. E xouk di obiteni xa ngan xil xa lalong xat pispisien nam xil linapus ti maten vatova.✡ Mak 9:1 53 ?Midep? ?Di obiteni xa xouk obe eilep mak mu mili avu Ebraham tetiamu xa temat? ?E midep e rin te provet xil? ?Di obiteni xa xouk obe eilep mak mu mili xil, vengan xil mun lalel? ?Di obiteni xa xouk obe visi vari?”✡ Sion 4:12
54 Iesu bit rilomun ni bit, “Xosxa inou di napet rat tasok ni hisok, his ak be neta sav tang. E be Tata navan xa di pet rat hisok. Tata navan be ngan xa xamim mubit be Hi namim, 55 e mutakil ti xi vari. E inou nakila, e nasakras naluvos namit natakil ti. Vengan xosxa vamak, name vat luvosen vaxoni xamim tang. Reitin, inou nakil xi, e di nalong xat sepinien nan xil.✡ Mat 11:27; Luk 10:22; Sion 7:28-29 56 Ebraham, avu namim, xi minem kila xa melengien navan mei istal, ma besi pupu ni xi ven.”
57 Siu xil labiteni mini labit, “Huram nam tatuxoh hanutap lu e he xalu mun (50) ti mu. ?Mak, ma obit otepus Ebraham midep?”
58 Iesu bit rilomun ni mi xil bit, “Reitin li nabiteni xamim xa melele xa Ebraham tenapot ti mu, inou NABE.” (Eks 3:14)‡ E sepinien Hibru, “inou NABE” (Eks 3:14) xa be his xati na Hi. Ve merereen nae, moletin xil latekes Hi ni ‘Iahova’ xa koute teni be Suv. ✡ Sion 1:1
59 Melele xa Siu xil lalong naha xa Iesu biteni, laleh hat xil labit lihov vini. E Iesu minggus ra xil e be reling vioh te Nim Eo.✡ Sion 10:31; 11:8
*^ E rut vanuvei matu xil te Sion, tumulen te Sion 8:1-11 tovuol en.
✡8:5: Lev 20:10; Dut 22:22
†8:6: Lanemi xa isa mesal mi xil tengan lital xati vengan xa xosxa Iesu ihit, “Ristokovein atou ak iha,” ma ita xoteh rae na Mosis. E xosxa ihit, “Momal tengan rihov vini,” ma ita xoteh rae na kavmen te hal Rom xa tamaen Siu xil ti tengan lavas vin moletin.
✡8:7: Dut 17:7
‡8:12: E melengien eo kor te Wik te Horao ak, pris xil labe vioh te Nim Eo e lasahan laet xa mahulong xa kandel xil holu ladi en. Xos Iesu di bit lelen ni xa laet ak nggoni vole tei usil xi xa be miehen na Hi mi moletin xil te ut etan.
✡8:12: Aes 49:6; Sion 1:4,5,9; 9:5; 12:46
✡8:14: Sion 13:3; 16:28; 7:28; 9:29
✡8:15: 1Saml 16:7; Sion 7:24; 12:47
✡8:17: Dut 17:6; 19:15
§8:24: Vahit sepinien ak vahe, “inou NABE” (Eks 3:14) xa be his xati na Hi. Ve merereen nae, moletin xil latekes Hi ni ‘Iahova’ xa koute teni be Suv.
✡8:28: Nam 21:9; Sion 3:14; 12:32
*8:28: Vahit sepinien ak vahe, “inou NABE” (Eks 3:14) xa be his xati na Hi. Ve merereen nae, moletin xil latekes Hi ni ‘Iahova’ xa koute teni be Suv.
✡8:30: Sion 2:23; 7:31; 10:42; 11:45; 12:11,42
†8:33: Sepinien nae tave reitin ti vengan xa mol‑Isrel xil ladi pe he kavmen te hal Rom. E, e histri nae, lateti pe he mol‑Isip xil, mol‑Babilon xil, mol‑Siria xil, mol‑Kris xil, e pe he moletin savsav xil mun.
✡8:33: Mat 3:9; Luk 3:8; Sion 8:39,56; Neh 9:36
✡8:35: Eks 21:2; Dut 15:12
✡8:41: Dut 32:6; Aes 63:16; 64:8
✡8:42: 1Sion 5:1; Sion 13:3; 16:28; 17:8; 7:28; 17:8
✡8:46: 2Kor 5:21; 1Pit 2:22; 1Sion 3:5
✡8:48: Sion 4:9; Mak 3:21-22; Sion 7:20
✡8:55: Mat 11:27; Luk 10:22; Sion 7:28-29
‡8:58: E sepinien Hibru, “inou NABE” (Eks 3:14) xa be his xati na Hi. Ve merereen nae, moletin xil latekes Hi ni ‘Iahova’ xa koute teni be Suv.